Read anuak 2 Luup Nyeye 34 Bible Online

2 Luup Nyeye 34 - anuak bible

2 Luup Nyeye 34

¹'Ba kanya tïm Jöcaya na nyeya, cwiic dööŋö moe abära, ni bëëde ni ena nyeya ki cwiiri ma pïëradäk kurciel yi Jerucalem.

²'Ba ena bëëdö ni tïïya gïï mo nëëni ni beyø ki jï Wuuö Jwøk, ni eni cäädhi ka uutjïëthe moa caath kwari ma Deebit, ni käre gaa bäät caam wala bäät cwïïc.

³Kiper kanya tïm cwiiri moe na abära bäät nyec ni eni poot thiinh, ena tägö ki man many Jwøk, Jwø kwari ma Deebit; 'ba na tïm cwiiri moe na apaar kurriiø bäät nyec, jap juuga reyø na en yi Juuda ki yi Jerucalem atääe ki man raany ge, ni beege kwör lam moa no otïïö bäät thuuri, ki jera no ocaa ri jwø wø cwøl na Acara, ki kït gïï wø lam moa näk otieŋø ki moa näk oleenyø.

⁴Ni ö gïï wø cïp olämme bäätge mo juuk wø cwøl ni Baal ni toorge ge piny ni nëënö jï nyeya; ni ö gïï wø waaŋ gïï wø jïcge ŋwääi ni met bäätge moa näk ocwöth piny buutge ni tøya nyeya piny. 'Ba eni jera no ocaa ri jwø wø cwøl na Acara ki kït gïï wø lam moa näk otieŋø ki moa näk oleenyø atøye na thäŋi thuwø ni guur ge na tør, ni køny tør marge bäät bwöc jøøa wara cïpö jïge ko olämme.

⁵Køøre cuu mo dïlämme mo juuga reyø awaaŋe bäät gïï wø cïp olämme moge bäätge, ni tïïc Juuda ki yi Jerucalem ni waany.

⁶'Ba yïth päänye thuwø mo jø tuuŋ Maneeca, ki jø tuuŋ Ipariem, ki jø tuuŋ Cimien, këël mana këët baŋ jø tuuŋ Naptali, ki kwöra no oränynyö deŋge bëët,

⁷gïï wø cïp olämme bäätge mo juuga reyø atoor piny, ni ö jera no ocaa ri jwø wø cwøl na Acara ki kït gïï wø lam moa näk otieŋø ni ŋøør ge na thäŋi ni guur ge na tør, ni ö gïï wø waaŋ gïï wø jïcge ŋwääi ni met bäätge bëët ni toor ge piny dï ŋööm Icriel bäre. Køøre ena duu Jerucalem.

⁸'Ba kanya tïm cwiic Jöcaya na apaar ka abära bäät nyec, ni ŋööm paare ki yi Øt Wuuö Jwøk ee nø tïïc ni waany, eni Capan wär Adhaliya, ki Maycëya na bëëdö na kwääc pääny, ki Jöa wär Jeyöakac ni wø göör luup akwöma piny, gena jääŋŋe kuna cäŋge Øt Wuuö Jwøk, Jwøk mare, tïïyö ni nyään.

⁹'Ba jøøgø gena ci baŋ Kilkiya na näk Kwääy Lam Mana Dwøŋ, ni cïpge gwel jïgø moa no okäl yi Øt Jwøk, ni beege gwel moa cooŋ jø tuuŋ Libay mo wø koor dhi kal mar Øt Jwøk ki baŋ jø tuuŋ Maneeca, ki baŋ jø tuuŋ Ipariem, ki baŋ jiy bëët moa no odööŋ Icriel, ki baŋ jø tuuŋ Juuda bëët ki jø tuuŋ Benjamen, ki jø wø bëëdö Jerucalem.

