Read anuak Neemiya 3 Bible Online

Neemiya 3 - anuak bible

Neemiya 3

¹Kanyøgø Eliyacip na näk Kwääy Lam Mana Dwøŋ ena ö maal ki dïlämme mo wø tïïö ki eni ciel, ni geerge dhi kiir man wø cwøl ni Dhi Kiir Dïëk, ni cïp gø kur keere na mar Jwøk, ni moocge dhi gø ko odhuule. Ni ö geni ni cïpge kiir kur keere na mar Jwøk, ni beeye kiir mana no okëël ri øt koor man wø cwøl ni Dïpa, ki ri Øt Koor Mar Ananel.

²Ni ö jø Jerikö ni gëëtge ni ge tägi ka kanya ŋuut dhøk ceŋ jøøgø yie. Ni ö Dhakurri wär Imeri ni gëëde ni tääe ka dhøk ceŋ jø Jerikö.

³'Ba jø tuuŋ Acena dhi kiir man wø cwøl ni Dhi Kiir Rec ageerge, ni cöönhge dhi gø ki jenni, ni kïthge dhi gø ko odhuule, ki gïï wø dëëdi ki geni, ki dïdëëdi.

⁴'Ba Merëmöt wär Uria nyikwaar Aködh dëër kiir kanya ŋuut dhøk ceŋ jøøgø yie adwøk kare. Ni ö Meculammi o Berekiya nyikwaar Mecëdhabël ni dwøk dëër kiir kare kanya ŋuut dhi cer Merëmöti yie. Ni ö Dhadöki o Baana ni dwøk dëër kiir kare kanya ŋuut dhi cer Meculammi yie.

⁵Ni ö jø Tëköa ni dwøkge dëër kiir kare kanya ŋuut dhi cer Dhadöki yie; 'ba jøøa kwörge døøŋŋø moge, gena bëëdö jaak ni ge ba kunynyi ki tïïc mana caan kwääri moge jïge.

⁶'Ba Jöyada o Pacëa ki Meculam o Bëcödëya, dhi kiir man wø cwøl ni Dhi Kiir Jecana ageerge, ni cöönhge dhi gø ki jenni, ni kïthge dhi gø ko odhuule, ki gïï wø dëëdi ki geni, ki dïdëëdi.

⁷Ni ö Melathaya nyï Gibien, ki Jadön nyï Mërönöt, ki jø Gibien, ki jø Micpa, jøøa en tier kwäärö mar paac man wø cwøl ni Løø Naam Upareeti Løøga, ni dwøkge dëër kiir kare kanya ŋuut dhøk ceŋ jøøgø yie.

⁸Ni ö Udhielli wär Araya, ŋat mo ena røk rëëmme mo warkie, ni dwøk dëër kiir kare kanya ŋuut dhøk ceŋ jøøgø yie. Ni ö Ananiya, ŋat mo ena røk jø wø tïïc mäth wïïr mo wø ŋwääi ni met, ni dwøk dëër kiir kare kanya ŋuut dhi cer Udhielli yie. Jøøgø bëët kiir Jerucalem adwøkge kare këël mana këët ri kiir kanya näk odhïŋ.

⁹Ni ö Rëpaya wär Ur, ŋata bëëdö na kwäärö mar thääŋ Jerucalem, ni dwøk dëër kiir kare kanya ŋuut dhøk ceŋ jøøgø yie.

¹⁰Ni ö Jidaya wär Arumap ni dwøk dëër kiir kare kanya ŋuut dhi cer Rëpaya yie, buut øtø mare. Ni ö Atuci wär Acabeniya ni dwøk dëër kiir kare kanya ŋuut dhi cer Jidaya yie.

¹¹Ni ö Malkiya wär Arim ka Acub o Paath-Möap ni dwøkge thääŋ kiir løøk maya kare, ki dëër øt koor man wø cwøl ni Øt Koor Mar Jø Bul Ki Dääpe.

¹²Ni ö Calummi wär Alöec, ŋata bëëdö na kwäärö mar thääŋ Jerucalem, ni dwøk dëër kiir kare, eni ki nyïïe, ni beeye kanya ŋuut dhi cer Malkiya yie.

¹³'Ba Anun ki jø wø bëëdö Dhanöwa, dhi kiir man wø cwøl ni Dhi Kiir Agäm Kïdi adwøkge kare. Ageerge ni kïthge dhi gø ko odhuule ki gïï wø dëëdi ki geni, ki dïdëëdi. Ni dëër kiir mana dwøkge kare këël ki mana këët ri dhi kiir man wø cwøl ni Dhi Kiir Wï Thur, bär mare ki buudö beeye gööye ma kuma.

¹⁴Ni ö Malkiya o Rëkap, ŋata bëëdö na kwäärö mar Bëëth-Akarim, ni dwøk dhi kiir kare man wø cwøl ni Dhi Kiir Wï Thur. Ageere ni kïth dhi gø ko odhuule, ki gïï wø dëëdi ki geni, ki dïdëëdi.

¹⁵Ni ö Calummi o Köl-Ödhë, ŋata bëëdö na kwäärö mar Micpa, ni dwøk dhi kiir kare man wø cwøl ni Dhi Kiir Jøøro. Eni dhi kiir ageere, ni mooc dhi kiir maal ka apäära, ni kïth dhi gø ko odhuule, ki gïï wø dëëdi ki geni, ki dïdëëdi. Ni ö eni thuwø ni dwøk dëër kiir kare mana en buut puul man wø cwøl ni Ceela na en buut ajïniin nyeya, këël mana pïïe ri kanya näk okïthö ki kwör tiel kany wø ïnh piny ki yie ni jøw käla thääŋ Jerucalem man wø cwøl ni Pääny Deebit.

