Read anuak 2 Luup Nyeye 9 Bible Online

2 Luup Nyeye 9 - anuak bible

2 Luup Nyeye 9

¹'Ba kanya ö nyijøøa no orøønyø na nyeya mar Cïïba na wïny gïr wïny nyeŋ mar Cølöman, ena ö yi Jerucalem kuna pëëny Cølöman ki pïëc mo teek. 'Ba ena öö ni käädö ki lwaak mo päl ka athïrööle mo tïëdö ki teeŋ gïï wø ŋwääi ni wø tïïc kadø ni met, ki warkey mo päl døc, ki nyeŋ kïte mo mïërö mo perge leth. 'Ba eni kanya pïïe baŋ Cølöman, luup bëët moa en cwïnye acaane jï gø.

²'Ba Cølöman pïëc mo nyijøøgø bëët adwøge jïgø, ni bäŋe aciel mo odhäthö jïre mo käre løø jïgø.

³'Ba kanya ö nyijøøgø na nyeny Cïïba enø na joot leec wïc mar Cølöman, ki øt nyec mana geere,

⁴ki cam man wø cïp nyïme kar cam mare, ki kwör bëëte mo jøøa näk ee cuumö, ki yi jöö man wø tïï jø tïïci moe ki gø ki ruyö marge, ki jiy moe mo wø gap kwøk nyïïomøki jïre ki ruyö marge, ko olämme mo wø waaŋ bäre mo wø cïbe Øt Jwøk, doo thøw ki thäŋ ec.

⁵Køøre nyijøøgø aköö jï nyeya ma Cølöman, ni «Luup moa wïnynya naa ena yi ŋöömö mara kiper tïïe moï ki leec wïc marï beege karge.

⁶'Ba aani, a kär jïëy ki luup moa wïnynya këël mana ööa en ni jooda gø ki waŋa. Raŋï, leec wïc marï man bäre ni dwøŋ en, këël thääŋŋe kär caanø jïra. 'Ba ïïno pöödhö døc ni kaala mana wïnynya kiperï.

⁷A met ec mo nyïëdi ni en jï jiy moï ki jiy moa näk iï cuumö ni wø en buutï cooth, ni wø wïny luup mo wø caanï ki køør leec wïc marï!

⁸'Ba pwøc en jï Wuuö Jwøk, Jwøk marï, na yie mïnnö ki ïïni na cïp ïïni bäät wälu mare na nyeya kiper nee eni na Wuuö Jwøk, Jwøk marï, nee tïnynyï. 'Ba Jwøk marï, kiper mana näk eni mëër ki jø Icriel ni manynya man këël tietge piny na bäre bäre, ïïna tïïe na nyeya bäät jø Icriel nee luup wø ŋølï na karge niï tïïya adïëri.»

⁹Køøre nyijøøgø aput cïpö jï nyeya ma Cølöman ki warkey ma rumme ma kikarri ma dïpa ki pïërariiø, ki teeŋ gïï wø ŋwääi ni wø tïïc kadø ni met mo thööth døc, ki nyeŋ kïte mo mïërö mo perge leth mo thööth. 'Ba bäŋ teeŋ gïï wø ŋwääi ni wø tïïc kadø ni met mo okwøŋ käl po nyeya ma Cølöman cøøn mo caala moa käl nyijøøgø na nyeny Cïïba enø jïgø.

¹⁰'Ba jic Kiram ki jic Cølöman moa wara kännö ki warkey ki kanya cwøl ni Öpïr, gena kännö thuwø ki jero cwøl ni algum ki nyeŋ kïte mo mïërö mo perge leth.

¹¹'Ba ki røk jerøgø ni cwøl ni algum yøø, nyeya ma Cølöman atïïö rege ko ogadi mo eth maal ki ge kiper Øt Wuuö Jwøk ki øt nyec mare, ni tïïe thuwø ki thøp-othïënhö ma teeŋi ki røk jerøgø kiper jø wär dudi. 'Ba japa tïïe yøø, bäŋ teeŋge mo okwøŋ joot cøøn yi ŋööm Juuda.

¹²'Ba nyeya ma Cølöman gïïa many nyijøøgø na nyeny Cïïba enø na pëënynye bëët acïbe jïgø ni thööth ni kaala japa käl nyijøøgøøni jïre. Køøre nyijøøgø adøø yi ŋöömö mare ki jiy moe.

¹³'Ba warkie mo wø käli jï Cølöman ki yi cwiir cooth, peek marge beege rumme ma kikarri ma dïpe abïciel ki pïërabïciel ka abïciel,

¹⁴ni moa jwäk baŋ jø gath kär kwaan rege. 'Ba nyeye mo Arabe bëët, ki kwääri mo paayø, gena kännö thuwø ki warkie ki gwet-bïrö jï Cølöman.

