Read anuak 2 Luup Nyeye 31 Bible Online

2 Luup Nyeye 31 - anuak bible

2 Luup Nyeye 31

¹'Ba kanya thum wøør ajwöma bäre, jø Icriel bëët moa nut kaagø gena ci wøk yïth päänye mo Juuda, ni tøcge kïte moa no ocwöth piny na gïï lam, ni ŋøtge jenni piny moa no ocaa ri jwø wø cwøl na Acara, ni raanyge kwör lam moa en bäät thuuri mo wø lam juuga reyø yïthge, ki gïï wø cïp olämme moge bäätge. Gïïögø tïïcge yïth mïëc jø tuuŋ Juuda bëët ki jø tuuŋ Benjamen, ki yïth mïëc jø tuuŋ Ipariem ki jø tuuŋ Maneeca, këël mana thöörge japøgø bëët ki raanynyø. Køøre ge na jø Icriel bëët, gena duu yïth päänye moge, ni ö ŋati man nø ni døø yïth ŋøøpe.

²'Ba Edhekaya dïlämme ki jø tuuŋ Libay acïïmme na dhøgi, ni cïp tïïc mar ŋati man nø jïgø ki yi dhøk mana en yie. 'Ba tïïe moa cïbe jï jøøgø bëët na mo tïïge rege, beege cïp olämme mo wø waaŋ bäre, ko olämme mo wø duunni ki mëër, ki tïny Øt Wuuö Jwøk, ki dwøk met ec ki pwøc dï kal mar Øt Wuuö Jwøk.

³'Ba eni thuwø ena cïpö ki 'lääy na kur nyeya, nee tïmge no olämme mo wø waaŋ bäre na mo cïp ka amöölla ka abøøya, ki yïth cääŋŋe mo jwöm, ki kany wø päär dwääyi, ki kwör ajwöm moa no ocaanø, ki køør mana no ogöörö yïth ciik mo Wuuö Jwøk.

⁴Eni thuwø jiy mo wø bëëdö yi Jerucalem aköömme nee muuce ko olämme moa näk kur dïlämme ki jø tuuŋ Libay cïpge, nee dïlämme ki jø tuuŋ Libay nee cwïnyge cïpge bäre ki man gwøkge ciik mo Wuuö Jwøk.

⁵'Ba luubö manøgø kanya wïnye jaak, jø Icriel gena put kännö ki wïth jammi mo thööth, ni beege thwöth beel moa kwøŋ ciek, ki kwøk nyïïomøki mo nyärö, ki mädhi, ki mäth kïïnynye, ki wïth caammi bëët moa ciek yïth pwöth moge. Japøgøøni akälge ni thööth na paac wïth jammi moge bëët moa en jïge.

⁶'Ba jø Icriel ki jø Juuda mo wø bëëdö yïth päänye mo Juuda, gena kännö thuwø ki paac wïth jammi mo dhäk ki mo dïëk, ki paac wïth jammi mo jammi moa näk ege cïp kur keerge kiper Wuuö Jwøk, Jwøk marge, ni cïpge ge piny na athwöe.

⁷'Ba tïï cïp jammi piny moøgø na athwöe, täkge ka dwää adäk, ni thöörge ge ki dwää abïriiø.

⁸'Ba kanya ö Edhekaya ki kwääri moa en tiere na jootge athwöe mo jammi moøgø, Wuuö Jwøk apwøcge ki jiye ma jø Icriel.

⁹Køøre Edhekaya dïlämme ki jø tuuŋ Libay apëënynye kiper jammi moa näk ocïp piny na athwöe.

¹⁰'Ba Adhariya na bëëdö na dïlämi mana dwøŋ, na käl dhi øt Dhadök, aköö jïgø, ni «Ki kanya täk jammi moøgø ki cïp na käli Øt Wuuö Jwøk, waana bëëdö ni wa cämö ni rømwa, ni dööŋ thäk møøki wøk, kiper Wuuö Jwøk jiye agwïëdhe, ni ö jammi moi ni thööth ii ni dööŋge wøk.»

