Read anuak Neemiya 13 Bible Online

Neemiya 13 - anuak bible

Neemiya 13

¹'Ba kar kaace wëël ciik mana cïp Jwøki ki ri Modhe abëëdö ni di kwaanø ni dwøl ena maal ni wïnyö jï jiy; ni mana näk ogöör piny yie na joot yie beeye ni juurre ma jø Amön ki juurre ma jø Möap kärge jïëc ki man nutge ya acooŋ Jwøk na bäre bäre.

²Kiper geni jø Icriel kärge jølø ki cam ki pïï; 'ba gena tïmö ni marge cïpö ki jammi jï Beelam kiper nee acïëni käl bäät jø Icriel. 'Ba Jwøk marø acïëni manøgø awiile dëëtø ki gwïëth.

³'Ba kanya ö jiyi na wïnyge luup moa en yi wëël ciik Jwøk, geni juurre bëët aputge käl wøk ki røk jø Icriel.

⁴'Ba kanya poode dïkwøŋ, dïlämi ma Eliyacip, na no okwanyø nee uut kän mo Øt Jwøk marø bëëtge ni ena cere, ena nyïïawäädi døc ki Thöbiya.

⁵Ni ö Eliyacipi ni cïpe ki thääŋ øtø mo yie laac jï Thöbiya, ni beeye thääŋ øtø mana bëëdö dïkwøŋ ni muuce mo beel kana yie, ki gïn wø jïye ŋwääi ni met, ki jap Øt Jwøk, ki beel mo wø cïp na paac wïth jammi, ki køøŋ nyïïomøki moa nyärö, ki maaw; ni gïïögø beege gïïa näk ocaanø ni cïp jï jø tuuŋ Libay, ki jø wø wär ki dudi Øt Jwøk, ki jø wø koor dhøgi mo kiir; ni poot na øtø man wø kïth jammi yie mo wø jwäk jï dïlämme.

⁶'Ba kanya täk gïnögø, a na Neemiya, a tøør Jerucalem; kiper kanya tïme na ri cwiiri ma pïëradäk ka ariiø, moa beet Arthëkcici ni ena nyeny Babiløn, aani, aana døø baŋe, e na nyeya. 'Ba kanya nø bëëda, luum duuö mara akwaaa ki nyeya, ni cïp gø jïra.

⁷'Ba kanya pïïa Jerucalem, gïna raac na tïïc Eliyacipi ajooda, ni beeye gïna tïïe na cïpe ki øtø jï Thöbiya mo ena yi kal mar Øt Jwøk.

⁸'Ba aani gïnögø, yia atïmö ni raac ki gø døc, ni puta jap Thöbiya bëët käl wøk ki yi øtø ni beege jap paac moe, ni weta geni.

⁹Køøre aani, aana cïpö ki dwøl, ni ö jiyi ni thoothge yïth uudi ni cïpge geni kur keerge na mo Jwøk, ni cäŋa jammi dwøk yïthge, ni beege jap Øt Jwøk, ki muuce mo beel, ki gïn wø jïye ŋwääi ni met.

¹⁰Aani thuwø, ajooda ni jammi mo wø cïp jï jø tuuŋ Libay kär cïbö jïge, ni ö jø tuuŋ Libayi ki jø wø wär ki dudi Øt Jwøk ni wø tïny Jwøk ni putge aay, ni ŋati man nø døøa baŋ puur yi pwödhö mare.

¹¹'Ba køøre aani jø kööre ajääla ni kööa, na «?Aperŋø ni wec Øt Jwøk en?» Køøre aani jø tuuŋ Libay ki jø wø wär ki dudi Øt Jwøk, gena cooŋa kanya ciel ni cïïmma geni kwörge.

¹²Ni ö jø Juuda bëët ni känge ki beel mo wø cïp na paac wïth jammi, ki kwøk nyïïomøki moa nyärö, ki maaw, ni kälge geni yïth uut kän.

¹³Køøre aani, dïlämi ma Celemiya, ki Dhadök dïpööy mar ciik Jwøk, ki ŋat tuuŋ Libay mo nyeŋŋe Pedaya, gena kwanya nee bëëtge ni uut kän ena ceŋge; ni meeda Anan bäätge na ŋat køny geni, ni beeye Anan o Dhakur nyikwaar Mataniya. Kiper jøøgø geno caarø ni geno ŋääth jiyi ki man bëët tïï pääŋ jammi ni ena ceŋge ki man pääŋge jammi jï jø wø tïïge ki geni ciel.

¹⁴'Ba ï na Jwøk mara en, lääŋ aani ni ba rwääny tïïe 'moa jïrï ni beege tïïe 'moa na beyø na tïïa kiper øtø marï, ki mana cïïmma jiy yie mo tïny ïïni.

¹⁵'Ba yïth nïröka, aana jïtö ki jiy dï Juuda mo cöödhö ki nyïïomøki ki tietge ki cäŋ jwömö, ni marge biic gø na køøŋø; ni jø møøk ge kännö ki beel mo ena yïth keece mo käärge ka bäät arëëni, ki jammi møga ni beege kwøŋ, ki nyïïomøki, ki nyïïolämmi, ki teeŋ wïth tëër møga bëët, ni kälge geni Jerucalem ki cäŋ jwömö. 'Ba aani, jøøgø aköömma ki man ba gäthge ki caammi ki dïcäŋ manøgø.

