Read anuak Edhera 7 Bible Online

Edhera 7 - anuak bible

Edhera 7

¹'Ba ki køør cwiiri mo thööth, kanya bëët Arthëkcic ni ena nyeny Parca, da dhaanhø mo cwøl ni Edhera, Edhera o Ceraya, Ceraya wär Adhariya, Adhariya o Kilkiya,

²Kilkiya o Calum, Calum o Dhadök, Dhadök wär Akitöp,

³Akithöp wär Amariya, Amariya wär Adhariya, Adhariya nyikwaar Merayöt,

⁴Merayöt o Dheraya, Dheraya wär Udhi, Udhi o Buki,

⁵Buki wär Abicua, Abicua o Piniac, Piniac wär Eliedhar, Eliedhar wär Aran, ni bee eni na dïlämi mana dïkwøŋ na dwøŋ.

⁶Edhera manøgø atïŋŋö Babiløn ni cøøa Jerucalem. Eni, ena dïpööy, mo ciik Modhe na cïp Wuuö Jwøki, Jwø Icriel, ee kwanyø døc. Køøre nyeya jammi moa many Edhera bëët acïbe jïre, kiper Edhera cer Wuuö Jwøk, Jwøk mare, ena bääte.

⁷'Ba jø møøk røk jø Icriel, ki dïlämme møøk, ki jø dhi øt Libay møøk, ki jø møøk røk jø wø wär ki dudi Øt Jwøk, ki jø møøk røk jø wø koor dhøk kal mar Øt Jwøk, ki jø møøk røk jø wø tïïc tïïe moa therø Øt Jwøk, gena ci Jerucalem ki Edhera na aciel kanya tïme na ri bïriet cwiiri moa beet Arthëkcic ni ena nyeya.

⁸Køøre Edhera apïï Jerucalem ri bïï dwäde, kanya tïme na bïriet cwiiri moa beet Arthëkcic ni ena nyeya.

⁹Kiper ena tïŋŋö Babiløn ni nïr dwääy mana dïkwøŋ aciel, ni pïïe Jerucalem ni nïr dwää abïïc aciel, kiper cer Jwøk mare na beer ena bääte.

¹⁰Kiper Edhera cwïnye ee nø cïp køør ciik mo Wuuö Jwøk nee kwanye nee kïth bäät tïïc, nee ciik Wuuö Jwøk ki luup ŋøl moe nee pööe ki ge dï Icriel.

¹¹Man beeye dwøl mar nyeya ma Arthëkcic mana gööre na cïbe jï dïlämi ma Edhera, ni beeye dïpööy mana näk ciik Wuuö Jwøk ki gïïa ceme na cïbe jï jø Icriel ee kwanyø døc. Ena köö,

¹²ni «A na nyeya ma Arthëkcic, a na wïth nyeye bëët, a göönna baŋï, ï na dïlämi ma Edhera, ï na dïpööy mar ciik Jwø maal; bëëdï ki bëët-mëër ma kare.

¹³«'Ba ennø, aana kän wøk ki dwøl, nee jø Icriel ki dïlämme moge ki jø tuuŋ Libay moa en paara mo yïthge met ki man cige Jerucalem, nee aacge ki ïïni.

¹⁴Aani ki jiy moi na abïriiø ii ni wø køny aani ka acaara, ï jääŋwa kaper nee bëët jiy moa en Jerucalem ki moa en dï Juuda bäre neenï ki køør ciik mo Jwøk marï, moø en cerï yøø,

¹⁵nee warkey ki gwel-bïrö kälï, mana cïba ki met ec, wa ki jø wø køny aani ka acaara, jï Jwø Icriel ni wø bëëdö Jerucalem.

¹⁶Ni kälï warkie ki gwet-bïrö bëët moo jootï yïth mïëri mo jø Babiløn, ki muuce moa cïp jiyi ki dïlämme ki met ec marge, na cïpge ni yïthge met kiper øt Jwøge ni en Jerucalem.

