Read anuak 2 Luup Nyeye 35 Bible Online

2 Luup Nyeye 35 - anuak bible

2 Luup Nyeye 35

¹Køøre nyeya ma Jöcaya cäŋ Cäŋa Pööth Thøøe Yie awøøre jï Wuuö Jwøk yi Jerucalem, ni ö geni ni 'näkge nyïïdïëk moa therø mo Cäŋa Pööth Thøøe Yie ni nïr dwää aciel apaar kurŋween.

²'Ba Jöcaya dïlämme acïp bäät tïïe moge, ni cøm cwïnyge nee cuŋge ni teek ri tïïe mo Øt Wuuö Jwøk.

³'Ba ena köö thuwø jï jø tuuŋ Libay mo obëëdö ni dëëtge ege cïp kur keerge na mo Wuuö Jwøk, ni wø pwöny jø Icriel bëët, ni «Kälu acanduk mana en kur keere yi Øt Wuuö Jwøk na geer Cølömanni o Deebit nyeny Icriel, nee ba kääru këët. 'Ba ennø, tïnynyu Wuuö Jwøk, Jwøk maru, ki jiye ma jø Icriel.

⁴'Ba jiiŋŋu dëëtu ki køør dhøk uudi mou ki yïth dhøgi mou kaawat mana no ogöör Deebiti piny nyeny Icriel ki wääde ma Cølöman.

⁵«Ni cuŋŋu kanya en kur keere ni pääŋŋu dëëtu dhi øtø man nø ki man nø mo jø pou.

⁶Ni 'nägu nyïïdïëk mo Cäŋa Pööth Thøøe Yie, ni cïbu dëëtu kur keeru na mo Wuuö Jwøk, ni jiiŋŋu nyïïdïëk kiper jø pou ki køør luubö mana caan Wuuö Jwøki ki ri Modhe.»

⁷Køøre Jöcaya akän wøk jï jø paac bëët moa nut kaagø ki nyïïdïëk ma kume ma pïëradäk ki dhäk ma kume adäk, kiper Cäŋa Pööth Thøøe Yie, 'ba moøgø bëët käl wøk ka røk lääy moe.

⁸'Ba jø kööre mo nyeya thuwø gena kän wøk ko olämme ki met ec marge jï jø paac ki jï dïlämme ki jï jø tuuŋ Libay. Ni ö Kilkiya ki Dhekaraya ki Jikiël, ge na dïbwöthe mo Øt Jwøk, ni cïpge ki nyïïdïëk ma kume ariiø ki dïpe abïciel ki dhäk ma dïpe adäk jï dïlämme no olämme kiper Cäŋa Pööth Thøøe Yie.

⁹'Ba Könaniya thuwø ki nyïïmenni, ni beege Cemaya ki Natanel, ki dïbwöthe møøk mo jø tuuŋ Libay, ni beege Acabiya ki Jïël ki Jödhabat, gena kän wøk thuwø jï jø tuuŋ Libay ki nyïïdïëk ma kume abïïc ki dhäk ma dïpe abïïc no olämme mo Cäŋa Pööth Thøøe Yie.

¹⁰'Ba kanya ö tïïe moøgø na nø jiiŋŋi, dïlämme gena cuŋŋö kwörge, ni ö jø tuuŋ Libay ni cïïmge rege ki køør dhøgi moge ki køør mana ö nyeya na kööm ge ki gø.

¹¹Ni 'näkge nyïïdïëk mo Cäŋa Pööth Thøøe Yie, ni ö dïlämme ni lwørge remø ceŋ jø tuuŋ Libay ni jørge gø bäät gïn wø cïp olämme bääte, ni ö jø tuuŋ Libay ni jaaŋge nyïïdïëk.

¹²Køøre gena kän wøk ki røk nyïïdïëk moøgø ko olämme moo waaŋ bäre nee cïpge jï jø dhøk uudi mo jø paac moa no ocïïmmö na dhøgi, nee cïpge jï Wuuö Jwøk kaawat mana no ogöör piny yi wëël Modhe. Ni tïïcge tïïc manøgø ki dhäk thuwø.

¹³'Ba rïŋ mo dïëk mo Cäŋa Pööth Thøøe Yie abulge ki maac ki køør mana no ogöör piny; ni ö rïŋö mana no ocïp kur keere ni thaalge gø ki dääe ka athääe ki thäwe, ni laarge gø cïp jï jø paac bëët.

¹⁴Køøre gena tëëdö kiper dëëtge ki dïlämme, kiper dïlämme na näk nyïïkwaac Aran gena bëëdö këël wäär ni ge cïpa olämme mo wø waaŋ bäre ki dwäle mo wø waaŋ. Kiper manøgønø, jø tuuŋ Libay atëëdö kiper dëëtge ki dïlämme na näk nyïïkwaac Aran.

