Read anuak Acther 4 Bible Online

Acther 4 - anuak bible

Acther 4

¹'Ba Mördekay kanya wïny japa tïïc bëët, abïïge ajeeye ki pänh cwïny, ni runy dëëre ka abïïn keeca, ni jøøp bur wïïe, ni wïr dï pääny bäre ni jwöŋi ni guyö ki dwøl mo päl ni cwïnye opädhö døc,

²këël mana pïïe dhi kal mar nyeya. 'Ba kär døny yi gø, kiper dhaanhø mo oruyö ka abïïn keeca ba døny yi kal mar nyeya.

³Kar kanyøgø kwöra näk dwøl mar nyeya ka awaaci mare opïï yie yïth mïëri moøgø bëët, kïmmö mo dwøŋ døc dagø ma atägö baŋ jø Juuth. Ni bëëtge ni ge wödö, ni ge jwöŋö, ni ge guyö; ni thööthge bëët ge buuta bäät abïïk keece yi bur.

⁴'Ba kanya ö jø tïïci mo Acther moa näk nyïïakuue ki jøøa näk odïnö na caange gïna tïïc Mördekay jï Acther, Acther cwïnye apädhö døc, ni put kwääyö ka abïïe jï Mördekay nee røøe na kar abïïn keeca, 'ba ena kweer ki man jïëc ge.

⁵Køøre dhaanhø aciel mana cïp nyeya nee Acther tïnynye ki røk jiye moa näk odïnö mo cwøl na Athak, acwøl Actherri ni kööm gø nee ci baŋ Mördekay kiper gïna tägö dëër Mördekay nee tier gø kwanye.

⁶Kanyøgø Athak aput ci wøk baŋ Mördekay kany wø cuŋ jiyi yie dï pääny, nyïm dhi kal mar nyeya.

⁷Ni ö Mördekay ni lam gïïa tägö dëëre bëët jïgø, ki kwään jammi moa kööŋ Amaanni ki ge ni cïbe cïbö nee kïth kwör kän jammi mo nyeya kiper raany jø Juuth.

⁸Ni cïp wëël awaaci thuwø jï Athak mana gøø piny kiper raany jø Juuth, na käl wøk yi Cuca, nee nyoodhe jï Acther ni lam tier gø jïgø, ni kööm Acther ki man ci baŋ nyeya ni kwac gø nee jø poge jïtge ki køny.

⁹Kanyøgø Athak aput døø baŋ Acther ni lam gïïa caan Mördekay bëët.

¹⁰Køøre Acther acäänö ka Athak, ni kööm gø nee dwøl man cäŋ caannø jï Mördekay,

¹¹ni «Dhaanhø jaak, dïcwøø wala dhaagø, ni näk mo eno døny yi kal mar øt wälu mar nyeya nee nyeya neene ni kär cwølø, eni put ka 'näk. Manøgø beeye ciik mo ŋäc jaae mo nyeya bëët ki jiy mo wø bëëdö tiet mïëri moe. 'Ba jöö aciel keere mo løny man pïïö kaace ki gø ni dhaanhø ba 'näk beeye kanyo näk mo nyeya athøny warkey mare ee tïŋ maal baŋ dhaanhø. 'Ba dïcäŋi jïra da nïne mo pïëradäk naa kär cwølø ki man cøøa baŋ nyeya.»

¹²'Ba dwøl mar Acther kanya caani jï Mördekay,

¹³Mördekay acäŋ dwögö ki luubö ni caan jï Acther, ni «Kärï cädö niï bøth ki gïno pïï bäät jø Juuth bëët kiper mana enï paan dwøŋ po nyeya.

¹⁴'Ba ni näk miï bëëdö ni ïïno nikïïl ki yi cäŋ mo caala teeŋ man, køny öö ki kanymør kiper jø Juuth ni piem geni; 'ba ïïni ki dhi øt wäru othøw ni thum aŋuun bëëtö maru. Aŋa na ŋäc gø thuwø; kanymør na tïïc ïïni na gwanynyø beeye kiper cäŋ mo caala teeŋ man.»

¹⁵Køøre Acther acäŋ dwögö ki luubö ni caan jï Mördekay,

¹⁶ni «Ciï ni cooŋï jø Juuth bëët moa en Cuca, ni wödu kipera. Ni bëëdu ki nïne adäk, ki wärre ki cääŋŋe moge, nou ba cämö wala maath. 'Ba aani ki jø tïïc 'moa moa näk nyïïakuue wa wödö thuwø kaawat mano tïïyu. Køøre nø, aano ci baŋ nyeya, këël ni näk maa gwäya ciik. Ni näk maa thøw, aano thøw.»

¹⁷Kanyøgø Mördekay aput cøø ni tïïc japøgø bëët kaawat mana köömmi na Actherri.