Read anuak Edhera 1 Bible Online

Edhera 1 - anuak bible

Edhera 1

¹'Ba na tïme na yi cwiir mana dïkwøŋ[1] mana beet Kiröci nyeny Parca yi Babiløn, Wuuö Jwøk kiper nee luubö mana caane ki dhi nyikuŋ Jwøk ma Jeremaya thur kare, eni yi Kiröc nyeny Parca atheŋe, nee jääk dï paac mare bäre ki dwøl, ni dwøl manøgø thuwø, ogöör piny na ennønø:

²ni «Man beeye dwør Kiröc nyeny Parca, ena köö, ni ‹Wuuö Jwøk, Jwø maal, mïëri moa en bäät piny bëët anø cïbe jïra, ni nø tïïc aani nee eni gëënna ki øtø yi Jerucalem, na en Juuda.

³'Ba ennø, ŋat ma dhaanh Wuuö Jwøk mo ena dïïu kaagø, beerra man ö Jwøki marge ni bëëde ki eni, ni ö eni ni ci Jerucalem na en Juuda, ni cäŋ Øt Wuuö Jwøk, Jwø Icriel, geerrø, eni na Jwøk ni wø bëëdö Jerucalem.

⁴'Ba kanyo en dhaanh Wuuö Jwøki yie jaak, beerra man ö jø kaace ni kønyge eni ki warkey, ki gwel-bïrö, ki jammi, ki lääc paac; ni mëëtge bäät japøgø ki muuce møøk mo cïpge ka met ec kiper Øt Wuuö Jwøk ni en Jerucalem.› »

⁵Køøre dïbwöthe mo wïth tuŋi mo tuuŋ Juuda ki mo tuuŋ Benjamen, ki dïlämme, ki jø tuuŋ Libay, ge na yïthge theŋ Jwøki nee cige nee Øt Wuuö Jwøk ni en Jerucalem cäŋge geerrø, rege ajiiŋge kiper wääth.

⁶Ni ö jøøa enge buutge ni kønyge geni ki warkey, ki gïï mo tïïc ka gwel-bïrö, ki teeŋ jammi møøk, ki dhäk, ki jammi mo perge leth; ni cïpge thuwø ki muuce møøk mo cïp ka met ec.

⁷'Ba Kiröc nyeny Parca jammi mo Øt Wuuö Jwøk, moa twier Nabukedenecörri Jerucalem na kïth yi øt juu moe, akäl wøk.

⁸'Ba jammi moøgø käl wøk ni jääŋŋa Mithiredat, ŋat wø kan jammi; ni ö Mithiredati ni kwaan geni jï Cëëcabacar ŋat ma wïth jø Juuda.

⁹'Ba japøgø ki kwäänge beege ii: Athääe ma pïëradäk mo tïïc ka warkey; ka athääe ma kuma aciel mo tïïc ka gwel-bïrö; ki teeŋ athääe møøk mo kwäänge pïërariiø ka abïŋween;

¹⁰ki kuure ma pïëradäk mo tïïc ka warkey; ki teeŋ kuure møøk ma dïpe aŋween ka apaar mo tïïc ka gwel-bïrö; ki teeŋ jammi møøk mo kwäänge kuma aciel.

¹¹'Ba jammi bëët moa näk tïïc ka warkey ki gwel-bïrö, kwäänge beege kume abïïc ki dïpe aŋween. 'Ba Cëëcabacar japøgø bëët akäle ki Babiløn ni kïth ge Jerucalem, ni eni aay ka jiy moa näk geno maaø ki tøŋ ki gø na aciel.