Read anuak Acther 6 Bible Online

Acther 6 - anuak bible

Acther 6

¹'Ba yi wäär manøgø, nyeya nyeŋŋe kär gämmö; køøre ena put jääk baŋ Wëël Waac Nyeye man wø maa luup yie; ni käli ni kwaani jïre.

²Køøre ena jïtö ki kany mo ogöörö man näk Mördekay da gïn mo ee caanø kiper Bikthana ki Terec, jø tïïc ariiø mo odïnö mo wø koor dhi øtø mar nyeya, man näk mo ge manynya nyeya ma Ayacewëëröc nee 'näkge.

³Kanyøgø nyeya apëëö, na «?Agïnaŋø na tïïc kiper Mördekay ni wøørra gø ni tïïca kare ni dwøŋ kiper gïna tïïe?» Ni dwøgi ya jaae mo nyeya mo wø tïny eni, ni «Bäŋ gïn mo otïïö kipere.»

⁴Køøre nyeya apëëö, na «?Aŋa ni en cwöt?» Kar kanyøgø Amaan onø duny yi kal mar cwöt mana en wøk nee cääne ki nyeya kiper nee Mördekay lïër bäät jaadha näk ee nø jiiŋŋø kiper gø.

⁵Ni dwøgi ya jaae moe jïre, na «Amaan ena kaace ni cuŋŋö cwöt.» Ni kö nyeya, «Cwøl nee dunynye.»

⁶Køøre Amaan aput dønyø. Ni kö nyeya jïre, na «?Agïnaŋø noo tïïc kiper dhaanhø mo nyeya yie met ki gø nee wøør?» Kanyøgø Amaan aput cäännö ki cwïnye, na «?Aŋa ni met yi nyeya ki gø en nee wøør ni kaala aani?»

⁷Køøre ena köö jï nyeya, ni «Kiper ŋatøgø ni met yiï ki gø nee wøør enø,

⁸abïï nyec man wø røc nyeya, doo käl jiyi wøk kipere, ko okweeny lääy man wø cääth nyeya ki bääte, ni nyuudhi mar nyeya okïth wï okweeny manøgø.

⁹Køøre abïï nyec ko okweeny manøgø dige cïba cer dhaanhø mo kare dwøŋ døc ki baŋ nyeya, ni røøge abïï dëër ŋata met yi nyeya ki gø nee wøør, ni cïpge ŋatøgø bäät okweeny, ni piecge gø kany wø cuŋ jiyi yie dï pääny, ni ge rwääö nyïm ŋatøgø ni döötge ege tïŋ maal, ni ‹Man beeye gïn wø tïïc jï ŋat mo nyeya yie met ki gø nee wøør.› »

¹⁰Kanyøgø nyeya aput köö jï Amaan, ni «Laar abïï øømmø ko okweeny lääy kaawat mana caanï, ni tïïyï gø jï Mördekay ŋat Juuth, no opï piny dhi kal mar nyeya ice; ni bäŋe gïn mo gwäyï mo thiinh ki røk jammi moa caanï yøø bëët.»

¹¹Køøre Amaan abïï ko okweeny aput käl, ni røø abïïe dëër Mördekay, ni cïp Mördekay bäät okweeny, ni piec gø kany wø cuŋ jiyi yie dï pääny, ni rwääö nyïm gø ni dwøre ee tïŋ maal, ni «Man beeye gïn wø tïïc jï ŋat mo nyeya yie met ki gø nee wøør.»

¹²Køøre Mördekay aduu dhi kal mar nyeya. 'Ba Amaan aput läät paac ni wïïe ee uumö ni kïmmö.

¹³Ni caan jammi moa tägö dëëre bëët jï cïïe ma Jëërëc ki nyïïawääte. Køøre nyïïawääte moa wïthge leer, ki cïïe ma Jëërëc, gena köö jïre, «Ennø, ïïna tägö ki man pädhï nyïm Mördekay. Mördekay kiper mana näk beeye ŋat Juuth, ba løny jïrï ki man kaalï gø këët. Ka adïëri møn, ï bööte böötö.»

¹⁴'Ba kanya pootge ni ge poot cäänö ki gø, jic nyeya moa näk odïnö aput nicäär ni ge läädö na Amaan kïthge baŋ atïya mana jiiŋ Actherri.