Read anuak Edhera 3 Bible Online

Edhera 3 - anuak bible

Edhera 3

¹'Ba kanya ö dwää abïriiø na tääi, ni jø Icriel moøgø geno nø pï piny yïth päänye moge, geni rege acooŋge Jerucalem ni ge cii kaamar dhaanhø aciel.

²Køøre Jøcua wär Jöcëdëk ki dïlämme mo wø tïïö ki eni na aciel, ki Dherubabel o Celatiyal ki tuuŋge, gena ö maal ni tïïcge gïn wø cïp olämme bääte mar Jwø Icriel, kiper nee cïpge bäät gø ko olämme mo wø waaŋ bäre, kaawat mana no ogöörö yi wëël ciik dhaanh Jwøk ma Modhe.

³Ni putge gïn wø cïp olämme bääte manøgø cïp kar gø, ni cïpge ko olämme mo wø waaŋ bäre bäät gø jï Wuuö Jwøk, ni cïpge ka amöölla ka abøøya, ni ge wøøra Jwøk, kiper ge lwär ki juurre moa bëëdö yi ŋöömmögø.

⁴'Ba ki køør mana no ogöörö, geni Ajwöm Yïth Abïle awøørge, ni cïpge ko olämme mo wø waaŋ bäre mo kwäänge ŋäc ki yi cäŋ cooth ki køør ciik, ni beege moa no ocïp piny kiper yi cäŋ man nø.

⁵Køøre aput tïmö ni di cïpö ko olämme mo wø waaŋ bäre cooth, ni di cïpö thuwø kany wø päär dwääyi, ni di cïpö kiper ajwöm mo Wuuö Jwøk moa no ocaanø ni di wøørø na no onø cïp kur keerge. 'Ba ŋat mo yie met thuwø cïpö ko olämi ki met ec jï Wuuö Jwøk.

⁶'Ba ki mana täge ki dïcäŋ mana dïkwøŋ mar dwää abïriiø, geni gena tägö ki man cïpge ko olämme mo wø waaŋ bäre jï Wuuö Jwøk; 'ba kar kaagø, tier Øt Wuuö Jwøk poot kär tääö ki caam ki kïte.

⁷Køøre gena cïpö ki gwel jï jø wø ŋäc geer ki kïte, ki jï dïjëëth opämi; ni cïpge ki cam, ki jap wø maath, ki maaw jï jø Caydan ki jï jø Tayar, kiper nee ge känge ki jenni moa perge leth ki yi lur Libaanø ni kälge geni Jøpa ki yi naama dwøŋ, ki køør mana ö Kiröci nyeny Parca ni cïp gø jïge ni ŋutge ki jen.

⁸'Ba kanya tïme na ri riet cwiiri mana öge kanya en wï Øt Jwøki yie yi Jerucalem, ri dwää ariiø, Dherubabel o Celatiyal ki Jøcua wär Jöcëdëk, ki jø poge møga, ni beege dïlämme, ki jø tuuŋ Libay, ki jiy bëët moa mak ki tøŋ na duu Jerucalem, gena tägö ki man tïïcge Øt Jwøk; ni kwany jø tuuŋ Libay ni gena jø raŋ tïï Øt Wuuö Jwøk, ki mana täge ki ŋat mo cwiiye pïërariiø këël kunece.

⁹Køøre Jøcua ki wääte ki tuuŋge, ki Kadmiël ki wääte, ni beege nyïïkwaac Odawïya, gena dwätö na aciel nee tïï øt Jwøk en ceŋge. 'Ba ge tïïö ka jø tuuŋ Libay moa käl ri dhi øt Ënadat.

¹⁰'Ba kanya ö jø geerri na thöörge tier Øt Wuuö Jwøk ki caam ki kïte, dïlämme gena cuŋŋö na abïïe moge ena dëëtge ni ge kudhö ki tuŋi, ni ö nyïïkwaac Acaap na käl ri jø tuuŋ Libay ni tuuŋge athiliiŋŋi, ni ge pwøya Wuuö Jwøk ki køør dwøl mana caan Deebiti nyeny Icriel.

¹¹Ni wärge ki dudi, ni ge pwøya Wuuö Jwøk, ni ge dwøga met ec jïre, ni köge, ni «Wuuö Jwøk beer, ni mëër mare ni wø ba jøøl bëëdö bäät jø Icriel na bäre bäre.» Ni ö jiyi bëët ni kwöŋge ni döötge ena maal døc kanya pwøcge Wuuö Jwøk kiper mana ö tier Øt Wuuö Jwøk na thume ki caam ki kïte.

¹²'Ba jiy mo thööth røk dïlämme, ki jø tuuŋ Libay, ki dïbwöthe mo wïth tuŋi, ni beege jø døøŋŋe moa näk Øt Jwøk mana dïkwøŋ ege joodø, gena jwöŋö døc ni döötge ena maal kanya jootge tier Øt Jwøk no othum ki caam; 'ba jiy møga gena kwöŋŋö ki met ec.

¹³Ni bäŋe ŋat mo oløny jïre ki man ŋec dööt jiy moa kwöŋŋö ki met ec ki dööt jiy moa jwöŋö, kiper jiy kwöŋŋö døc, ni dööt jiy wïnyö kany mo bäär.