Read anuak Neemiya 1 Bible Online

Neemiya 1 - anuak bible

Neemiya 1

¹'Ba moi beege luup Neemiya wär Akaliya. Kanya tïme na ri cwiiri ma pïërariiø moa beet Arthëkcici ni ena nyeny Parca, yi dwääy mana cwøl ni Kiclep, ni aani na Neemiya, a ena paan dwøŋ yi pääny mana cwøl ni Cuca,

²coka ma Anani, na dhaanhø aciel røk nyïïmera, ki jiy møøk mo cäädhi ka eni, gena öö ni ge käla Juuda; ni pëënynya geni kiper Jerucalem ki jø Juuth moa näk kär maaø ki tøŋ na no odööŋ ni kwøw.

³Ni köge jïra, ni «Jiy moa näk kär maaø ki tøŋ na no odööŋ ni kwøw yïth mïëc Juuda, ge ena yi bëëtö mo leth, ni ge di jøøŋŋø. Kiir mar Jerucalem bëëdö no opädhö, ni dhøgi mo kiir mare bëëdö no owaaŋø ki maac.»

⁴'Ba aani kanya wïnynya luupögø, aana put pï piny ni jwöŋa, ni bëëda ki nïne naa kïmmö, naa wödö ki cam, naa lämö nyïm Jwø maal.

⁵Ni kööa, ni «Wui Wuuö Jwøk, Jwø maal, a kwaya ïïni, ï na Jwøa dwøŋ ni wø kwany dëëlli ki eni, ï ni wø gwøk luumma tuutï ki jø wø mëër ki ïïni, ï ni wø nyooth mëër man wø ba jøøl jïge, ge ni wø gwøk ciik moï.

⁶Ennø, beerra man raŋï aani, ni cegï ïthï ki lam mara, a na dhaanhnhï en, ni beeye lam mara man läma ki gø nyïmï en ki dïcäŋ ki wäär, kiper jiyï ma jø Icriel, naa køpa raay moge moa bacwa dëërï; aani ki jø dhi øt kwäya waana bääyö dëërï.

⁷Waani, waana tïïö ki gïï mo reyø døc dëërï, ni waani ciik moï, ki gïïa cemï, ki luup ŋøl moï, moa cïpï ki ri dhaanhnhï ma Modhe, kärwa gwøø.

⁸«Beerra man lääŋŋï luubö mana köömmï dhaanhnhï ma Modhe ki gø na kööï, ni ‹Ni näk mou bëëdö ni cwïnynyu ogaa wøk, u keetha keethø dï wïth juurre.

⁹'Ba ni näk mou duua baŋa, ni gwøgu ciik 'moa ni kïthu geni bäät tïïc, këël noo bëëdu ni kwöra näk mo u yaa keethø yïthge beeye kwör mo bäyö, u lema lemø yïth kwörögø ni duua uuni kany, kanya näk yaa jierø nee nyeŋŋa bëëde ni ŋäc yie.›

¹⁰«'Ba ennø, jøøgø beege jiyï, ni gena jiy moï na piemï ki køør teek badï na dwøŋ.

¹¹Wui Kwäärö Wuuö Jwøk, a kwaya ïïni, beerra man cegï ïthï ki lam mara, a na dhaanhnhï en, ki lam mar jiyï mo wø bëëdö ni yïthge met ki man wøørge nyeŋŋï; ni wëëgï gïna many dhaanhnhï thur kare dïcäŋi ki køør mano nyoothï mëër jïre nyïm nyeya ma Arthëkcic.» 'Ba aani, a bëëdö ni aana kwääy mar nyeya.