¹⁰Køøre gwel moøgø acïpge ceŋ jø wø raŋ tïïc mar Øt Wuuö Jwøk, ni ö jøøgø ni cïpge gwel ceŋ jø tïïc mo tïïc Øt Wuuö Jwøk ni ge dwøga gø kare ni nyään.

¹¹Ni ö jøøgø thuwø ni cïpge ki gwel jï dïjëëth opämi ki jø wø caam øtø ki kïte kiper nee ŋeewge ki kïte moa no otøø ki jenni moa näk rïwe ki moa näk cuge mo wø tïïc wïth uudi ki ge, uuta wëëk nyeye mo Juuda ränynyö.

¹²'Ba jø tïïc, tïïc atïïcge na kare ki jiy moa bwøth geni ki tïïc. 'Ba jøøa bwøth geni ki tïïc, ki røk jøøa käl dëër Mërari beege Jakath ki Øbadiya; 'ba ki røk jøøa käl dëër Kät beege Dhekaraya ki Meculam. 'Ba ge bëët beege jø tuuŋ Libay moa nyeŋge reegø ki pwöt jap dööti ma teeŋi.

¹³'Ba geni thuwø gena tïïc ni gena jø raŋ jø tëër ki jø tïïc mo wø tïïc wïth tïïe ma teeŋi. 'Ba jø tuuŋ Libay, møøk beege dïgööte, ni møøk a kwääri, ni ö møøki ni näkge beege jø koor dhøk kal.

¹⁴'Ba kanya käl gwel wøk moa no ocïbö na muuce yi Øt Wuuö Jwøk, Kilkiya na bëëdö na dïlämi mana dwøŋ wëël ciik mar Wuuö Jwøk mana cïp ki ri Modhe ajoode.

¹⁵Kanyøgø Kilkiya aköö jï Capan, ŋat wø göör luup akwöma piny, ni «Aani, wëël ciik Modhe ajooda yi Øt Wuuö Jwøk.» Køøre eni wëël ciik aput cïp jï Capan.

¹⁶Køøre Capan wëël ciik alwøre ni kïth gø baŋ nyeya, ni caan gø jï nyeya thuwø ni kööe, ni «Jiy moï jammi bëët moa no ocaanø jïge ni tïïcge, ge tïïö rege.

¹⁷Geni thuwø, gwel moa joot yi Øt Wuuö Jwøk akälge wøk ni cïpge ge jï jø wø raŋ tïïc ki jø tïïc.»

¹⁸Køøre eni na Capan ni wø göör luup akwöma piny, nyeya acäŋ cäännö ni kööe, ni «Kilkiya, eni na dïlämi, wëël ciik acïbe jïra.» Kanyøgø Capan wëël ciik manøgø aput kwaan nyïm nyeya.

¹⁹'Ba kanya ö nyeya na wïny luup ciik moøgø, abïïge aput jeeyø ki pänh cwïny.

²⁰Kanyøgønø, nyeya, Kilkiya, ka Akikam o Capan, ka Abidön o Mikiya, ki Capan ŋat wø göör luup akwöma piny, ki dhaanh nyeya ma Acaaya, aput köömmö ni kööe,

²¹ni «Cou pëënynyu dwør Wuuö Jwøk kipera, kiper jiy bëët moa dööŋ Icriel ki Juuda, kiper luup mo wëël ciik man na joot en; kiper wëër mo dwøŋ mar Wuuö Jwøk aö bäätø kiper mana ö kwäyø ni kärge dwør Wuuö Jwøk jïëö ki køør luup moi bëët no ogöör yi wëël ciik man en.»

²²'Ba Kilkiya ki jiy møga moa kööm nyeya gena ci ni cäänge ki nyikuŋ Jwøk ma Ulda, nyijø mo bëëdö thääŋ Jerucalem mana nyään. 'Ba Ulda beeye cï Calum o Tikwa, nyikwaar Arac, ŋat wø koor abïïk lam.

