Read anuak Neemiya 8 Bible Online

Neemiya 8 - anuak bible

Neemiya 8

¹'Ba kanya ö dwää abïriiø na tääi,[2] ni jø Icriel onø pï piny yïth päänye moge, geni ge bëët rege acooŋge kanya ciel kar acooŋa kanya leer nyïm dhi kiir man wø cwøl ni Dhi Kiir Pïï, ni ge bëëdö kaamar dhaanhø aciel. Køøre geni, acaange jï Edhera, eni na dïpööy mar ciik Jwøk, nee wëël ciik na cïp Wuuö Jwøki jï jø Icriel ki ri Modhe käl wøk.

²'Ba kanya tïme na dïcäŋ mana dïkwøŋ mana täk nïr dwää abïriiø yie, dïlämi ma Edhera wëël ciik Jwøk akäl wøk nyïm jø acooŋa, ni beege cwøw ki mään, këël ko obwöre bëët moa näk tier luubö cøøa wïthge.

³Ni kwaan wëëlö ki mana täge ka amöölla këël dhöör dïcäŋ, ni jiy ee løø nyïme kar acooŋa kanya leer na en nyïm dhi kiir man wø cwøl ni Dhi Kiir Pïï, ni kwaane nyïm cwøw ki mään, këël obwöre moa näk tier luubö cøøa wïthge. 'Ba jiy bëët ïthge acekge døc ki luup moa en yi wëël ciik Jwøk.

⁴'Ba kar kaagø Edhera, eni na dïpööy mar ciik Jwøk, cuŋŋa bäät jenni maal mo otieŋø mo ogeer jiyi nee eni cuŋŋe bääte kiper acooŋa manøgø. 'Ba jøøa kwörge døøŋŋø moa cuŋŋö bäät cwïïe beege Matitiya, ki Cema, ka Anaya, ki Uria, ki Kilkiya, ki Maycëya; ni jøøa kwörge døøŋŋø moa cuŋŋö bäät caame beege Pedaya, ki Micaël, ki Malkiya, ka Acum, ki Acbedana, ki Dhekaraya, ki Meculam.

⁵Ni kanya ö Edhera na jap wëëlö, nëënö nyeŋ jiy bëët, kiper eni cuŋŋö ni wïth jiy bëët ee thiel piny. Ni kanya jap wëëlö jiy bëët gena put ö maal.

⁶Køøre Edhera Wuuö Jwøk, Jwøa dwøŋ, apwøe. Kanyøgø jiy bëët ceŋge aputge tïŋ maal ni jølge gø, ni «Beeye kare, beeye kare;» ni putge cøŋge këël piny, ni wøørge Wuuö Jwøk ni täärnyïmge ege këël piny.

⁷Køøre thuwø, jø tuuŋ Libay, ni beeye Jëcua, ki Bani, ki Cërëbiya, ki Jamin, ka Akup, ki Cabetay, ko Odiya, ki Maycëya, ki Kelitha, ka Adhariya, ki Jödhabat, ka Anan, ki Pelaya, tiet ciik acaange døøc jï jiy, ni jiy poot bëëdö ni cuŋŋö karge,

⁸ni marge kwaan wëël ciik Jwøk, ni ge løga tier gø kiper nee tiere ci cwïny jiy kany wø kwaani.

⁹Kanyøgø Neemiya, ŋata bëëdö na kwäärö mar paac, ki dïlämi ma Edhera, eni na dïpööy mar ciik Jwøk, ki jø tuuŋ Libay, jøøa caan tiet ciik Jwøk jï jiy, gena köö jï jiy bëët, ni «Dïcäŋ man en atïmö ni ena kur keere na mar Wuuö Jwøk, Jwøk maru; uuni, käru jwöŋö ni ba kïmmu.» Kiper jiy bëët gena bëëdö ni ge jwöŋö kanya wïnyge luup moa en yi wëël ciik Jwøk.

¹⁰Ni kö Neemiya jïge, ni «Uuni, cou ni cammu cam mana met døc, ni maathu køøŋø mana met døc, ni cïpu thäkge møøk jï jøøa näk bäŋgø jïge mo ege jiiŋŋø; kiper dïcäŋ man en atïmö ni ena kur keere na mar Wuuö Jwøk ma Kwäärö marø. Uuni, käru kïmmö, kiper met ec mar Wuuö Jwøk beeye teek maru.»

¹¹Ni ö jø tuuŋ Libay thuwø ni wëëkge jiy bëët lïŋŋö ni köge, ni «Uuni, noukïïl, kiper dïcäŋ man en ena kur keere; uuni, käru kïmmö.»

¹²Kanyøgø jiy bëët gena put aa baŋ cam, ki baŋ maath, ni pääŋge caammi jï jiy, ni wøørge dïcäŋ manøgø ki met ec mo dwøŋ, kiper geni tiet luup moa caan jïge yi wëël ciik Jwøk aci cwïnyge.

¹³'Ba kanya tïme na ri riet nïr dwää abïriiø, dïbwöthe mo wïth tuŋi mo jiy bëët ki dïlämme ki jø tuuŋ Libay, rege acooŋge kanya ciel buut Edhera eni na dïpööy mar ciik Jwøk, kiper nee ïthge cekge døøc ki luup moa en yi wëël ciik Jwøk.

¹⁴Køøre geni luubö mana näk ogöör piny yi wëël ciik Jwøk ajootge, ni beeye luubö mana näk ocaan Wuuö Jwøki ki ri Modhe 'ni jø Icriel ge doo bëëdö ni ge wödö yïth abïle kany wø tïme ni ra ajwöma mar dwää abïriiø.

¹⁵Kanyøgø geni luubö aputge gøø piny ni keethge gø yïth mïëri moge bëët ki dï Jerucalem ni köge, ni «Uuni, cou wøk bäät thuuri ni jaaŋŋu bäät jenni mo wø nyïïge wel na maaw, ki bäät jer paap mo wø nyïïge wel na maaw, ki bøøk kääc, ki bøøk ïth tuue, ki bäät jenni moa näk onigïït piny, ni kälu geni nee ø gëëdø ka abïle ki køør mana näk ogöör piny.»

¹⁶'Ba jiy gena put aa wøk, ni kälge bäät jenni, ni gëënge dëëtge ka abïle, ni ö ŋati man nø ni gëëde bäät øde maal, ki yïth käälle moge, ki yïth käälle mo Øt Jwøk, ki kanya leer na en nyïm dhi kiir man wø cwøl ni Dhi Kiir Pïï, ki kanya leer na en nyïm dhi kiir man wø cwøl ni Dhi Kiir Ipariem.

¹⁷Ni ö jiyi bëët moa duuö na mak ki tøŋ ni gëëtge ka abïle ni bëëtge yïthge. Ka adïëri møn, teeŋ ajwöma manøgø poot kär wøør jø Icrielli cøøn ki mana täge ki ri nïr Jøcua o Nun këël dïcäŋ manøgø. Ni met ec marge manøgø beeye met ec mo dwøŋ døc.

¹⁸Edhera abëëdö ni wëël ciik Jwøk kwaane kwaanø ki yïth nïne bëët ki mana täge ki dïcäŋ mana dïkwøŋ këël mana këët yi cäŋ mana näk aŋuudi. Gena bëëdö ni ge wøøra ajwöma ki nïne abïriiø; 'ba na tïme na ri bäc nïne, gena jïtö ka acooŋa mo ena kur keere ki køør luubö mana näk ocïp piny.