¹⁵'Ba nyeya ma Cølöman atïïö ki gïï ma dïpe ariiø mo døøŋŋø mo caala kööt leny mo tïïc ka warkey, ni warkey mana tïïc man nø ki gø, peek mare beeye rumme ma cekelli ma dïpe abïciel.[9]

¹⁶Ni tïïe thuwø ki mo therø ma dïpe adäk, mo poot tïïc ka warkey, ni warkey mana tïïc man nø ki gø, peek mare beeye rumme ma cekelli ma dïpe adäk;[10] ni ö nyeya ma Cølöman ni cïp geni yi øtø mana cwøl ni Øt Lur Libaanø.

¹⁷Køøre thuwø nyeya atïïö ki wälu mo dwøŋ døc mo tïïc ka lak liec, ni lëëny dëër gø ki warkey mana tøŋ.

¹⁸'Ba wälu manøgø nyïme okïthö ko ogat mo da kwör tiel abïciel; 'ba da køøm tiel mo ogur ree mo tïïc ka warkey, ni deŋ wälu løøi ki løøi okïthö ki gïï cïp ceŋ bäätge, ni gïï ma ariiø mo caala ŋuuwe otïïö ni cuŋŋö buute løøi ki løøi.

¹⁹'Ba da gïï ma apaar kurriiø mo caala ŋuuwe mo otïïö ni cuŋŋö bäät kwör tiel moa na abïciel, ni bäät kar tielø man nø løøi ki løøi da ŋuu mo cuŋŋö bääte. 'Ba bäŋ teeŋ wälu mo caala manøgø cøøn mo otïïö yi buc nyec mør.

²⁰'Ba gïï wø mäth nyeya ma Cølöman ki ge bëët tïïc ka warkey, ni jap paac bëët moa en yi øtø mana cwøl ni Øt Lur Libaanø tïïc ka warkey mana tøŋ; kiper gwel-bïrö okwaanø na gïn mo bäŋ kare ki yïth nïne moa beet Cølömanni.

²¹'Ba nyeya jïre da baabuure mo naam mo gath mo wø cøøa Tarcëc ki jic Kiram; ni kany wø tïme na køør cwiiri adäk nø, baabuure moøgø wø kännö ki warkey ki gwel-bïrö, ki lak lïëy, ka apøønnanyare, ki bïme.

²²'Ba nyeya ma Cølöman atïmö ni kare dwøŋ døc ni kaala nyeye bëët mo bäät piny ki kwärö ki leec wïc.

²³Ni ö nyeye bëët mo bäät piny ni tïmge ni ge manynya man öge baŋ Cølöman kuna wïnyge luup mo wø caane ki køør leec wïc mare mana cïp Jwøki jïre.

²⁴'Ba jiy bëët mo wø ööi ki yi cwiir cooth, ge käädö ki muuce, ni beege jammi moa näk tïïc ka gwet-bïrö, ki jammi moa näk tïïc ka warkey, ka abïïe, ki jap leny, ki teeŋ gïï wø ŋwääi ni wø tïïc kadø ni met, ko okwëënyi, ki gääŋŋe.

²⁵'Ba Cølöman jïre da lwääge mo yïthge oŋørø na kume aŋween kiper okwëënyi ki jïëth leny mo wø tut okweenynyi, ni jïre da okwëëc leny thuwø ma kume apaar kurriiø; ni kïth møøk yïth päänye mo wø bëët jïëth lenynyi mo wø tut okwëënyi yïthge, ni käl møga buute yi Jerucalem.

²⁶Køøre ena put bëëte ni nyeye bëët ena tiere ki mana täge ki Naam Upareeti këël mana këët yi ŋööm jø Pilitin, ni pïïe waŋ keew ki jø Ijep.

²⁷'Ba nyeya ma Cølöman gwet-bïrö atïïe ni thööth døc yi Jerucalem ni caala kïte, ni tïïc jenni moa perge leth ni thööth jaak kaamar olämmi mo tuya yi gool.

²⁸'Ba jiy wø kännö ko okwëënyi jï Cølöman ki Ijep ki yïth mïëri bëët.

²⁹'Ba jammi møga bëët moa tïïc Cølömanni ki mana täge këël aŋuudi marge, ogöörö yïth luup mo nyikuŋ Jwøk ma Nathan, ki yïth luup moa göör nyikuŋ Jwøki ma Akiya nyï Cëëlö, ki yïth luup mo Idö ŋat wø joot jammi ki køør man wø nyooth Jwøki jïre na wara cäänö kiper Jeröbäm o Nebat.

³⁰'Ba Cølöman abëëdö na nyeya ki cwiiri ma pïëraŋween yi Jerucalem bäät Icriel bäre.

³¹Køøre Cølöman athøw ni läp køør kwäcge, ni koonyi yi pääny wänni ma Deebit; ni ö wääde ma Reeyöböm ni läw kar gø na nyeya.