²³'Ba nyijøøgø aköö jïge, ni «Man beeye mana caan Wuuö Jwøki, Jwø Icriel, ena köö ni caannu jï ŋata jääŋ uuni baŋa,

²⁴ni Wuuö Jwøk aköö, ni ‹Ka adïëri møn, gïn mo raac kïtha bäät Jerucalem ki bäät jiy mo wø bëëdö yie; këël acëënne bëët moa näk ogöörö yi wëël ciik mana kwaan nyïm nyeny Juuda kïtha bäätge.

²⁵Kiper aana wecge ni wääŋge ki jer wø jïcge ŋwääi ni met jï juu møøk, ni ge tïïya aani naa goota ki køør tïïe bëët moa temge ki ceŋge. Kiper manøgønø, wëër mara kïtha bäät Jerucalem, ni bëëde ni ba cuŋ.›

²⁶'Ba wär caannu jï nyeny Juuda na jääŋ uuni kuna pëënynyu Wuuö Jwøk, ni kööu jïre ni man beeye mana caan Wuuö Jwøki, Jwø Icriel kiper luupa wïnynyï,

²⁷ena köö, ni ‹Kiper mana päth cwïnyï ni dwøgï dëërï piny nyïma kanya wïnynyï luup 'moa mo jääla Jerucalem ki ge ki jø wø bëëdö yie, ni jeeyï abïïgï ki pänh cwïny, ni jwöŋï nyïma, ka adïëri møn, a na Wuuö Jwøk, oduuru marï awïnynya.

²⁸'Ba ka adïëri møn, ï thøw ni läpï køør kwäyu, ni koony ïïni yi bwörö marï ni paac poot beer. Japa reyø bëët moo käla bäät paani ki bäät jø wø bëëdö yie, ba jootï ki waŋï.› » Køøre jøøa jääŋŋi gena døøk ni caange luubö manøgø jï nyeya.

²⁹Køøre nyeya ma Jöcaya ena jäägö ki dwøl ni cooŋ jø døøŋŋø bëët moa en yi Jerucalem ki moa en yi ŋööm Juuda bäre.

³⁰Ni ö nyeya ni ci Øt Wuuö Jwøk ki jø Juuda bëët, ki jiy bëët mo wø bëëdö yi Jerucalem, ki dïlämme, ki jø tuuŋ Libay, ni beege jiy bëët, ki mana täge ri jøøa kwörge døøŋŋø këël moa kwörge therø; ni ö nyeya ni kwaan luup bëët ni wïnyö jïge moa en yi wëël luumma tuut Wuuö Jwøki ki jiye na joot yi Øt Wuuö Jwøk.

³¹Kanyøgø nyeya acuŋŋö kare ni tude ki luubö nyïm Wuuö Jwøk, nee eni bëëde ni caatha køør Wuuö Jwøk, nee gïïa cem Wuuö Jwøki, ki pwöc moe, ki ciik moe gwøe ki cwïnye bäre ka acaaye bäre, nee bëëde ni cäädhi ka køør luup moa no otuudö na no ogöör piny yi wëëlö manøgø.

³²Ni ö eni thuwø ni tïïc jø Jerucalem ki jø tuuŋ Benjamen moa nut kaagø bëët nee luummögø jïëcge. 'Ba jø Jerucalem gena put jïëy ni tïïcge gø ki køør luumma tuut Jwøki ki jiye, Jwø kwäcge.

³³'Ba nyeya ma Jöcaya gïïa näk yi Jwøk raac ki ge bëët akäl wøk yïth ŋøøm bëët moa näk mo jø Icriel, ni tïïc jiy bëët mo wø bëëdö Icriel nee Wuuö Jwøk tïnyge, Jwøk marge. 'Ba yïth nïne moa beet nyeya ma Jöcaya, jø Icriel wääth kärge wiiø køør Wuuö Jwøk, Jwø kwäcge.