Read anuak Edhera 9 Bible Online

Edhera 9 - anuak bible

Edhera 9

¹'Ba køør gïïögø bëët, dïbwöthe mo jø Icriel aö baŋa ni köge, ni «Jø Icriel, ki dïlämme, ki jø tuuŋ Libay, dëëtge kärge pääŋŋö ki juurre moa bëëdö yi ŋöömmi, mo wø tem gïïa näk ec raac ki ge, ni beege jø Keenan, ki jø Këth, ki jø Përec, ki jø Jeebuc, ki jø Amön, ki jø Möap, ki jø Ijep, ki jø Amör.

²Kiper geni, nyïï juurre møøk akälge ni nywømge ge na mään jïge ki jï wäätge, ni ö kunhnhö marge na en kur keere na mar Jwøk ni put ree jääp ki kunhnhö mar juurre. 'Ba beege dïbwöthe ki jø kööre na no opöödhö ki tïïc manøgø ni raac enø.»

³'Ba kanya wïnynya gïnögø, aani abïïna ka aleeŋŋa mara ajeeya, ni ö jïëc wïïa ki jïëc tïïa ni nywaada ge piny, ni pïïa piny ni yia othäŋŋö.

⁴'Ba aana bëëdö ni aano pï piny ni yia othäŋŋö këël kanya tïme na kany wø cïp olämi mar abøøya yie. Ni ö jiyi møøk ni cooŋge rege buuta, ni beege jøøa dëëtge tïmö ni kwanynyi ki luubö mana caan Jwøki marwa, eni na Jwø Icriel, kanya jootge gïna raac na tïïc nyïïkwaac jøøa mak ki tøŋ na kwøŋ duuö.

⁵'Ba kanya tïme na kany wø cïp olämi mar abøøya yie, aana ö maal ki kanya bëëda yie ni cwïnya opädhö, na abïï mara ka aleeŋŋa mara na jeeya poot ena dëëra, ni këëlla cøŋŋa piny ni thaaŋa ceŋŋa maal baŋ Wuuö Jwøk, Jwøk mara,

⁶ni kööa, «Wui Jwøk, ï na Jwøk mara, aani wïïa laay ki man tïŋa wïïa maal baŋï, ï na Jwøk mara, kiper gïïa bacwa atïmö ni thööth ni kaala wïthwa, ni ö raayi mowa ni thöönhge no okëët maal.

⁷Ki mana täge ki røk nïra beet kwäcwa këël dïcäŋi en, wa bëëdö ni wa tïïö ki raay mo døøŋŋø, 'ba ki køør raay mowa, waani ki nyeye mowa ki dïlämme mowa, waana cïp ceŋ nyeye mo wïth juurre, ni ŋar waani, ni mak waani ki tøŋ, ni twier waani, ni tïm wïthwa ni laay këël dïcäŋi en.

⁸«'Ba ennø, ki kany mo thiinh, ï na Wuuö Jwøk, Jwøk marwa, mëër marï anyoothï, ni weyï waani na mo dööŋ ni kwøw, ni këëllï tietwa piny ki køør øtø marï man ni en kur keere en, nee ï na Jwøk marwa, dëëtwa tïïyï nee nigethïk, ni mooyï waani ki nyi kwøw mo thiinh yi laŋ man bëëtwa yie en.

⁹Kiper waana laaŋe; 'ba këël na bëëtwa yi laŋ, ï na Jwøk marwa, wa kärï wiiø. Mëër marï ni wø ba jøøl anyoothï jïwa ni nëënö jï nyec Parca, ni cäŋï wa mooyø ki kwøw mo nyään, nee øtø marï, ï na Jwøk marwa, cäŋwa geerrø ni dwøkwa kwöra no oränynyö karge, ni mooyï wa ki kany bëëtwa yie ni waano gwøø, ni beeye Jerucalem ki dï Juuda bäre.

¹⁰«?'Ba ennø, ï na Jwøk marwa en, agïnaŋø noo caanwa køør gïn? Kiper waani ciik moï awecwa,

¹¹ni beege ciik moa caanï ki dhøk jiyï ma nyïïkuk Jwøk na köge, ni ‹Ŋöömmögø ni dønynyu yie enø noo lwørru na maru, beeye ŋöömö mo ba waany, mo oraany juurre moa bëëdö yie ki køør gïïa reyø na raac eci ki ge na temge, na pääŋge yi ŋöömö ki ge bäre, ki bëëtö marge na raac.

¹²'Ba ennø, kär nyïïu cïpu jï wäätge nee nywømge, ni ba källu nyïïge nee nywømmu jï wäätu, ni ba cädu kiperge ki man jïtge ki bëëtö mo beer ki bëët kwär. Køøre uuno bëëdö nou teek nou cama caammi mo beyø moo jootu yi ŋöömmögø, ni weyu gø jï jøw käl dëëtu na man bëëtge yie na bäre bäre.›

¹³«'Ba gïïa ö bäätwa bëët ö bäätwa kaper gïïa reyø na temwa, ki raay mowa na døøŋŋø. 'Ba ï na Jwøk marwa, gïïa leth na jäälï wa ki ge ba rømi ki gïïa reyø na temwa; 'ba waana gwøgï, ni weyï waani na mo dööŋ ni kwøw kaawat man bëëde en.

¹⁴?A ennø, ciik moï cäŋwa ka kaallø, ni nywømwa dëëtwa ki juurre moøgø ni wø tïïö ki gïïögø ni raac eci ki ge yøø? ?A ïïni, ï ba wëër ki waani ni raanynyï wa këël mano tïme ni bäŋ dhaanhø mo dööŋ wala mo bøth?

¹⁵Wui Wuuö Jwøk, Jwø Icriel, ïïni, ï beer; kiper waani, waana wec na mo dööŋ ni kwøw, kaawat man bëëde dïcäŋi en. Ennø, raay mowa ena nyïmï; ni bäŋ dhaanhø rewa mo maar cuŋŋö nyïmï ki køør raay mowa.»