¹⁶Jø Tayar thuwø mo wø bëëdö Jerucalem gena bëëdö ni ge kännö ki rec, ki wïth jammi møga bëët mo di gadhø ni gathge geni ki jø Juuda ki cäŋ jwömö Jerucalem.

¹⁷'Ba aani jøøa kwörge døøŋŋø mo Juuda ajääla ni kööa jïge, ni «?Uuni, aperŋø ni tïïyu gïn ni raac en, nou tïïya cäŋ jwömö ni ba en kur keere?

¹⁸?Aŋø, manøgø paa teeŋ gïna kwøŋ kwäyu tïïc, ni ö Jwøki marø ni käl gïï ni leth bëët ii bäätø ki bäät pääny man? 'Ba ennø uuni, u cäŋa wëër mør meet bäät jø Icriel, ki køør mana tïïyu cäŋ jwömö ni ba en kur keere.»

¹⁹'Ba gïna tïïa kany wø tïm pinynyi ni najïïm ennø, ni dhøgi mo kiir mar Jerucalem cøl, ni jøw bunna cäŋ jwömö, aani, a wø cïpö ki dwøl nee dhøgi mo kiir dëët nee bëëtge ni ba jap këël kanyo pööth cäŋ jwömö yie. Køøre aani, jiya møøk acïïmma dhøgi mo kiir kiper nee bäŋe tëër mo duny yi kiir ki cäŋ jwömö.

²⁰Ki køør manøgø, dïgäthe, ki jø wø gath wïth teeŋ jammi bëët mo wø gath, geni, ki yie aciel wala kwöre ariiø, gena tïmö ni wäär bäre thöörge thöörö wøk deŋ kiir mar Jerucalem.

²¹'Ba aani, gena köömma ni kööa jïge, ni «?Uuni, aperŋø ni wø thöörru wäär bäre nou ena deŋ kiir en? Uuni, ni näk mo cäŋu ka nwøyø, putu ka joot ni cera yaa kïth dëëtu.» Ki mana täge kar kaace nø, geni, ge kär duuö këët ki cäŋ jwömö.

²²Køøre aani, jø tuuŋ Libay aköömma nee dëëtge cïpge kur keerge ki man bëëtge ni ge waany, nee cige nee dhøgi mo kiir koorge ki man bëët cäŋ jwömö ni ena kur keere na mar Jwøk. 'Ba ï na Jwøk mara en, lääŋ aani kiper gïn thuwø na tïïa, ni nyoothï met ec marï jïra ki køør mëër marï na päl ni wø ba jøøl.

²³Maya thuwø, ki yïth nïröka, aani, aana jïtö ki jø Juuda mo onyöömmö ki mään mo käla ya Acdöt, ka Amön, ki Möap.

²⁴'Ba thäk obwöre moge, ge cäänö ka dhøk mar jø Acdöt, ki dhøgi mo wïth juurre møga, ni geni dhøk mar jø Juuda kucge ki man cäänge ki gø.

²⁵Køøre aani, gena jääla ni cwöla acïëni bäätge ni pwöda jiy møøk rege, ni nywaada jïëc wïthge, ni wëëga geni kööŋ ki nyeŋ Jwøk nee geni nyïïge ba cïpge këët jï wäät juurre nee nywømge, ni ba kälge nyïï juurre nee nywøm wäätge wala geni.

²⁶Køøre aana köö, na «?Aŋø, paa kiper teeŋ nywöm mo nëëna manøgø nø ni tïm Cølöman na näk nyeny Icriel ni pätha yi bääyö ki gø? Ni ki røk mïëc wïth juurre bëët, bäŋ nyeya mo nëëna Cølöman. Eni Jwøk mare mëër ki eni døc, ni ö Jwøki ni røøny eni na nyeya bäät jø Icriel bëët. 'Ba määr juurre moa nywøme, ena kïthge yi bääyö.

²⁷'Ba waani, wa ba many man wïnywa gø man näk mo gïn ni dwøŋ ni raac en you tïïö, ni tïïyu dëër Jwøk marø, ki køør mana nywømmu määr juurre.»

²⁸Këël dhaanhø aciel røk wäät Jööda o Kwääy Lam Mana Dwøŋ ma Eliyacip, ena cø nyi Cenbalat nyï Örönaim. Køøre ena riemma.

²⁹'Ba ï na Jwøk mara en, kär wïïï wïl ki geni kiper gïna tïïcge na jääpge kunhnhö mar dïlämme ki kunhnhö mo ba waany, ni raanyge luubö mana tuut kiper tïï dïlämme, ki mana tuut kiper tïï jø tuuŋ Libay.

³⁰'Ba aani, gena kïtha kur keerge ki røk juurre, ni cïïmma tïïe mo dïlämme jïge, ki mo jø tuuŋ Libay, ni ŋati man nø tïïya tïïc mare.

³¹Aani thuwø jöö man käl jenni moa näk otal ki gø, ki caammi mo wø kwøŋ ciek, atïïa, ni jøøi nø moge kälge ka yi kanya näk ocaanø jïge. 'Ba ï na Jwøk mara en, lääŋ aani ni beer.