Read anuak Edhera 8 Bible Online

Edhera 8 - anuak bible

Edhera 8

¹'Ba moi beege nyeŋ dïbwöthe mo wïth tuŋi, ki nyeŋ kwäcge moa kälge dëëtge, jøøa tïŋŋö Babiløn ni ge cäädhi ka aani na aciel, a na Edhera, ri nïne moa beet Arthëkcic ni ena nyeya.

²Ki ri nyïïkwaac Piniac, beeye Gërcöm; ki ri nyïïkwaac Itamer, beeye Daniel; ki ri nyïïkwaac nyeya ma Deebit, beeye Atuc nyikwaar Cekaniya;

³ki ri nyïïkwaac Paröc, beeye Dhekaraya ki jiye ma cwøw ma dïpa ki pïërabïïc mo nyeŋge ogöör piny;

⁴ki ri nyïïkwaac Paath-Möap, beeye Eliyönay o Dheraya ki jiye ma cwøw ma dïpe ariiø;

⁵ki ri nyïïkwaac Dhatu, beeye Cekaniya o Jadhiël ki jiye ma cwøw ma dïpe adäk;

⁶ki ri nyïïkwaac Adin, beeye Ebet o Jönathan ki jiye ma cwøw ma pïërabïïc;

⁷ki ri nyïïkwaac Ilam, beeye Jicaya wär Athaliya ki jiye ma cwøw ma pïërabïriiø;

⁸ki ri nyïïkwaac Cepathiya, beeye Dhebadiya o Mikaël ki jiye ma cwøw ma pïërabära;

⁹ki ri nyïïkwaac Jöap, beeye Øbadiya o Jikiël ki jiye ma cwøw ma dïpe ariiø ka apaar ka abära;

¹⁰ki ri nyïïkwaac Bani, beeye Cëlömith o Jöcipiya ki jiye ma cwøw ma dïpa ki pïërabïciel;

¹¹ki ri nyïïkwaac Bëbay, beeye Dhekaraya o Bëbay ki jiye ma cwøw ma pïërariiø ka abära;

¹²ki ri nyïïkwaac Adhigad, beeye Jöanan wär Akathan ki jiye ma cwøw ma dïpa ka apaar;

¹³ki ri nyïïkwaac Adönikam, beege Elipelet, ki Juël, ki Cemaya, ki jicge ma cwøw ma pïërabïciel. 'Ba jøøgø beege nyïïkwaac Adönikam moa öö na aŋuudi.

¹⁴Ki ri nyïïkwaac Bigway, beege Uthay ki Dhakur, ki jicge ma cwøw ma pïërabïriiø.

¹⁵'Ba a na Edhera, jøøgø acooŋa kanya ciel bäät naama näk kwöta kanya cwøl na Awaa, ni bëëtwa kaace ki nïne adäk. 'Ba kanya raŋŋa dëët jøøgø døøc ki dëët dïlämme, bäŋ jø tuuŋ Libay mo yaa joodø kaace.

¹⁶Køøre aana jääk baŋ dïbwöthe, ni beege Eliëdher, ka Ariël, ki Cemaya, ki Elnathan, ki Jarip, ki Elnathan, ki Nathan, ki Dhekaraya, ki Meculam; ki baŋ dïpööye moa wïthge leer, ni beege Jöyarip ki Elnathan.

¹⁷Ni jääŋŋa geni baŋ Idö dïbwödhi mana bëëdö kanya cwøl ni Kacipiya; ni caana gïno caange jï Idö ki tuuŋge ki jiy mo otïïc tïïe moa therø Øt Jwøk ni wø bëëdö Kacipiya, kiper nee känge baŋwa ki jø tïïc moo tïïö Øt Jwøk, Jwøk marwa.

¹⁸'Ba kiper mana bëët cer Jwøki marwa na beer bäätwa, jøøgø akän baŋwa ki dhaanhø mo wïïe leer mo cwøl ni Cërëbiya, mo käla ri nyïïkwaac Maali nyikwaar Libay wär Icriel, ni eni ööi ka wääte ki tuuŋge, ni kwäänge bëët beege jiy apaar ka abära.

¹⁹Geni thuwø Acabiya ki Jicaya mo käla ri nyïïkwaac Mërari akälge ki tuuŋge ki wäätge, ni kwäänge bëët beege jiy ma pïërariiø;

²⁰ki jiy ma dïpe ariiø ki pïërariiø moo tïïc tïïe moa therø Øt Jwøk, jøøa kwäcge kwany Deebiti ki jø kööre moe nee jø tuuŋ Libay kønyge ki tïïc, ni jøøgø bëët nyeŋge ogöör piny.

