Read anuak 2 Luup Nyeye 36 Bible Online

2 Luup Nyeye 36 - anuak bible

2 Luup Nyeye 36

¹Kanyøgø jø paac bëët Jeyöakac o Jöcaya alwørge ni røønyge gø na nyeya kar wänni yi Jerucalem.

²'Ba kanya tïm Jeyöakaci na nyeya, cwiic dööŋö moe pïërariiø kurdäk, ni bëëde ni ena nyeya ki dwäde adäk yi Jerucalem.

³Køøre nyeny Ijep aöö ni käl teek nyec wøk cer Jeyöakac yi Jerucalem, ni put cwötö ka ajwäk bäät paac, ni beege gwet-bïrö ma rumme ma kikarri ma dïpa, ki warkey ma rumi ma kikar aciel.

⁴Ni ö nyeny Ijepi ni put Eliekim cöök Jeyöakac røøny na nyeya bäät Juuda ki Jerucalem, ni wiil nyeŋ gø ni Jeyöakëm. 'Ba Nekø nyeny Ijep, Jeyöakac cöök Jeyöakëm alwøre ni kïth gø Ijep.

⁵'Ba Jeyöakëm kanya tïme na nyeya, cwiic dööŋö moe pïërariiø kurbïïc, ni bëëde ni ena nyeya ki cwiiri apaar kurciel yi Jerucalem. 'Ba Jeyöakëm ena bëëdö ni tïïya gïï mo nëëni ni reyø ki jï Wuuö Jwøk, Jwøk mare.

⁶'Ba Nabukedenecör nyeny Babiløn aö maal bäät Jeyöakëm, ni mak gø ni twöc gø ki tiimme mo tïïc ka nywïënyö ma jwïël, ni kïth gø Babiløn.

⁷'Ba Nabukedenecör thuwø jammi møøk mo Øt Wuuö Jwøk akïth Babiløn ni kïth ge yi øt lam mare yi Babiløn.

⁸'Ba luum tïïe møga moa tïïc Jeyöakëmmi, ki gïïa raac eci ki ge na tïïe, ki jammi moa tägö dëëre, ogöör piny yi Wëël Luup Nyec Icriel ki Juuda. 'Ba Jeyöakëm wääde ma Jöakin aläw kar gø na nyeya.

⁹'Ba kanya tïm Jöakinni na nyeya, cwiic dööŋö moe apaar ka abära, ni bëëde ni ena nyeya ki dwäde adäk ki nïne apaar yi Jerucalem. 'Ba Jöakin ena bëëdö ni tïïya gïï mo nëëni ni reyø ki jï Wuuö Jwøk.

¹⁰'Ba kanya tïme ni piny arïïa, nyeya ma Nabukedenecör aöönnö ki jiy ni käl Jöakin ki jammi moa perge leth mo Øt Wuuö Jwøk ni kïth ge baŋe Babiløn, ni tïïc Cëdëkiya cöök wää Jöakinni na nyeya bäät Juuda ki Jerucalem.

¹¹'Ba kanya tïm Cëdëkiya na nyeya, cwiic dööŋö moe pïërariiø kurciel, ni bëëde ni ena nyeya ki cwiiri apaar kurciel yi Jerucalem.

¹²'Ba ena bëëdö ni tïïya gïï mo nëëni ni reyø ki jï Wuuö Jwøk, Jwøk mare, ni eni bëëdö ni dëëre käre dwøk piny nyïm nyikuŋ Jwøk ma Jeremaya, ŋat wø car luup Wuuö Jwøk.

¹³Ni gëëme thuwø ki nyeya ma Nabukedenecör, ŋata tïïc gø nee kööŋe nyïm Wuuö Jwøk. Ni tïïc wïïe ki cwïnye ni teek ki man løø nyïme baŋ Wuuö Jwøk, Jwø Icriel.

¹⁴Maya thuwø, dïlämme bëët moa kwörge døøŋŋø, ki jiy bëët, gena bääyö dëër Wuuö Jwøk. Kiper gena tïmö ni ge caatha køør japa raac eci ki ge bëët ni wø tïïc wïth juurre, ni tïïcge Øt Wuuö Jwøk ni ba waany, øda cïp Wuuö Jwøki kur keere yi Jerucalem.

¹⁵'Ba Wuuö Jwøk, Jwø kwäcge, dwøl mare jääŋŋe jääŋŋö baŋge cooth ki dhøk nyïïkuk moe, kiper pänh cwïny mare kiper jiye ki kar bëëtö mare.

¹⁶'Ba ge poot bëëdö ni ge buua nyïïkuk Jwøk ni luup Jwøk ege taaø, ni ge ŋeethø bäät nyïïkuk Jwøk, këël kanya ö wëëc Jwøki na ö bäätge ni tïme ni bäŋ køny mo ojoodø ki man døø paaci kare.

¹⁷Kiper manøgønø, Wuuö Jwøk nyeya mar jø Kaldia[21] ma Nabukedenecör atïŋ maal bäät jø Juuda, ni ŋøør obwöre moge moa näk wøpe ko opëëlle këël mana këët baŋ moa en yi Øt Jwøk marge na en kur keere; ni cwïnye ba pädhi kiper dhaanhø, nee ena nyilaar dïcwøø wala ena nyakøø, nee ena dhaanhø mo onø jalø wala tuu; 'ba gena cïp Wuuö Jwøki bëët cer nyeny Kaldia.

¹⁸Ni ö jammi bëët mo Øt Wuuö Jwøk, ni beege jammi moa døøŋŋø ki moa therø, ki jammi moa perge leth mo Øt Wuuö Jwøk, ki jammi moa perge leth mo nyeya ki jø kööre moe, ni käli ya nyenynyøgø bëët ni kïth ge Babiløn.

¹⁹Køøre Øt Jwøk awaaŋge, ni nyaage kiir Jerucalem piny, ni ö uudi bëët mo Jerucalem moa no ogeerø ni teek ni waaŋge ge ki maac, ni raanyge jammi bëët moa perge leth na en yi Jerucalem.

²⁰'Ba jiy bëët moa bøth ki thøø dho opëëllö amak nyenynyøgø ki tøŋ ni kïth ge Babiløn, ni putge bëëte ni gena laaŋe mo nyenynyøgø ki wääte këël kanya täk buc nyeci mar jø Parca.

²¹Gïnögø atägö ni wëëga luum Wuuö Jwøk thur kare mana caane ki dhi Jeremaya, këël mana ö ŋöömö ni mïn yie ki yïth cwiic jwöm moe. Kiper cwiic ränynyö moe moa näk pïërabïriiø acäŋ beetø na mo jwöm.

²²'Ba kanya tïme na yi cwiir mana dïkwøŋ[22] mana beet Kiröci nyeny Parca yi Babiløn, Wuuö Jwøk, kiper nee luubö mana caane ki dhi nyikuŋ Jwøk ma Jeremaya thur kare, eni yi Kiröc nyeny Parca atheŋe nee jääk dï paac mare bäre ki dwøl, ni dwøl manøgø thuwø, ogöör piny na ennønø:

²³ni «Man beeye dwør Kiröc nyeny Parca, ena köö, «ni ‹Wuuö Jwøk, Jwø maal, mïëri moa en bäät piny bëët anø cïbe jïra, ni nø tïïc aani nee eni gëënna ki øtø yi Jerucalem na en Juuda. 'Ba ennø, ŋat ma dhaanh Wuuö Jwøk mo ena dïïu kaagø, beerra man ö Wuuö Jwøki Jwøk mare ni bëëde ki eni, ni ö eni ni ci Jerucalem.› »