¹⁷'Ba gwel moøgø, ni beege warkey ki gwel-bïrö, ŋeewï ŋeeø na kare ki rwädhe, ki nyöök rööm, ki nyïï rööm, ki beel ki køøŋ nyïïomøki mo wø cïp na aciel ki lääy moøgø; ni cïpï geni bäät gïn wø cïp olämme bääte mar Øt Jwøk, Jwøk maru, ni en Jerucalem.

¹⁸Ni gïno beer ki jïrï ki jï nyïïmëëgu ma jø Juuth wär tïïyï ki warkey ki gwel-bïrö mano dööŋ, ni tïïyï ka køør mano many Jwøki maru.

¹⁹Ni ö jap paaci moa cïp jïïu kiper tïïc mar Øt Jwøk, Jwøk marï, ni kälu ge yi øtø bëët nyïme, eni na Jwø Jerucalem.

²⁰Ni jammi moo dööŋ noo manynyi kiper Øt Jwøk, Jwøk marï, wär käl wøk ki røk gwet akwöma.

²¹«'Ba aani, a na nyeya ma Arthëkcic en, dwøl man cïba jï jø wø kan gwel moa bëëdö paac mana cwøl ni Løø Naam Løøga beeye en: Uuni, gïno many dïlämi ma Edhera baŋu, eni na dïpööy mar ciik Jwø maal, wär cïp jïre na kare,

²²ni beege gwel-bïrö mo peek mare pïï ri rumme ma dïpa mo røm ka rumi mana cwøl ni kikar,[11] ki beel mo pïï ri rumme ma dïpa mo røm ka rumi mana cwøl ni kör, [12] ki køøŋ nyïïomøki mo pïï ri rumme ma dïpa mo røm ka rumi mana cwøl ni baath,[13] ki maaw mo pïï ri rumme ma dïpa mo røm ka rumi manøgø, ka acäbö mano manynyi jaak.

²³Ni gïn wø caan Jwø maalli jaak kiper Øt Jwøk, wär put tïïc ni cwïny owëëk eni, kiper nee wëëc Jwøk ba pïïe bäät paac mara bäre, ki ri wääta, a na nyeya.

²⁴Waani thuwø wa caana gø jïïu ni kär dee ajwäk mo di cwølø bäät dïlämme ki jø tuuŋ Libay, ki jø wø wär ki dudi Øt Jwøk, ki jø wø koor dhøk kal mar Øt Jwøk, ki jø wø tïïö Øt Jwøk, ki jø tïïc møøk mo wø tïïö Øt Jwøk.

²⁵«'Ba ï na Edhera en, ki køør leec wïc manø ni en baŋï enø, na cïp Jwøki marï jïrï, kwänyï ki jiy mo käär paac, ki dïŋut luup, kiper nee luup jiy bëët mo wø bëëdö paac mana cwøl ni Løø Naam Løøga ŋølge, ni beege jiy bëët moa ŋäc ciik mo Jwøk marï. 'Ba jø wø kuc ciik moøgø wär pwönynyï.

²⁶'Ba ŋato ba gwøk ciik mo Jwøk marï, ki ciik 'moa, a na nyeya, eni di jäälö ka ajäla ma kare, nee ŋøla thøø bääte, wala eni di riemmø paac, wala jape di camø, wala eni di twöö.»

²⁷'Ba Edhera aköö, ni «Pwøc en jï Wuuö Jwøk, Jwø kwäcwa, na cïp luummögø cwïny nyeya, nee Øt Wuuö Jwøk ni en Jerucalem jïte ka ajiem,

²⁸ni ö eni na Wuuö Jwøk na meet mëër mare ni wø ba jøøl ni päl bääta nyïm nyeya ki nyïm jø wø køny nyeya ka acaara, ki nyïm jø kööre moe moa teek. 'Ba Wuuö Jwøk, Jwøk mara, aana mooe ki teek ni bëët cere ni ena bääta; ni cooŋa dïbwöthe røk jø Icriel nee aacge ki aani.»