Read anuak Acther 2 Bible Online

Acther 2 - anuak bible

Acther 2

¹Køør gïïögøøni, ni nyeya ma Ayacewëëröc wëër mare odøø piny, wïïe apare ki Bacti, ki gïna tïïc Bacti, ka awaaci mana gøø piny na jääl gø ki gø.

²Ni ö jiyi moa karge cään ki nyeya mo wø tïny eni ni köge, ni «Beerra man määnyö ki nyïïakuue kiper nyeya, ni beege nyïïakuue mo mïërö mo dëët cwøw poot kucge.

³Ni ööt nyeya ki dwøl tiet mïëri moa en tiere nee jiy cuum kiper tïïc mar cooŋ nyïïakuue moa mïërö mo dëët cwøw poot kucge; ni cooŋ geni yi pääny Cuca paan dwøŋ yi kal mar nyeya kar bëëtö mar mään, ni cïp geni cer Ëgay dhaanh nyeya na näk odïnö, ŋat wø gwøk mään, ni ö mädhi mo wïïrge ni cïbi jïge,

⁴nee nyeya jëëte ka aciel mo yie met ki gø røkge nee tïme na gwanynyø na kar Bacti.» Køøre nyeya ajïëy ki marge, ni tïïc gø ki køør mana caange.

⁵'Ba yi kar kaaca da dhaanhø mo bëëdö pääny Cuca paan dwøŋ ma ŋat Juuth mo nyeŋŋe Mördekay o Jayer o Cimiy na näk o Kic, na käl ri tuuŋ Benjamen.

⁶'Ba Mördekay beeye dhaanhø aciel røk jøøa mak Nabukedenecörri nyeny Babiløn ki tøŋ yi Jerucalem, ni beeye kanya mak nyeny Juuda ma Jeyöakin ki tøŋ.

⁷'Ba Mördekay jïre da nyiwänni ma Acther, mo nyeŋŋe ki dhi Ibaru beeye Adaca, ni menni ki wänni othøw. 'Ba ena nyakøø ma wøp mo kïte mïërö døc. Ni ö Mördekay ni piith gø jïre na nyaare.

⁸'Ba kanya nø ö dwør nyeya ka awaaci mare na pïïe yïth päänye bëët, ni nyïïakuue mo thööth gena cooŋ kanya ciel yi pääny Cuca paan dwøŋ ni cïp geni cer Ëgay, Acther thuwø akïth po nyeya ni cïbi cer Ëgay ŋat wø gwøk mään.

⁹Ni ö Ëgay ni mïn yie ki Acther ni nyooth mëër mare jï gø, ni laar mäth wïïr ki wïth caammi kälö jïre. Ni känne ki nyïïakuue abïriiø mo ojierø ki po nyeya mo tïny eni. Ni ö Actherri ki nyïïakuue moøgø ni daa gø kany mo beerra eni ki kany wø bëët määnni yie.

¹⁰'Ba Acther kanya en kaace, ena bëëdö ni bäŋ gïn mo ee caanø kiper wï jur mare ki tuuŋ mare, kiper ocem Mördekay jïre nee bäŋe gïn caane.

¹¹Køøre Mördekay bëëdö ni jöödö cooth deŋ kal man wø bëët määnni yie ni kwaana bëëtö mar Acther kiper jööt dëël mare ki bëëtö mare man bëëde nidïï nee ŋääe.

¹²'Ba ki køør ciik mana caan kiper nyïïakuue, dëëtge ajiiŋge ki dwäde apaar kurriiø ki man cige baŋ nyeya. Ni ö dwäde moøgø ni pääŋŋi na kwöre ariiø; dwäde abïciel ge wïïra mädhi kiper nee rïŋ dëëtge tïme ni pøøth, ni dwäde abïciel møga ge wïïra mädhi møøk mo ŋweeth mo caala riia mo ŋwääö ni met. 'Ba kanyo thum tïïe moøgø bëët, nyakøø man nø kïtha baŋ nyeya.

¹³'Ba kanyo ci baŋ nyeya, dëëre di røønyø kaawat mana manynye, ni ö wøk ki kanya bëët määnni yie ni døny yi øtø mar nyeya.

¹⁴'Ba kany wø tïme na kar nyakøø man nø, eni cøø ka abøøya ni duu wøk ka amöölla, ni ci yi riet øtø mar mään baŋ Caacgac, dhaanh nyeya na näk odïnö, ŋat wø koor mään moa näk dëëtge ege nø joot ki nyeya. Ni eni ba døø baŋ nyeya këët ni näk mo nyeya yie kär cäŋ mïnnö ki eni ni cwøl gø ki nyeŋŋe.

¹⁵'Ba Acther nya Abikael, cöök wää Mördekay, ni beeye Mördekay mana piith Acther, kanya pïïc kare ki man døny baŋ nyeya, eni bäŋ gïn mo ee pëënynyö, 'ba aŋuudö ki jammi moa caan Ëgay keere, ŋata näk odïnö ni wø gwøk mään. 'Ba jiy bëët abëëdö ni yïthge met ka Acther.

¹⁶'Ba na tïme na ri bïriet cwiiri moa beet Ayacewëëröc ni ena nyeya, ri paac dwäde ni beeye dwääy man wø cwøl ni Tebet, Acther akïth baŋ nyeya yi øtø mare.

¹⁷Ni ö nyeya ni mïn yie ki Acther ni mëëye ki gø døc ni kaala nyïïakuue moøgø bëët na näk dëët cwøw poot kucge, ni kïth adun gwac wïïe ni cuum gøøni kar Bacti na gwanynyø.

¹⁸Køør manøgøøni nø, nyeya atïïö ka ajwöm-cam mo dwøŋ mar wödö kiper Acther, ni cwøl jø kööre moe ki bwöthe bëët, ni gööc piny ka awaaci yïth mïëri moa en tiere bëët kiper nee cäŋeca tïïc na cäŋ jwöm røk, ni cïpe ki muuce ni cwïnye tar.

¹⁹'Ba kanya ö nyïïakuue moa näk dëët cwøw kucge ni cäŋge cooŋŋø ri rietge, Mördekay eno pï piny dhi kal mar nyeya.

²⁰Ni bëët Acther ni bäŋ gïn mo ee caanø kiper wï jur mare ki tuuŋ mare, kaawat mana cem Mördekay jïre, kiper Acther bëëdö ni luum Mördekay ee gwøø kaawat mana gwøk gø ni eni poot ena cer gø.

²¹'Ba ki yïth nïrögøøni ni Mördekay opï piny dhi kal paan dwøŋ mar nyeya, da jiy ariiø mo nyeŋge Bikthan ki Terec, mo ge ena røk jø wø koor dhi øt nyeya mana en yie kuya. Jøøgø gena gootø ni tutge ki luubö mo raac kiper nee nyeya ma Ayacewëëröc 'näkge.

²²Ni ö luubö mana tuutge ni wïnynyi ya Mördekay, ni caan gøøni jï gwanynyø ma Acther, ni ö Actherri ni cøøe ni caan dwør Mördekay jï nyeya.

²³'Ba kanya ö luubö manøgø na many tiere døc, ni joodi na adïëri, jøøgø aput näk ni geno lïërö. Ni ö luummögø ni gööri piny nyïm nyeya nee bëëde yi Wëël Waac Nyeye.