Read anuak 2 Luup Nyeye 4 Bible Online

2 Luup Nyeye 4 - anuak bible

2 Luup Nyeye 4

¹Køøre Cølöman atïïö ki gïn wø cïp olämme bääte mo tïïe ka nywïënyö ma jwïël, mo bär mare beeye gööye ma pïërariiø, ni ö dööŋ yie ni näk gööye ma pïërariiø thuwø. 'Ba bär mar gääŋe ki maal beege gööye apaar.

²Ni tïïe thuwø ki gïr pïï mo dwøŋ mo ogul, mo tïïc ka nywïënyö ma jwïël mo othiiø, ma gööye apaar ki mana täge deŋŋe man këël deŋŋe maya, ni bär mare mar maal beeye gööye abïïc, ni dööŋ dëëre beeye gööye ma pïëradäk.

³'Ba nyäär gïr pïï manøgø othïïmmö ki gïï mo caala dhäk, no owïrö ki deŋŋe bäre, ni yi gööyö aciel da dhäk apaar, ni deŋ gïr pïï ege wïrö na tëëŋŋe ariiø.

⁴'Ba gïr pïï manøgø ocïp bäät gïï ma apaar kurriiø mo poot caala dhäk. 'Ba dhäk moøgø adäk nyïmge oløø jï løø wï-piny, na adäk nyïmge oløø jï løø kur pänh-cäŋ, na adäk møga nyïmge oløø jï løø tier-piny, na adäk møga nyïmge oløø jï løø kur tuul-cäŋ. 'Ba gïr pïï manøgø ocïp bäätge, ni ŋäthge oløø baŋ gø.

⁵'Ba gïr pïï manøgø odhïŋe beeye rumi aciel mo røm ka lweedi moa na aŋween mo cenø; ni deŋŋe caala deŋ ogubayu ki deŋ apiito mo oŋøøk; 'ba yie kädö ki pïï ma yïth caapiie ma kume adäk.

⁶'Ba ena tïïö thuwø ki jap peny ma apaar mo caala athääe; ni cïp abïïc bäät cwïïc, ni ö abïïci møga ni cïp ge bäät caam, nee gïï wø cïp no olämme mo wø waaŋ bäre nee wø peny yïthge. 'Ba gïr pïï mana dwøŋ bee per dïlämme nee wø lööge yie.

⁷Køøre ena tïïö ki gïï wø cuŋ lambae bäätge ma apaar mo tïïc ka warkey, ni tïïe ka køør jöö mana näk okäl wøk; ni cïp ge yi Øt Jwøk, na abïïc ee cïp bäät cwïïc, ni ö abïïci møga ni cïp ge bäät caam.

⁸Ni tïïe thuwø ki tharabëëte apaar; ni cïp ge yi Øt Jwøk, na abïïc ee cïp bäät cwïïc ni ö abïïci møga ni cïp ge bäät caam. Ni tïïe ki kuure ma dïpa mo tïïc ka warkey.

⁹Køøre kal mar dïlämme, ki kal mana dwøŋ, ko odhuule mo dhøk käälle, atïïe; ni ö odhuule moøgø ni lëëny ge ki nywïënyö ma jwïël.

¹⁰'Ba eni gïr pïï mana dwøŋ acïp bäät cwïïc jï kuna en Øt Jwøki yie yïthakic jï løø tier-piny ki jï løø kur tuul-cäŋ.

¹¹'Ba Kuram atïïö thuwø ki dääe, ka akaape, ki cäänne. Kanyøgø, eni tïïe moa tïïe kiper nyeya ma Cølöman yi Øt Jwøk aput thöör ki tïïc,

¹²ni beege: gïïa na ariiø na näk caala dïkweeye, ki gïïa näk ariiø na näk ogul mo jap mïërö moa na ariiø na näk ocïp wïth gïïa caal dïkweeye, ki tiimme moa no odwøø ma ariiø na mo rïëp gïïa na ariiø na mïërö na en wïth gïïa caal dïkweeye,

¹³ki gïïa näk caala nyïïadïkwäle ma dïpe aŋween na kïth bäät tiimme moa no odwøø, na aciel man nø dëëre da nyïïadïkwäle ma tëëŋŋe ariiø, na mo rïëp gïïa näk ogul na näk ariiø na mïërö na en wïth gïïa caal dïkweeye.

¹⁴Ena tïïö thuwø ki jïëthe mo wø käär jap peny ki ge, ki jap peny mo ena bäätge,

¹⁵ki gïr pïï aciel mana dwøŋ mo tiere da gïï pinyi apaar kurriiø mo otïïö ni caala dhäk.

¹⁶ki dääe, ka akaape, ki gïï wø lääm rïŋ wøk ki ge, ki wïth jap tïïc bëët mo paac. 'Ba Kuram-abi gïïögø bëët atïïe ka nywïënyö ma jwïël mo othoodhø jï nyeya ma Cølöman kiper Øt Wuuö Jwøk.

¹⁷'Ba nyeya ma Cølöman japøgø bëët atïïe nee tïïc ni thiia yïth odhöönhe mo yïthge okølø yi Goor Jördan yïthakic Cuköt ki Jereda.

¹⁸'Ba Cølöman jap paac moøgøøni atïïe ni thööth døc, ni ö kwään rumme mo peek mar nywïënyö mana näk jwïël moa tïïc japøgø ki ge ni käri ŋääö këët.

¹⁹'Ba Cølöman thuwø jammi bëët moa en yi Øt Jwøk atïïe, ni beege: tharabëëta man wø waaŋ gïn wø jïye ŋwääi ni met bääte mo dëëre bäre olëënynyö ki warkey, ki tharabëëte mo cïp muunni bäätge moa näk ocwøbø na näk nyuuthe,

²⁰ki gïï wø cuŋ lambae bäätge moa näk tïïc ka warkey mana tøŋ, ge ki lambae moge, kiper nee bëëtge ni liel nyïm thääŋ øtø mana en kur keere na pere leth ki yi jöö mana näk okäl wøk kiperge,

²¹ki gïï mo caala wïth jenni mo oŋøøk, ki lambae, ki dïkwänynye mo maac mo tïïc ka warkey mana tøŋ døc;

²²ki jap wø 'näk lambae ki ge, ki kuure, ka apät, ka athääe mo wø käär mäc ki ge, ni gïïögø bëët tïïc ka warkey mo tøŋ; ko odhuule mo Øt Jwøk, ni beege odhuulu mar thääŋ øtø mana en kur keere na pere leth, ko odhuul dhi Øt Jwøk man wø døny yie ki gø na en thääŋ øtø mana en kur keere. 'Ba odhuule moøgø bëët tïïe ka warkey.