Read anuak 2 Luup Nyeye 33 Bible Online

2 Luup Nyeye 33 - anuak bible

2 Luup Nyeye 33

¹'Ba kanya tïm Maneeca na nyeya, cwiic dööŋö moe apaar kurriiø, ni bëëde ni ena nyeya ki cwiiri ma pïërabïïc kurbïïc yi Jerucalem.

²'Ba ena bëëdö ni tïïya gïï mo nëëni ni reyø ki jï Wuuö Jwøk, ni caatha køør gïïa näk ec raac ki ge døc na tïïc wïth juurre moa riem Wuuö Jwøki wøk nyïm jø Icriel.

³Kiper eni kwör wø läm jiyi yïthge bäät thuuri, na raany wänni ma Edhekaya, acäŋ geerrø, ni tïïe ki gïï wø cïp olämme bäätge jï juuk wø cwøl ni Baal, ni tëëŋe ki jenni ni caa ge ri jwø wø cwøl na Acara, ni wøør jap maal ni tïny geni.

⁴Køøre ena tïïö ki gïï wø cïp olämme bäätge jï juu møøk yi Øt Wuuö Jwøk, ni beeye øtø mana kö Wuuö Jwøki ni nyeŋŋe doo wøørø yie yi Jerucalem na bäre bäre.

⁵Eni gïï wø cïp olämme bäätge atïïe yïth käälle moa na ariiø mo Øt Wuuö Jwøk jï japa en maal bëët.

⁶'Ba wääde awaaŋe ki maac no olämi ya agäm-kïn Ben Inöm, ni tïïe ki jap thïëth, ki jap adïëda, ki jap ajuuk, ni pëëny jiy mo rege da juu mo cøøra jwïëc jøøa no othøw, ki jiy mo cäänö ki juuk piny. 'Ba ena tïïö ki gïï mo thööth døc mo nëëni ni reyø ki jï Wuuö Jwøk, ni tïïya Wuuö Jwøk nee goote.

⁷Køøre eni kït gïn wø lam na näk ee tieŋø acwöth piny yi Øt Jwøk, ni beeye øda kö Jwøki jï Deebit ki wääde ma Cølöman, ni «Jerucalem ki øtø man ni en yie en, yaa jierø ki røk kwör wø bëët wïth tuŋi mo jø Icriel yïthge bëët, nee nyeŋŋa bëëde ni ŋäc yie na bäre bäre.

⁸'Ba ni näk mo jø Icriel rege gwøkge gwøø ki man kïthge ciik 'moa bëët bäät tïïc, ki luup moa cema, ki luup ŋøl 'moa, moa caan dhaanhnha ma Modhe jïge, aani, ge ba daaa këët yi ŋöömö mana cïba jï kwäcge.»

⁹'Ba Maneeca jø Juuda ki jø Jerucalem abwødhe ki man gaage wøk ni tïïge ki raay mo thööth mo kaala moa tïïc wïth juurre moa wïthge dïïr Wuuö Jwøki nyïm jø Icriel.

¹⁰'Ba Wuuö Jwøk Maneeca ki jiye acäänne, 'ba ïthge kärge ciiø ki luum gø.

¹¹Kiper manøgø, Wuuö Jwøk kwääc lwaae mo leny mo nyeny Aciria akäl bäätge, ni makge Maneeca, ni gänge um gø ki gïn mo caala obïth, ni twöcge gø ki tiimme mo tïïc ka nywïënyö ma jwïël, ni kïthge gø Babiløn.

¹²'Ba kanya bëëde ni eni ena yïth gïï mo leth, Wuuö Jwøk, Jwøk mare, akwaae, ni dwøk dëëre piny døc nyïm Jwøk, Jwø kwäye.

¹³'Ba kanya läme jï Jwøk, kwac mare awïny Jwøki, ni cäŋi ya Wuuö Jwøki dwøk Jerucalem yi buc nyec mare. Køøre Maneeca aput ŋäc møn ni Wuuö Jwøk beeye Jwøk møn.

¹⁴'Ba na tïme na køør gïïögø, eni kiir mana en wøk ŋää Pääny Deebit na en jï kun wø päth cäŋŋi yie buut jøøro man wø cwøl ni Giyön na en ya agäm-kïdi ageere ni ena maal døc, këël mana këët Dhi Kiir Rec, ni ee wïrö ki deŋ thuur Öpël. Ni cïp yïth päänye bëët mo Juuda moa no ogeerø ni teek ki kwääri mo jø leny.

¹⁵Kanyøgø eni, juu moa path, ki kït gïn wø lam na näk ee tieŋø akäl wøk yi Øt Wuuö Jwøk, këël ki gïï wø cïp olämme bäätge bëët moa näk ee tïïö bäät thuur Øt Wuuö Jwøk ki yi Jerucalem, ni put ge leeŋ wøk ŋää pääny.

¹⁶Køøre eni gïn wø cïp olämme bääte mar Wuuö Jwøk adwøk kare, ni cïpe bäät gø ko olämme mo wø duunni ki mëër ko olämme mo dwøk met ec, ni kööm jø Juuda ki man tïnyge Wuuö Jwøk, Jwø Icriel.

¹⁷'Ba jiy gena bëëdö ni ge poot cïpö ko olämme bäät thuuri, 'ba beeye jï Wuuö Jwøk keere, Jwøk marge.

¹⁸'Ba luum tïïe møga moa tïïc Maneeca, këël lam mana läme jï Jwøk mare ki gø, ki luup moa caan jïre na caan jø wø joot jammi ki køør man wø nyooth Jwøki jïge ki nyeŋ Wuuö Jwøk, Jwø Icriel, ogöör piny yi Wëël Luup Nyeye mo Icriel.

¹⁹'Ba lam mar Maneeca, ki kanya ö Jwøki na wïny kwac mare, ki raay moa tïïe bëët, ki mana bëëde ni bääö dëër Wuuö Jwøk, ki kwör lam moa tïïe bäät thuuri, ki jenni moa no ocaa ri jwø wø cwøl na Acara na tïïe, ki gïï wø lam moa no otieŋø moa cwöth piny yïth kwör lam moøgø, kanya poode ni dëëre poot käre dwøk piny nyïm Wuuö Jwøk, ogöör piny yïth luup jø wø joot jammi ki køør man wø nyooth Jwøki jïge.

²⁰Køøre Maneeca athøw ni läp køør kwäye, ni koonyi paare. Ni ö wääde ma Amön ni läw kar gø na nyeya.

²¹'Ba kanya tïm Amönni na nyeya, cwiic dööŋö moe pïërariiø kurriiø, ni bëëde ni ena nyeya ki cwiiri ariiø Jerucalem.

²²'Ba Amön abëëdö ni tïïya gïï mo nëëni ni reyø ki jï Wuuö Jwøk, kaawat moa tïïc wänni ma Maneeca, ni cïpe ko olämme jï kït gïï wø lam bëët moa näk otieŋø na tïïc wänni ma Maneeca, ni tïny geni.

²³'Ba Amön dëëre käre dwøk piny nyïm Wuuö Jwøk kaawat mana tïïc wänni ma Maneeca na dwøk dëëre piny, 'ba aput bëëte ni 'meeta raay moe.

²⁴Ni ö jø kööre moe ni tutge ki luubö kipere, ni putge gø 'näk yi øtø mare.

²⁵Køøre jiy bëët moa tudö ki luubö bäät Amön, gena put jø paaci 'näk, ni røønyge wääde ma Jöcaya na nyeya kar gø.