Read anuak Neemiya 9 Bible Online

Neemiya 9 - anuak bible

Neemiya 9

¹'Ba kanya tïm nïr dwää abïriiø ni pïërariiø ka aŋween, jø Icriel dëëtge acooŋge kanya ciel, ni bëëtge ni ge ba cämö, ni keece ege røø dëëtge na abïïe, ni bäätge ege kunynyö ki tør ni ge jwönna dëëtge.

²Kanyøgø jø Icriel dëëtge akälge wøk ki røk juurre, ni öge maal ni køpge raay moge, ki gïïa reyø na tïïc kwäcge.

³'Ba kanya bëëde ni jiy poot cuŋŋö karge, geni wëël ciik mar Wuuö Jwøk, Jwøk marge, akwaange ki kany mo thääŋ cäŋ ee ŋwömmö; ni cäŋge bëëdö ki kany mo thääŋ cäŋ ee ŋwömmö ni ge køpa raay moge, ni ge wøøra Wuuö Jwøk, Jwøk marge.

⁴'Ba jø tuuŋ Libay moa näk cuŋŋö bäät thudhi beeye Jëcua, ki Bani, ki Kadmiël, ki Cebaniya, ki Buni, ki Cërëbiya, ki Bani, ki Kenani, ni geni, ge cøøra Wuuö Jwøk, Jwøk marge, ni döötge ena maal døc.

⁵Køøre jø tuuŋ Libay, ni beege Jëcua, ki Kadmiël, ki Bani, ka Acabeniya, ki Cërëbiya, ko Odiya, ki Cebaniya, ki Petaya, gena köö, ni «Ööu maal ni pwøyu Wuuö Jwøk, Jwøk maru, eni na nut cøøn ni bëëdö na bäre bäre.» Køøre jiy abwøthge ki lam ni köge, ni «Wui Wuuö Jwøk, pwøc en ri nyeŋŋï na näk nyeŋ ajiem na bëëdö ni ena maal ni kaala nyeŋŋi bëët moa näk opwøø.

⁶Bee ï keerï na Wuuö Jwøk. Ni bee ï na cwääc maal, këël maal kuya, ki gïïa en yie bëët, ni bee ï na cwääc piny ki gïïa en yie bëët, ni bee ï na cwääc näpa døøŋŋø ki gïïa en yïthge bëët, ni bee ï ni wø cïp kwøw jï gïïa kwøw bëët, ni ö gïïa en maalli ni wøørge ïïni.

⁷«Ïïni, bee ï na Wuuö Jwøk, Jwøa jier Abram, ni kälï eni wøk ki yi paana cwøl ni Ur, yi ŋööm jø Kaldia, ni cagï nyeŋŋe ni Eeberam.

⁸Ni jootï eni na dhaanhø mo cwïnye ena baŋï, ni tudï ki luubö ki eni ki man cïpï ŋøøm jï jøw käl dëëre, ni beeye ŋööm jø Keenan, ki mar jø Këth, ki mar jø Amör, ki mar jø Përec, ki mar jø Jeebuc, ki mar jø Gërgëca, ni putï luumma caanï wëëk thur kare, kiper marï adïëri.

⁹«Ïïni, caarø mar kwäcwa ajootï kanya bëëtge Ijep, ni wïnynyï oduuru marge kanya enge bäät Naama Kwaar.

¹⁰Ïïna tïïö ki nyuuthe ki gïï mo rëëma ec dëër Peerø ki dëët jiye moa kwörge døøŋŋø bëët, ki dëët jiy bëët moa en yi ŋöömö mare, kiper ïïni, gïna tïïcge ni bëëtge ni ge töödö bäät jiyï ki gø ŋäyï. Ïïni, nyeŋŋï atïïyï nee wïnye kaawat man bëëde dïcäŋi en.

¹¹Ïïni, Naama Kwaar apääŋŋï ki dïëre nyïm jiyï, ni putge cør dï naam ni ge cäädhi ka kany mo otal; 'ba jøøa ŋwiec køørge, gena leeŋï yi naam kanya päŋ døc kaamar kïdi mo oleeŋa yïth pïï mo kwödö døc.

¹²Ïïni, jiyï abwøthï ki dïcäŋ, ni ge bwøthï ki pöölö mo ree ee wenyø, ni bwøthï geni ki wäär ki pöölö mo ree ee wenyø mo liel kaamar maac, nee jöörge meenye kany cørge yie.

