Read anuak Neemiya 5 Bible Online

Neemiya 5 - anuak bible

Neemiya 5

¹'Ba kanyøgø jiy ki määrge gena bëëdö ni ge jwöŋö døc ni döötge ege tïŋ maal dëët nyïïmëëkge ma jø Juuth.

²Jø møøk aköö, ni «Waani ki wäätwa ki nyïïwa wa thööth; beerra man jïtwa ki beel mo camwa nee wa bëëtwa ni wa kwøw.»

³Jø møøk aköö, ni «Waani, pwöth beel mowa ki pwöth omøki mowa, ki uudi mowa, wa määö ki geni ki beel na dïgïti, nee wa jïtwa ki beel kiper käc.»

⁴Jø møøk aköö thuwø, ni «Waani da gwel mo ewa maaø kiper ajwäk mar nyeya man wø jwäk waani ki gø kiper pwöth beel mowa ki pwöth omøki mowa.

⁵'Ba këël na bëëde ni dëëtwa caala dëët jø pøø, no obwöre mowa caala obwöre moge, waani wäätwa ki nyïïwa wa tïïya geni nee bëëtge na laaŋe, ni nyïïwa møøk ennø onø cam na laaŋe; ni jïwa bäŋ teek, kiper pwöth beel mowa ki pwöth omøki mowa, ge bëëdö na mo jø møøk.»

⁶'Ba aani, kanya wïnynya jwøk marge mana jwöŋge ki gø, ki luupögø bëët na carge yøø, aana put wëër døc.

⁷Ni bëëda naa cädö ki yi ŋedha. Køøre aani, jøøa kwörge døøŋŋø ki jø kööre ajääla ni kööa jïge, ni «Uuni, u bëëdö ni ŋati man nø dïïu møta ŋat poge ki man cool jammi jïïu moa näk ee maaø, ni coole ni da wïthge.» Kiper manøgønø, aana cwötö ka acooŋa mo dwøŋ kiper nee jøw cäänge ki geni.

⁸Køøre aana köö jïge, ni «Waani, ki køør mana løny jïwa, nyïïmëëgø ma jø Juuth moa biel dëëtge na laaŋe baŋ wïth juurre, gena wïïlwa wøk. ?'Ba ennø, u cäŋa nyïïmëëgu ma jø Juuth tïïyö nee dëëtge bielge, nee cäŋwa wïïl wøk?» 'Ba geni, gena lïŋö kiper bäŋ luubö mo ege joodø nee caange.

⁹Køøre aana cäŋ köö, ni «Gïna tïïyu enø patha gïn mo beer. ?Aŋø, uuni, ba løny ki man bëëdu nou lwäär ki Jwøk marø kiper nee ajøøŋ mar nyïïmän 'moø ma wïth juurre tïme ni bäŋgø bäätø?

¹⁰Aani thuwø ki jøøa käärwa tïïc ki geni, ki jø tïïc 'moa, jø pøø gena wëëkwa mäyö ki gwel ki beel baŋwa nee duuge. 'Ba beerra man wec cwøl jammi moøgø ni cwøl ni da wïthge yøø.

¹¹Ennø, dïcäŋi kiree, uuni, dwøgu pwöth beel moge jïge, ki pwöth omøki moge, ki pwöth jenni moge mo wø nyïïge wel na maaw, ki uudi moge, këël dïm wïth gwel ki dïm wïth beel, ki dïm wï køøŋ nyïïomøki moa nyärö, ki dïm wï maaw ni wø cwøllu bäätge yøø.»

¹²Køøre gena köö, ni «Gïïögø dwøkwa dwøgø, ni bäŋ gïn manywa baŋge këët. Waani, tïïcwa tïïö kiree kaawat manø caanï enø.» Kanyøgø aani, dïlämme acwøla, ni wëëga jøøgø kööŋ nyïma nee tïme ni ge tïïö ka køør luubö man mana näk ocaanø.

¹³Aani thuwø, aleeŋŋa mara abäänya wøk dëëra ni teeŋa gø ni kööa, ni «Ŋato ba jïëc luubö man mana näk ocaanø, eno tëëŋ Jwøki wøk øde, ni tëëŋ jape wøk cere kaawat aleeŋŋa mara man na teeŋa en; eno tëëŋ wøk møn, ni dööŋe ni bäŋ gïn mo ena jïre.» 'Ba acooŋa bäre gïnögø aputge jøl, ni «Beeye kare.» Ni ö geni ni putge Wuuö Jwøk pwøc. Ni ö jiyi ni putge gïnögø tïïc ki køør luubö mana näk ocaanø.

¹⁴Maya thuwø, ki mana täge ki dïcäŋa kwany aani yie ni aana kwäärö mar jøøgø yi ŋööm Juuda, kanya tïme na ri cwiiri ma pïërariiø këël mana këët ri cwiiri ma pïëradäk kurriiø moa beet Arthëkcic ni ena nyeya, yïth cwiiri moø na apaar kurriiø yøø, aani ki jøøa käärwa tïïc ki geni wa kär cwötö ki cam man wø cïp jï kwäärö cooth ki yïth nïne bëët.

¹⁵'Ba kwääri moa kwøŋ bwödhö nyïma dïkwøŋ, ajwäk mo teek akïthge bäät jiy, ni jwäkge caammi mo jiy ki kwøk nyïïomøki moge, ni ge meeda ge bäät gwet-bïrö ma pïëraŋween. Këël jicge, bëët jiy atïïcge ni teek. 'Ba aani teeŋ gïnögø kära tïïö, kiper aani, a lwäär ki Jwøk.

¹⁶Këël aani ki dëëra thuwø, dëëra acïba kiper tïïc mar kiir man; waani bäŋ ŋøøm mo ewa ŋeeø. 'Ba jiya bëët gena bëëdö ni ge ena kanya ciel kaace kiper tïïc.

¹⁷Maya thuwø, jiy mo wø cämwa ki geni ya akaaŋ beege jø Juuth ki jø kööre, ni kwäänge beeye dïpa ki pïërabïïc; ni jiy mo wø ö baŋwa ni ge käla tiet mïëc wïth juurre moa en deŋwa kär kwaanø.

¹⁸'Ba gïï wø jiiŋŋi kiper cäŋ man nø beeye rwaath aciel, ki rööm abïciel mo ojierø; ni weny thuwø poot di jiiŋŋø jïra. 'Ba kany wø tïme na køør nïne apaar, teeŋ wïth kwøŋ bëët di kälö ni thööth. 'Ba këël na bëëde na enøgønø, aani, a kär cwötö ki cam man wø cïp jï kwäärö, kiper ajwäk mana teek bäätge.

¹⁹Wui ï na Jwøk mara, lääŋ aani ni beer ki køør gïïa tïïa bëët kiper jøøi ii.