²¹Kanyøgø kanya enwa bäät naam Awaa, aana cïpö ki dwøl kiper nee jøw ba cämge, nee rewa dwøkwa piny nyïm Jwøk marwa ni wa kwaya eni kiper nee waani ko obwöre mowa ki jammi mowa bëët gwøe waŋjöö.

²²Kiper aani wïïa laay ki man kwaa nyeya nee cïpe ki dëëci ki jø leny mo wø cäädhi ki bäät okwëënyi nee wa gwøkge øtjöö cer nyïïmän, kiper waano nø köö jï nyeya, ni «Cer Jwøk marwa ena bäät jiy bëët mo wø many eni; 'ba teek mare ki wëër mare nyoodhe nyoodhø bäät jiy bëët mo wø wec eni.»

²³Kanyøgø waana bëëdö ni wa kär cämö ni wa kwaaya Jwøk marwa kiper luummögø, ni ö eni ni wïny kwac marwa.

²⁴Køøre aani, jiy apaar kurriiø røk dïlämme moa kwörge døøŋŋø acïba kur keere, ni beege Cërëbiya ka Acabiya ki jiy apaar ma tuuŋge.

²⁵Ni røma warkey ki gwel-bïrö ki jap paac jïge, ni beege muuce moa cïp nyeya, ki jø wø køny eni ka acaara, ki jø kööre moe, ki jø Icriel bëët moa en kaace kiper tïï Øt Jwøk.

²⁶Ni peek gwel-bïrö mana røma jïge beeye rumme ma dïpe abïciel ki pïërabïïc, ni peek jap paac moa näk tïïc ka gwel-bïrö beeye rumme ma dïpa, ni peek warkey beeye rumme ma dïpa,

²⁷ki kuure ma pïërariiø mo tïïc ka warkey mo kar gwel ma kuma, ki jap paac ariiø mo tïïc ka nywïënyö ma jwïël mo tøŋ mo paŋŋi, mo pere leth ni caala warkey.

²⁸'Ba aana köö jïge, ni «Uuni, uuna cïp kur keeru jï Wuuö Jwøk, këël jap paac moi thuwø. Ni warkie ki gwet-bïrö moi thuwø beege muuce moa cïp ki met ec jï Wuuö Jwøk, Jwø kwäyu.

²⁹Uuni, raŋŋu geni døøc, ni gwøgu geni këël kanyo pïïyu Jerucalem nou rømmu geni nyïm dïlämme moa kwörge døøŋŋø, ki nyïm jø tuuŋ Libay, ki nyïm dïbwöthe mo wïth tuŋi mo jø Icriel yïth uudi moa therø moa no orep dëër Øt Wuuö Jwøk.»

³⁰Køøre dïlämme ki jø tuuŋ Libay warkey ki gwel-bïrö ki jap paac moa røm jïge alwørge nee kïthge Jerucalem yi øt Jwøk, Jwøk marwa.

³¹'Ba kanya tïm nïr dwää acielli na apaar kurriiø, waana tïŋŋö bäät Naam Awaa, ni wa døøa Jerucalem. 'Ba cer Jwøk marwa ena bäätwa, ni ö eni ni piem waani cer nyïïmän ki ceŋ jø wø møør piny øtjöö.

³²'Ba kanya pïïcwa Jerucalem, rewa ajwömwa ki nïne adäk.

³³'Ba kanya tïme na ri ŋweer nïne, warkie ki gwet-bïrö ki jap paac arøm yi Øt Jwøk, Jwøk marwa, ni cïbi cer dïlämi ma Merëmöt wär Uria, ni Eliedhar o Piniac nutö buute, ni jø tuuŋ Libay, ni beege Jödhabat o Jëcua, ki Nöadiya o Binuy nutö buutge thuwø.

³⁴Ni ö jammi moøgø bëët ni kwaani ni rømi, ni put peek moge göör piny.

³⁵Kar kaagø, jø Juuth moa duuö ki Babiløn, na mak ki tøŋ, gena cïpö ko olämme mo wø waaŋ bäre jï Jwøge na näk Jwø Icriel, ni beege rwädhe apaar kurriiø kiper jø Icriel bëët, ki nyöök rööm ma pïërabïŋween ka abïciel, ki nyïï rööm ma pïërabïriiø ka abïriiø, ni cïpge ki nyöök atëëe apaar kurriiø ni beege olämme mo wø cïp kiper raay, ni moøgø bëët cïpa jï Wuuö Jwøk no olämme mo wø waaŋ bäre.

³⁶Køøre jøøgø dwør nyeya mana no ogöör piny acïpge jï kwääri moa bëën nyeya, ki jï jøøa en tiet kwääri moøgø ni wø käär mïëri moa en paac mana cwøl ni Løø Naam Løøga; ni ö kwääri moøgø ni kønyge jiy ki tïï Øt Jwøk.