¹³«Ïïni, ïïna ö piny bäät Kïn Caynay ni cäänï ki jiyï niï ena maal, ni cïpï luup ŋøl moï na thïïŋ jïge, ki ciik moï na näk adïëri, ki pwöc moï ki gïïa cemï na beyø.

¹⁴Ïïni, cäŋ jwömö marï na en kur keere acaanï jïge nee ŋäcge, ni cïpï pwöc moï, ki gïïa cemï, ki ciik moï jïge ki ri dhaanhnhï ma Modhe.

¹⁵Ïïni, ïïna cïpö ki cam jïge mo ööi ki maal kiper käc marge, ni wëëgï pïï kwön wøk ki yi kïdi jïge kiper riew marge. Ïïni, acaanï jïge nee dønyge yi ŋöömö nee lwørge na marge, ni beeye ŋöömma kööŋï kipere ni cïpï cïbö jïge.

¹⁶«'Ba geni na kwäcwa gena tïmö ni marge atöör, ni døøcge wïthge mo teek, ni kärge ciik moï wïnynyö.

¹⁷Geni, gena kweer ki man cekge ïthge, ni kärge tïïe moï lääŋŋö moa näk rëëma ec na tïïyï yïthakicge. Gena tïmö ni wïthge teek, ni kwänyge ki dïbwödhi mo dwøga geni yi bëët laŋ Ijep. 'Ba ïïni, ïïna Jwø wø wëën jiy, ni wø nyooth met ec mare, ki mëër mare, ni wø ba laar wëër, ni mëëye ni wø ba jøøl päl. Ïïni, jiyï kärï wiiø.

¹⁸Këël kanya lëënyge rege ki warkey, ni tïïcge gø na nyirøøa man lamge, ni köge, ni ‹Man beeye Jwøk maru na käl u wøk ki Ijep,› ni marge beeye ajaany mo dwøŋ kiree,

¹⁹«Ïïni, ki køør mëër marï na päl, ge kärï wii dï paap; 'ba pöölö mo ree ee wenyø poot bëëdö ni bwøtha geni ki øtjöö marge ki dïcäŋ; ni pöölö mo ree ee wenyø mo liel kaamar maac poot bwøtha geni ki wäär, ni meenya jöörge kany cørge yie.

²⁰Ni ö jwïëy moï na beyø ni bëëde bäätge ni pwönynya geni, ni ö møø marï mana cwøl ni meena ni kärï gø paanyø dhøkge, ni mooyï geni ki pïï kiper riew marge.

²¹Ïïni, gena gwøgï dï paap ki cwiiri ma pïëraŋween, ni bäŋ gïn mo geno can ki gø; geni abïïe moa en dëëtge kär ränynyö, ni tietge kär kwöt ki wääth.

²²«Ïïni, mïëc akwöm mo nyeye, ki mïëc wïth juurre acïpï jïge, ni beege mïëri moa kïïge ki geni; ni ö geni ni lwørge ŋööm Cëëwön nyeny jø Ëcbön, ki ŋööm Ög nyeny jø Baacan.

²³Ïïni, kwään nyïïkwaacge atïïyï ni thööth ni caala ceec maal, ni 'kälï geni yi ŋöömö mana caanï jï kwäcge 'ni ge cøøa yie nee lwørge na marge.

²⁴Ni ö nyïïkwaacge ni dønyge yi ŋöömö ni lwørge gø na marge. Ni dïïmï jiy mo wø bëëdö yi ŋöömmögø, ni beege jø Keenan; ni cïbï geni ceŋ jiyï, geni ki nyeye moge, ki jiy mo wø bëëdö yi ŋöömmögø, nee käärge ki jöö mana manyge jaak.

²⁵Ni ö jiyï ni macge päänye moa näk ogeerø ni teek ki ŋöömma beer. Ni lwørge uudi mo yïthge päŋ ki jammi moa beyø, ka aguule mo okoonyø mo wø cuŋ pïïyi yïthge, ki pwöth omøki, ki jaath man wø nyïïe wel na maaw, ki jenni mo wø nyïïge cam, thööth jaak. Ni cämge ni jäŋge, ni lørge, ni bëëtge ni yïthge met ki jammi moa beyø na thööth na cïpï jïge.

²⁶«'Ba geni, luummï kärge wïnynyö; gena gëëmö ki Ïïni, ni løøge ciik moï ŋäthge. Geni nyïïkuk Jwøk moï anäkge, jøøa kööm geni ki man luuge rege baŋï, ni ö geni ni bëëtge ni marge beeye ajaany mo dwøŋ kiree.