¹⁶Ni ö Neemiya wär Adhbuk, ŋata bëëdö na kwäärö mar thääŋ Bëëth-Cur, ni dwøk dëër kiir kare kanya ŋuut dhi cer Calummi yie, ni këël gø buut dwöl mar nyeya ma Deebit, këël mana pïïe ri puul mana koony, ni pïïe ri øtø man wø cwøl ni Øt Jø Leny.

¹⁷'Ba jø tuuŋ Libay moi ni nyeŋge en piny kany ii, dëër kiir kanya ŋuut dhi cer Neemiya yie adwøkge kwörge. Reum o Bani dëër kiir kanya ŋuut dhi cer Neemiya yie adwøk kare. Acabiya, ŋata bëëdö na kwäärö mar thääŋ Kïïla, dëër kiir kanya ŋuut dhi cer Reummi yie adwøk kare, ni tïïe ki nyeŋ paac mare.

¹⁸Baway wär Ënadat, eni na bëëdö na kwäärö mar løø thääŋ Kïïla ki jiye, dëër kiir kanya ŋuut dhi cer Acabiya yie adwøk kare.

¹⁹Ëdhör o Jëcua, eni na bëëdö na kwäärö mar Micpa, dëër thääŋ kiir løøk maya kanya ŋuut dhi cer Ënadati yie adwøk kare, ni beeye kanya en buut kany wø eth jøwi maal ki yie ni jøw cøøa kar kän mo jap leny na en kanya gun kiirri ki yie.

²⁰Baruk o Dhabay, eni na bëëdö ni cwïnye lïëth ki tïïc, dëër thääŋ kiir løøk maya kanya ŋuut dhi cer Ëdhöri yie adwøk kare, ki mana täge ki kanya gun kiirri ki yie këël mana pïïe kany wø cør yie ni jøw cøøa po Kwääy Lam Mana Dwøŋ ma Eliyacip.

²¹Merëmöt wär Uria nyikwaar Aködh dëër thääŋ kiir løøk maya kanya ŋuut dhi cer Baruki yie adwøk kare, ki mana täge ki dhi jöör øt Eliyacip këël mana pïïe ya aŋuun paac mar Eliyacip.

²²'Ba jø tuuŋ dïlämme moa bëëdö deŋ Jerucalem, dëër kiir kanya ŋuut dhi cer Merëmöti yie adwøkge kare.

²³Ni ö Benjamenni ka Acub ni dwøkge dëër kiir kare kanya ŋuut dhøk ceŋ dïlämme yie, ni beeye kanya en buut øtø marge. Ni ö Adhariya o Maycëya nyikwaar Ananaya ni dwøk dëër kiir kare kanya en buut paac mare na ŋuut dhøk ceŋ jøøgø yie.

²⁴Ni ö Binuy wär Ënadat ni dwøk thääŋ dëër kiir løøk maya kare kanya ŋuut dhi cer Adhariya yie, ki mana täge ki ri øt Adhariya këël mana pïïe ri kanya gun kiirri ki yie, ni put gø këël kanya gun kiirri ki yie.

²⁵Ni ö Palalli wär Odhay ni tïïc tïïc mare buut kanya gun kiirri ki yie buut øt koor mana näk okëël ri paan dwøŋ mar nyeya løøa en jï maal buut kal mar jø koor. Ni ö Pedaya o Paröc ni tïïc tïïc mare kanya ŋuut dhi cer Palalli yie.

²⁶Ni ö jø wø tïïö yi Øt Jwøk ni wø bëëdö bäät thuur Öpël, ni tïïcge tïïc marge këël mana këët buut dhi kiir man wø cwøl ni Dhi Kiir Pïï, ni ge cäätha jï kur tuul-cäŋ ki jï kanya näk okëël ri øt koor.

²⁷Ni ö jø Tëköa ni dwøkge thääŋ dëër kiir løøk maya kare kanya en buut øt koor mana dwøŋ këël mana këët ri kiir mar thuur Öpël.

²⁸'Ba dïlämme møga, dëër kiir jï løøa en maal løø dhi kiir man wø cwøl ni Dhi Kiir Okweeny adwøkge kare, ni ŋati man nø tïïö ni dïët ki nyïm øde.

²⁹Ni ö Dhadöki wär Imër ni dwøk dëër kiir kare kanya en buut øde na ŋuut dhøk ceŋ dïlämme yie. Ni ö Cemaya o Cekaniya, ŋat wø koor dhi kiir man wø cwøl ni Dhi Kiir Jï Kur Tuul-Cäŋ, ni dwøk dëër kiir kare kanya ŋuut dhi cer Dhadöki yie.

³⁰Ni ö Ananiya o Celemiya ka Anun na näk bïcier wäät Dhalap ni dwøkge dëër kiir kare kanya ŋuut dhi cer Cemaya yie. Ni ö Meculammi o Berekiya ni dwøk dëër kiir kare kanya ŋuut dhøk ceŋ jøøgø yie, ni beeye kanya en buut kany wø bëëde yie.

³¹Ni ö Malkiya, ŋat mo ena røk rëëmme mo warkie, ni dwøk dëër kiir kare kanya ŋuut dhi cer Meculammi yie, këël mana këët ri øt jø wø tïïö yi Øt Jwøk, ni këël gø ri øt jø gath na en buut dhi kiir man wø cooŋ lwaae yie, këël mana këët ri øtø mana näk ogeer maal bäät kiir kanya gun kiirri ki yie.

³²Ni ö rëëmme mo warkie ki jø gath ni dwøkge dëër kiir kare kanya näk okëël ri øtø manøgø kanya gun kiirri ki yie, ni këëlge gø ri dhi kiir man wø cwøl ni Dhi Kiir Dïëk.