Read anuak 2 Luup Nyeye 5 Bible Online

2 Luup Nyeye 5 - anuak bible

2 Luup Nyeye 5

¹'Ba jammi bëët moa tïïc Cølömanni kiper Øt Wuuö Jwøk athum ki tïïc. Ni ö Cølömanni ni käl jammi moa näk ocïp wänni ma Deebit kur keerge na mo Jwøk, ni beege gwet-bïrö, ki warkie, ki jammi møga bëët moa perge leth, ni kïth geni yïth uut kän jammi mo Øt Jwøk.

²Køøre Cølöman jø døøk Icriel, ki dïbwöthe mo wïth tuŋi bëët, ki dïbwöthe mo dhøk uudi mo jø Icriel acooŋ yi Jerucalem, kiper na acanduk man wø nyooth luumma tuut Wuuö Jwøki ki jiy nee øømge yi Pääny Deebit, ni beeye Dhayan.

³'Ba jø Icriel bëët rege acooŋge buut nyeya ma Cølöman, ni beeye yïth nïne mo ajwöma man wø tïïc ki dwää abïriiø.

⁴Kanyøgønø jø døøk Icriel bëët gena öö, ni ö jø tuuŋ Libay ni lwørge acanduk mar Wuuö Jwøk,

⁵ni kälge acanduk manøgø, ko oduŋkaara man wø røøm Wuuö Jwøki yie ki jiy, ki jammi bëët moa no ocïp kur keerge na en yo oduŋkaara; ni ö dïlämme ki jø tuuŋ Libay ni kälge gïïögø yi Øt Wuuö Jwøk.

⁶'Ba nyeya ma Cølöman ki lwaa Icriel bäre moa näk rege ege cooŋ buute nyïm acanduk, gena cïpö ko olämme, ni beege dïëk ki dhäk mo thööth mo ba løny ki kwaan.

⁷Kanyøgø dïlämme acanduk man wø nyooth luumma tuut Wuuö Jwøki ki jiy akälge kare yi thääŋ Øt Jwøk mana en tääŋtiel, ni beeye thääŋ øtø mana en kur keere na pere leth; ni cïpge gø tiet bwöp gïïa no otïïö ni caala nyïïatwiet maal mo wø cwøl ni kirubëlli.

⁸'Ba kirubëlli bwöpge otïïö no opeerø bäät kanya en acanduki yie, ni ö bwöp kirubëlli ni bëëtge maal, na acanduk ki jenni moa kääri ki geni ege rïëbö.

⁹'Ba jenni moøgø bäyö døc, ni wïthge løny ki man neeni ni dhaanhø cuŋŋa thääŋ øtø mana en kur keere na en nyïm thääŋ øtø mana en kur keere na pere leth, 'ba ge ba løny joot ki wøk; 'ba ge poot nut kaace këël dïcäŋi en.

¹⁰'Ba ya acanduk manøgø bäŋ gïrpiny yie, 'ba beege opäp kïte moa na ariiø keerge moa cïp Modhe yie kanya en tier Kïn Körëp, ni beeye kanya ö Wuuö Jwøki na tude yie ki luubö ki jø Icriel kanya öge wøk ki yi ŋööm Ijep.

¹¹Køøre dïlämme aö wøk ki kanya en kur keere na pere leth. 'Ba dïlämme bëët moa en kaace dëëtge ege nø cïp kur keerge na mo Wuuö Jwøk, ni bäŋ dhaanhø mo cädö kiper dhøk mana en yie.

¹²'Ba jø wär dudi bëët mo jø tuuŋ Libay, ni beege Acaap, ki Ëman, ki Jeduthun, ki wäätge, ki jø tuuŋge, gena cuŋŋö buut gïn wø cïp olämme bääte jï løø kur tuul-cäŋ, ni geno ruyö ka abïïk lïïne mo tar mo mïërö, ni ge pöödö ki thøp-othïënhö ki thøme mo wø pwöt ni di roodø, ka athiliiŋŋi, ni dïlämme ma dïpa ki pïërariiø ge kudhö ki tuŋi.

¹³'Ba kanya ö jø kooth tuŋi ki jø wär dudi ni tïŋge döötge maal na yie aciel ni ge dwøga pwøc ka ajiem jï Wuuö Jwøk, kanya wärge ni tuŋi ka athiliiŋŋi ki jap dööti ma teeŋi di pwödö ni ge pwøya Wuuö Jwøk ni köge, ni «Bee eni ni beer, kiper mëër mare bëëdö na bäre bäre ni ba jøøl,» Øt Wuuö Jwøk aput pääŋö ki pöölö.

¹⁴Kanyøgø kär løny jï dïlämme këët ki man cuŋge nee tïïc marge tïïcge kiper pöölö mana en yi øtø, kiper ajiem mar Wuuö Jwøk Øt Jwøk ee päŋö bäre.