Read anuak 2 Luup Nyeye 7 Bible Online

2 Luup Nyeye 7 - anuak bible

2 Luup Nyeye 7

¹'Ba kanya ö Cølömanni na lønye ki lam, maac aput öö ki maal ni thöör olämi man wø waaŋ bäre ki teeŋ olämme møga; ni ö ajiemmi mar Wuuö Jwøk ni pääŋ yi øtø.

²Kanyøgø kär løny jï dïlämme këët ki man dønyge yi Øt Wuuö Jwøk, kiper ajiem mar Wuuö Jwøk, Øt Wuuö Jwøk ee päŋö.

³'Ba jø Icriel bëët, kanya jootge maac ni öö ki maal na ajiem mar Wuuö Jwøk dudö bäät øtø, cøŋge akëëlge piny dï kal nyïm øtø, ni kuulge wïthge piny yïth ŋøøm, ni wøørge Wuuö Jwøk ni pwøcge gø ni ge köö, ni «Ka adïëri møn, Wuuö Jwøk beer, ni mëër mare ni wø ba jøøl bëëdö na bäre bäre.»

⁴Køøre nyeya ma Cølöman ki jiy bëët gena put cïpö ko olämme nyïm Wuuö Jwøk.

⁵Nyeya ma Cølöman acïpö ko olämme mo dhäk ma kume ma pïërariiø kurriiø, ki dïëk ma kume ma dïpa ki pïërariiø; ni ö nyeya ki jiy bëët ni putge Øt Jwøk cïp kur keere na mar Jwøk.

⁶'Ba dïlämme cuŋŋö kwörge, ni jø tuuŋ Libay ge pwøya Wuuö Jwøk ki jap dööti moa tïïc nyeya ma Deebit kiper dwøk pwøc jï Wuuö Jwøk, kaa wara pwøc Wuuö Jwøk ki ge ni eni köö, ni «Mëër mar Wuuö Jwøk ni wø ba jøøl bëëdö na bäre bäre.» 'Ba ki løøk maya dïlämme møga ge bëëdö ni ge kudhö ki tuŋi, ni dhaanh Icriel bäre bëëdö ni cuŋŋö.

⁷'Ba kanyøgø Cølöman thääŋ dïkal mana en dïër na en nyïm Øt Wuuö Jwøk acïp kur keere na mar Jwøk, ni cïp yi gø ko olämme mo wø waaŋ bäre, ki dwäälö mar olämme mo wø duunni ki mëër, kiper gïn wø cïp olämme bääte mana näk tïïc ka nywïënyö ma jwïël na tïïe atïmö ni thiinh ki man cïp olämme moøgø bëët bääte, ni beege olämme mo wø waaŋ bäre, ko olämme mo beel, ki dwäälö mar olämme mo wø duunni ki mëër.

⁸'Ba kar kaaca, Cølöman Ajwöma Man Wø Wøør Ki Yïth Abïle aputge wøør ki nïne abïriiø ki jø Icriel bëët, ni beeye acooŋ lwaa dhaanhø mo päl mana no oöö bäre ki Libö-Amath na en jï løø wï-piny këël mana këët waŋ Naam Ijep na en jï løø tier-piny.

⁹'Ba kanya cïpge gïn wø cïp olämme bääte kur keere na mar Jwøk ege nø wøør ki nïne abïriiø, ni cäŋge Ajwöma Man Wø Wøør Ki Yïth Abïle wøørrø ki nïne abïriiø møøk. 'Ba na tïme na ri bäc nïne mar ajwöma, gena jïtö ka acooŋa mo ena kur keere.

¹⁰'Ba na tïm nïr dwää abïriiø na pïërariiø kurdäk, Cølöman jiy awëëk døøn mïëcge ki kanynyø ki met cwïny mo dwøŋ, kiper jammi moa beyø bëët na tïïc Wuuö Jwøki jï Deebit ki Cølöman ki jï jiye ma jø Icriel.

¹¹'Ba kanya ö Cølömanni na thöör Øt Wuuö Jwøk ki øt nyec mare ki geer, ni jammi bëët moa näk ee caarø ki cwïnye ni di tïïö yi Øt Wuuö Jwøk ki øt nyec mare ee thöörö bëët ki tïïc na karge,

¹²Wuuö Jwøk ree anyoodhe jï Cølöman ki wäär, ni kööe jïgø, ni «Aani, lam marï awïnynya; ni kany yaa jierø kipera nee bëëde na øtø man wø cïp olämme yie.

¹³«'Ba ni näk mo maal yaa cïëgö ni tïm køthi ni bäŋgø, wala ni näk mo bäänyö yaa köömmö ni öge ni raanyge ŋöömö, wala a jääŋŋa täw mo raac bäät jiya,

¹⁴jiya mo wø cwøl ri nyeŋŋa ni näk mo dëëtge dwøkge piny ni mwöl, ni lämge, ni manyge aani, ni wecge jïëdhi moge na reyø, aani döötge wïnynya wïnynyö ki maal, ni wëënna raay moge, ni dwøga paac marge kare.

¹⁵Ennø, a bëëdö ni nyeŋŋa yaa jabø ni ö ïdhi 'moa ni bëëtge ni yaa ciiø kiper lam man wø lam kany.

¹⁶Kiper ennø, øtø man yaa jierø ni nø cïba gø kur keere na mara nee nyeŋŋa bëëde ree na bäre bäre, naa raŋŋa gø cooth ni cwïnya ena baŋe.

¹⁷«'Ba ïïni, ni näk miï bëëdö niï tïïya adïëri nyïma kaawat mana tïïc wäru ma Deebit, ni tïïyï jammi bëët moa köömma ïïni ki ge, ni gwøgï ciik 'moa ki luup ŋøl 'moa,

¹⁸aani, tier nyec marï këëlla piny ni teek, kaawat mana caana gø jï wäru ma Deebit, ni kööa, ni ‹Ï ba cännï ki dhaanhø mo tïmö na nyeya man käär Icriel.›

¹⁹«'Ba ni näk mo ïïni ki jø Icriel nyïmmu you løø wøk ni weyu luup 'moa ki ciik 'moa na köömma uuni ki ge, ni cou ni tïnynyu juu møøk ni lammu geni,

²⁰aani, u cööda wøk yïth ŋøøm 'moa moa cïba jïïu, ni ö øtø man ni yaa cïp kur keere kiper nyeŋŋa en, ni leeŋa gø wøk nyïma, ni tïïa gø na gïn ŋäät ree, na gïr waac yïthakic wïth juurre bëët.

²¹Øtø man ni nyeŋŋe owïnyö en, jiy bëët moo cør deŋŋe yïthge othäŋŋi ni köge, na ‹?Aperŋø na ö Wuuö Jwøki na tïïc gïn dëër ŋöömö man ki øtø man?›

²²Køøre oløk jiyi ni köge, ni ‹Beeye kiper mana wecge Wuuö Jwøk, Jwø kwäcge, na käl geni wøk ki yi ŋööm Ijep, ni cige ni ŋiicge rege ki juu møøk ni lamge geni, ni tïnyge geni. Kiper manøgønø, beeye tiere na ö Wuuö Jwøki ni kïth gïnögø ni leth enø bäre bäätge.› »