¹⁵'Ba jø wär dudi moa käl dëër Acaap, ge bëëdö kwörge kaawat mana ö geni na köömmi ya Deebiti, ka Acaap, ki Ëman, ki Jeduthun, ŋat wø car jammi jï nyeya ki køør man wø nyooth Jwøki jïre. 'Ba jø wø koor dhi kal man nø, kwör koor moge kärge wiiø, kiper tuuŋge ma jø tuuŋ Libay atëëdö kiperge.

¹⁶'Ba tïïe bëët mo tïïc kiper Wuuö Jwøk ajiiŋŋi yi cäŋögø nee cäŋ Cäŋa Pööth Thøøe Yie wøør, nee olämme mo wø waaŋ bäre cïp bäät gïn wø cïp olämme bääte mar Wuuö Jwøk ki køør mana ö nyeya ma Jöcaya na kööm ge ki gø.

¹⁷'Ba jø Icriel bëët moa nut kar kaace, cäŋ Cäŋa Pööth Thøøe Yie awøørge, ni wøørge Ajwöm Møga Näk Ree Bäŋ Thømmø ki nïne abïriiø.

¹⁸'Ba bäŋ wödö mar cäŋ Cäŋa Pööth Thøøe Yie mo caala teeŋ man mo otïïö Icriel, 'ba ŋuuda yïth nïr Camiel na näk nyikuŋ Jwøk; ni bäŋ ŋat mo owøør cäŋ Cäŋa Pööth Thøøe Yie ki røk nyeye mo Icriel ki wödö mo röömi ki man na tïïc Jöcaya, ki dïlämme, ki jø tuuŋ Libay, ki jø Juuda ki jø Icriel moa en kaagø bëët, ki jø wø bëëdö Jerucalem.

¹⁹'Ba cäŋ Cäŋa Pööth Thøøe Yie manøgø wøør ki kanya tïm cwiic Jöcaya na apaar ka abära bäät nyec.

²⁰'Ba na tïme na køøre japøgø bëët, ni Jöcaya tïïe mo Øt Jwøk ee nø thöör, Nekø nyeny Ijep aci baŋ leny Karkëmec bäät Naam Upareeti, ni ö Jöcaya ni ci baŋ gø wøk nee këëde ki gø.

²¹'Ba Nekø aöön baŋ gø ki jiy ni kööe, «?Wui, nyeny Juuda, agïnaŋø ni en yïthakiyø ki ïïni? A ba ö baŋ leny ki ïïni dïcäŋi, 'ba beeye baŋ paac man wø mäna ki gø, kiper Jwøk a ee köömmö ni laara leny man këël. Jwøk ni en buuta en kär yie cwaatï; kiper nee ï ba raanynye.»

²²'Ba Jöcaya, Nekø käre wiiø ki man ci baŋ gø, 'ba abïïk nyec aput wiil, ni ci baŋ leny baŋ gø, ni mare kweer ki luubö mana caan Jwøki ki dhi Nekø. Ni put ci baŋ leny yi pwöl Megidø.

²³Kanyøgø jø wø këëdi ka athëëre nyeya ma Jöcaya akëëlge, ni kö nyeya jï jø kööre moe, ni «Kïthu aani wøk ki dï leny, kiper dëëra anø jïtö ki ŋwellø mo leth døc.»

²⁴Ni ö jø kööre moe ni kälge eni wøk ki yi jää leny man wø tuut okweenynyi mana këëli yie, ni kïthge gø yi jääy mare maya, ni kïthge gø Jerucalem; ni put thøø. 'Ba akoonyge buut bwör mo kwäye. Ni ö jø Juuda bëët ki jø Jerucalem ni kïïnge gïr gø.

²⁵'Ba Jeremaya acääö ki duut man jwøk Jöcaya ki gø; 'ba këël yïth nïne moi jø wär ki dudi moa näk cwøw ki mään bëët, kany wø wärge ki dudi mo wø wär kiper thøø, wïthge wø parge parø ki Jöcaya. 'Ba gïnögø aput tïmö na kööŋŋö ki Icriel, ni gööri piny yi wëël dudi mo wø jwøk jiy ki ge kany wø thøwge.

²⁶'Ba jammi møga moa tïïc Jöcaya, ki tïïe moe na beyø na tïïe ki køør mana no ogöör piny yi wëël ciik mo Wuuö Jwøk,

²⁷ki gïïa tïïe bëët ki mana täge këël aŋuunge, ogöör piny yi Wëël Luup Nyeye Mo Juuda ki Icriel.