Read anuak 2 Luup Nyeye 32 Bible Online

2 Luup Nyeye 32 - anuak bible

2 Luup Nyeye 32

¹'Ba køør tïïe moøgø na näk karge yøø na tïïc Edhekaya, Cenakerëp nyeny Aciria aöö ki jø leny moe ni tuk Juuda, ni ciel päänye mo Juuda dïër moa näk kiiri moge ogeerø ni teek, ni cäde ki man døny yïthge ki teek nee maae na moe.

²'Ba kanya ö Edhekaya na joot gø ni Cenakerëp oöö ki man këëde ki jø Jerucalem,

³kwääri moe ki jø leny moe acooŋe ki man dïïrge dhøk jøør moa en töök pääny, ni ö jøøgøøni ni kønyge eni.

⁴'Ba jiy mo thööth, dëëtge aputge cooŋ ni dïïrge dhøk jøør bëët ki dhi waŋ naam mana näk dï paac ee ŋølø, ni ge köö, ni «Ba beer ki man ö nyeny Aciria ni jïte ki pïï mo thööth.»

⁵'Ba Edhekaya cwïnye amaae ni teek ni cäŋ kwöra no opädhö ri kiir bäre geerrø, ni gëën bäätge ki uut koor moa näk ogeerø ni ena maal, ni gëëde ki kiir mør thuwø töök kiir, ni ö kany wø cwøl ni Milø na en yi Pääny Deebit ni mak gø ni teek, ni tïïe ki jap leny mo thööth ki kööt leny mo thööth.

⁶Ni jëëde ki kwääc lwaae mo leny mo käär jiy, ni cooŋ ge nyïme yi kanya laac dhi kiir pääny, ni cään geni ni cøma cwïnyge, ni kööe,

⁷ni «Bëëdu nou teek ni magu cwïnynyu; käru lwäyö ni ba bwøk cwïnynyu ki nyeny Aciria, wala kiper lwaaece bäre ni en buute ice, kiper teek man ni en baŋø en, kaala mar nyeny Aciria.

⁸Jø leny moøke ni en buut nyeny Aciria yøøke beege jø leny mo ŋäätha teek mar dhaanhø; 'ba ŋat en buutø en beeye Wuuö Jwøk, Jwøk marø, noo køny øøni noo këël leny marø.» Køøre jiy cwïnyge aputge cøm ki luup Edhekaya nyeny Juuda.

⁹'Ba køøre nyeny Aciria ma Cenakerëp, kanya bëëde ni deŋ Lakic ee cielø ki jø leny moe bëët na en buute, ena jääk yi Jerucalem ki dwøl ki ceŋ jø kööre moe baŋ Edhekaya nyeny Juuda ki jø Juuda bëët mo wø bëëdö Jerucalem; ni ö jøøa jääŋŋi ni köge,

¹⁰ni «Man beeye dwøl mana caan Cenakerëp nyeny Aciria, ena köö, na ‹?Agïnaŋø ni ŋääthu, ki man bëëdu jaak yi Jerucalem ni uuno ciel dëëci dïër?

¹¹?Aŋø, Edhekaya ba maaŋ wïthu ki man cïpu dëëtu nou thøwu ki käc ki riew, na kööe, ni «Wuuö Jwøk, Jwøk marø, ø pieme piemø cer nyeny Aciria»?

¹²?Patha Edhekaya manøgø na raany kwör lam mo Wuuö Jwøk moa en bäät thuuri, ki gïï wø cïp olämme bäätge, ni kööe jï jø Juuda ki jø Jerucalem, ni «Wøørru Wuuö Jwøk nyïm gïn wø cïp olämme bääte ma aciel, ni wääŋu bääte ki gïï wø jïcge ŋwääi ni met.»?

¹³« ‹?Aani ki kwäya gïna tïïcwa dëët jiy bëët mo mïëri møga kuyu? ?Da juu mo juurre mo mïëri moøka mo omaar lønyø jïge ki man piemge jiy moa bëëdö yïth ŋøøm moge cera?

¹⁴?A jwøe mane ki røk juu bëët mo juurre moa raany kwäya na bäre na løny jïre ki man piem jiye cera? ?A ni näk ma ennø nø, olønye nidïï jï Jwøk maru ki man piem uuni cera?

¹⁵Kiper manøgønø, Edhekaya kär wëëgu man cøøk uuni wala man maaŋ wïthu ki gïnögø, ni ba ŋääthu eni, kiper ki røk juu mo wïth juurre bëët wala mo buc nyeye, bäŋ jwøk mo oløny jïre ki man piem jiye cera wala ceŋ kwäya. ?A Jwøk maru nø, olønye jïre nidïï ki man piem uuni cera?› »

¹⁶'Ba jø kööre mo Cenakerëp gena cäänö ki luup møøk thuwø ni ge raanynya nyeŋ Wuuö Jwøk ki nyeŋ dhaanh Wuuö Jwøk ma Edhekaya.