¹¹'Ba gena kööm Edhekaya nee uut kän jammi moa en yi Øt Wuuö Jwøk jiiŋge, ni putge ge jiiŋŋø.

¹²Køøre geni muuce moøgøøni ki paac wïth jammi ki jammi moa näk ocïp kur keerge na mo Jwøk akïthge yïth uudi moøgø ki tïïc ma kare. Ni ö Könaniya nyïï tuuŋ Libay ni cïbi bäät jammi moøgø na ŋat raŋ ge; 'ba coki ma Cimiy beeye ŋata caath køøre.

¹³'Ba Könaniya ki coki ma Cimiy, jøøa bëëdö tietge na jø raŋ tïïc na jier nyeya ma Edhekaya beege Jikiël, ka Acaciya, ki Naath, ka Acaël, ki Jerimöth, ki Jödhabat, ki Eliel, ki Icmakiya, ki Maath, ki Benaya. 'Ba Adhariya beeye ŋata bëëdö na ŋat raŋ Øt Wuuö Jwøk.

¹⁴'Ba Körë wär Yimna nyïï tuuŋ Libay, na bëëdö na ŋat koor dhi kal mar Øt Jwøk mana en jï løø kur tuul-cäŋ, ena cïp bäät muuce moa cïp ki met ec jï Jwøk, kiper nee muuce moa no ocaanø ni cïp, ki caammi moa en kur keerge, nee wø pääŋŋe jï jø tuuŋ Libay.

¹⁵'Ba jøøa en tiere ki yïth päänye mo dïlämme beege Ëden, ki Miniamin, ki Jëcua, ki Cemaya, ka Amariya, ki Cekaniya. Jøøgøøni tïïc atïïcge na kare ki man pääŋge jammi jï tuuŋge ki køør dhøgi moa näk ocïïmmö, ni jø døøŋŋø ko obwöre ena yie,

¹⁶ni bäŋ apääk kiper tier tuuŋ marge; ni cïpge jï obwöc cwøw moa näk cwiicge adäk ki moa näk cwiicge kaala adäk, ni beege jï jiy bëët mo oö Øt Wuuö Jwøk baŋ tïïc ki yïth nïne bëët ki køør mana no ocaanø kiper tïïe moge moo tïïcge yïth dhøgi moge moa näk ocïïmmö.

¹⁷Ni pääŋge ge thuwø jï dïlämme moa näk nyeŋge ogöör piny ki køør tuuŋ marge ki dhøk uudi moge, ki jï jø tuuŋ Libay moa näk cwiicge opäŋ na pïërariiø këël kunece ki køør tïïe moge ki dhøgi moge moa näk ocïïmmö.

¹⁸'Ba ge na nyeŋge göör piny ki køør tuuŋ marge, dwala ge bëët, ni beege ko obwöre moge bëët moa therø, ki määrge, ki wäätge, ki nyïïge; kiper dëëtge acïpge kur keerge na kare na mo Jwøk.

¹⁹'Ba dïlämme na näk nyïïkwaac Aran moa en yïth päänye moge, ki moa en kwör kwaath deŋ päänye moge, da jiy mo ojierø røkge ki nyeŋge ki man pääŋge muuce jï cwøw bëët moa näk dïlämme, ki jï jø tuuŋ Libay bëët moa näk nyeŋge ogöör piny ki køør tuuŋ marge.

²⁰'Ba Edhekaya gïnögø atïïe dï Juuda bäre, ni bëëde ni tïïya gïn mo beer ma kare ma adïëri nyïm Wuuö Jwøk, Jwøk mare.

²¹'Ba jammi bëët moa tïïe kiper Øt Wuuö Jwøk, atïïe ki cwïnye bäre ni manynya mana many Wuuö Jwøki, ni ciik Jwøk ki luup moa ceme ee gwøø; ni ö jammi moa tïïe bëët ni thurge karge jïre.