²⁷Kiper manøgønø, gena cïbï ceŋ nyïïmän moge, jøøa caar geni; 'ba kanya jwöŋge dëërï ni ge ena yïth gïï mo leth, marge awïnynyï niï ena maal. Køøre ïïni, ki køør mëër marï na päl, ïïna cïpö jïge ki jiy mo käla geni wøk ceŋ nyïïmän moge.

²⁸«'Ba kanya jïtge ki jwöm ennø, gena cäŋ tïïö ki gïï mo nëëni ni reyø nyïmï, ni cïbï geni ceŋ nyïïmän moge, ni bëëtge ni ge ena tietge. 'Ba kanya cäŋge jwöŋö dëërï, marge awïnynyï niï ena maal; køøre ïïni ki køør mëër marï, gena køønynyï ki kwöre mo thööth.

²⁹«Ni köömmï geni ki man cäŋge rege luu baŋ ciik moï. 'Ba gena tïmö ni marge atöör, ni luup moa cemï ba wïnyge, ni bëëtge ni ge baya luup ŋøl moï moa caanï 'ni ni näk mo ogwøk dhaanhe, dhaanhø kwøw ki køørge. 'Ba geni, ki køør teek wïc marge, gena bëëdö ni wïthge ege cwiidø, ni ïthge ba cekge.

³⁰Ba këël na bëëtge na enøgønø, ïïna bëëdö ki geni ki cwiiri mo thööth ni cwïnyï iï cïp piny, niï köömma geni ki ri Jwïëyï na en kur keere, ki ri nyïïkuk Jwøk moï. 'Ba geni ïthge kärge ciiø; køøre gena cïbï ceŋ wïth juurre.

³¹'Ba ki køør mëër marï na päl, ge kärï wiiø, ni ge kärï raanynyø na bäre; kiper ïïna Jwø wø nyooth met ec, ni ïïna Jwø mëër.

³²«'Ba ennø, ï na Jwøk marwa en, ï na Jwøa dwøŋ na teek, ni wø kwany dëëlli nyïme, ni wø gwøk luum mëër mana näk ba jøøl na tuude, gïï ni wø tägi ni leth ii, kär nëënö jïrï kaamar nyi gïn mo thiinh jaak, ni beege gïïa tägö dëëtwa, ki dëët nyeye mowa, ki dïbwöthe mowa, ki dïlämme mowa, ki nyïïkuk Jwøk mowa, ki kwäcwa, ki jiyï bëët, ni beeye ki mana täge ki ri nïr nyeye mo jø Aciria këël dïcäŋi en.

³³'Ba ïïni, marï adïëri ki røk gïïa tägö dëëtwa bëët, kiper ï bëëdö niï tïïya adïëri; ba waani, waana bëëdö ni wa tïïya gïï mo reyø.

³⁴Kiper nyeye mowa, ki dïbwöthe mowa, ki dïlämme mowa, ki kwäcwa, ciik moï kärge gwøø, ni ïthge kärge ciiø ki gïïa cemï, ki köömmö mana köömmï geni ki gø.

³⁵'Ba kanya bëëtge ni ge ena ya akwöm nyec marge, ni gïïa beyø na thööth na cïpï jïge nut yi ŋöömma päl na beer na cïpï jïge, geni, ï kärge tïnynyö, ni tïïe moge na reyø kärge wiiø.

³⁶«'Ba ennø, ka adïëri møn, waana laaŋe dïcäŋi ennø; waana laaŋe møn yi ŋöömma cïpï jï kwäcwa nee bëëtge ni ge cama caammi mo wø ciek yie ki gïïa beyø mo wø ciek yie.

³⁷'Ba ki køør raay moa tïïcwa, caammi mo wø ciek yie na thööth atïmö ni cøøa baŋ nyeye moa røønyï bäätwa; ni wa ki dëëtwa ki dhäk mowa, wa käärge kaawat man wø manyge jaak. Ni ennø, wa ena yi bëëtö mo leth døc.

³⁸«'Ba kiper gïïögø bëët, waani wa kööŋ ki luubö mo wa rööpa ree bëët mo gööra piny, ni mwöni, mo nyeŋ dïbwöthe mowa ki jø tuuŋ Libay mowa, ki dïlämme mowa ogöör bääte.»