¹⁷Ni ö Cenakerëp thuwø ni gööde ki weeli ni pääta Wuuö Jwøk, Jwø Icriel, ni cääne ni raanynya nyeŋ gø, ni kööe, «Kaa mana bëët juuwi mo juurre mo tiet mïëri ni kär løny jïge ki man piemge jicge cera, kaawat manøgø thuwø, Jwøk mar Edhekaya ba løny jïre ki man piem jiye cera.»

¹⁸'Ba luubö manøgø aputge rwaac ki dhøk mar jø Juuda ni döötge ena maal, ni ge cäänna jø Jerucalem moa en bäät kiir. Gïnögø atïïcge ni ge wëëga cwïny jø Jerucalem bwøk ki man lwäcge, kiper nee pääny makge.

¹⁹Gena cäänö ni Jwøk mar jø Jerucalem ege päärö ki juu mo jø bäät piny ni wø tïïc jiyi ki ceŋge.

²⁰'Ba nyeya ma Edhekaya ki nyikuŋ Jwøk ma Aydheea wär Amöth gena lämö kiper gïnögø ni jwöŋge dëër Jwøge na en maal.

²¹Kanyøgø Wuuö Jwøk nyïïatwiel maal aput jääŋŋö, ni ö nyïïatwielli manøgø ni 'näk jø leny moa teek bëët mo Aciria, ki kwääc lwaae mo leny bëët moa kwörge døøŋŋø ki kwääc lwaae mo leny bëët moa caath køørge yi twïër mar nyeny Aciria. Ni ö nyeny Aciria ni put døø yi ŋöömö mare ni wïïe olääö. 'Ba kanya døny øt jwøk mare kunece, ena put wääte møøk 'näk kaace ko opëëllö.

²²Kanyøgø Wuuö Jwøk Edhekaya ki jø Jerucalem aput piem cer Cenakerëp nyeny Aciria ki ceŋ jiy møga bëët, ni mooc geni ki jwöm kun ki kun.

²³Ni ö jiyi mo thööth ni öge yi Jerucalem ni ge kännö ki muuce jï Wuuö Jwøk, ki jammi mo perge leth jï Edhekaya nyeny Juuda. Ni ö Edhekaya ni put tïmö ni kare dwøŋ døc ki yïthakic juurre bëët yïth nïne moøka.

²⁴'Ba yïth nïrögøøni, Edhekaya atïmö ni tuu ni ena um thøø; ni läme jï Wuuö Jwøk, ni ö Wuuö Jwøki ni cääne ki eni, ni nyuunhnhi ya Wuuö Jwøki ki ŋïï.

²⁵'Ba Edhekaya bäŋ pwøc mo ee dwøgø jï Wuuö Jwøk na kar gïna beer na joode, kiper cwïnye ajïtö ka atöör. Kiper manøgønø, wëëc Jwøk aö bääte ki bäät jø Juuda ki jø Jerucalem.

²⁶'Ba Edhekaya dëëre adwøk piny, eni ki jø Jerucalem, ni ö wëëc Wuuö Jwøki ni käre ö bäätge ki yïth nïne moa näk moe.

²⁷'Ba Edhekaya atïmö no okwär døc no owøørø; ni tïïe ki uut kän jïre kiper gwet-bïrö, ki warkie, ki nyeŋ kïte moa perge leth, ki gïï wø jïcge ŋwääi ni met, ki kööt leny, ki wïth jammi ma teeŋi mo perge leth.

²⁸Ni tïïe ki uut kän thuwø kiper beel, ki kwøk nyïïomøki, ki mädhi; ni gëëde ki lwääge kiper wïth lääc paac moe bëët, ki ciel man bëët pïïth dïëki moe yïthge.

²⁹Ni gëëde ki päänye jïre, ni jïte ki pïïth dïëk ki wïth lääc paac ma teeŋi mo thööth, kiper Jwøk ocïpö jïre ki jammi mo thööth døc.

³⁰'Ba Edhekaya bee eni na dïïr jöör pï jøøro mana en maal na cwøl ni Giyön, ni tïïc pï gø nee døøkge ki jï løø wø päth cäŋŋi yie ki yi Pääny Deebit. 'Ba Edhekaya jammi moa tïïe bëët athur karge ni beyø.

³¹'Ba këël kanya ö jiyi ki røk kwääri mo Babiløn, na jääŋŋi baŋe ni pëënynya eni ki ŋïï mana rëëm ec[20] na tägö yi ŋöömö mare, ena wec Jwøki keere ni Jwøk päänynya eni kiper nee luup moa en cwïnye bëët nee ŋäc Jwøki.

³²'Ba luum tïïe møga moa tïïc Edhekaya, këël luum tïïe moe moa beyø na tïïe bëët, ogöörö yïth luup moa nyooth jï nyikuŋ Jwøk ma Aydheea wär Amöth, ki yi Wëël Nyec Juuda ki mo Icriel.

³³'Ba Edhekaya ena thøw ni läp køør kwäcge, ni koonyge gø kar bwör moa en maal mo nyïïkwaac Deebit; ni ö jø Juuda bëët ki jø Jerucalem ni wøørge thøø mar gø. Ni ö wääde ma Maneeca ni läw kar gø na nyeya.