Read anuak Acther 7 Bible Online

Acther 7 - anuak bible

Acther 7

¹Kanyøgø nyeya ka Amaan gena put ci kuna cämge ki gwanynyø ma Acther ri riet nïne.

²'Ba kanya enge bäät maath ki kwøk nyïïomøki, nyeya acäŋ köö jï gwanynyø ma Acther, ni «?Gïn manynyï agïnaŋøøni? Di cïbö jïrï. ?Ni pïëc marï agïnaŋø? Këël miï pëënynya thääŋ ŋøøm 'moa, owëëk ïïni.»

³Køøre aløk gwanynyø ma Acther ni kööe, «Wui nyeya, ni näk aano jïtö ki met ec baŋï, ni beeye gïn mo beer ki jïrï, gïn manynya ki pïëc mara beeye en: Wëëk a kwøw ki jø tuuŋwa.

⁴Kiper aani ki jø tuuŋwa, waana ŋeew, nee wa raanynyi, nee wa 'näk, nee wïthwa dïïr. Doo na waano ŋeeø na laaŋe jaak, wa na mään ki cwøw, a doo lïŋö, ni bäŋ gïn caana. Doo na beeye per luummögø keere, ba doo rømø ki man ööla ïïni ki cäänö.»

⁵Køøre nyeya ma Ayacewëëröc aköö jï gwanynyø ma Acther, ni «?Manøgø aŋa? ?Eni bëëde kaa? ?Aŋa na tïïc teeŋ gïnögø ni raac enø ki cwïnye?»

⁶'Ba Acther aköö, ni «Beeye Amaan man en, nyimän marwa, ŋata raac na many man caar wa!» Køøre Amaan abwøk ni put dëëre nidïk nyïm nyeya ka Acther.

⁷Ni ö nyeya ni päny maal ki gootø ki kanya mäthge yie ki kwøk nyïïomøki, ni ci ya ajïniina mar paan dwøŋ. 'Ba Amaan adööŋ ni kwaaya gwanynyø ma Acther kiper jwïëy moe, kiper ajoode ni da gïn mo leth mo tïïc nyeya tïïö dëëre.

⁸'Ba na duu nyeya ki ya ajïniina, ni duu kanya mäthge yie ki kwøk nyïïomøki, Amaan ajoode no opäth bäät pëëm mana näk Acther opï bääte. Køøre nyeya aköö, na «?Aŋø, nyeni manynya gø nee gwanynyø put gøø piny nyïma naa nut yi øtø kany kiree?» 'Ba kanya ö luubö manøgø wøk ki dhi nyeya, jø tïïc täärnyïm Amaan aputge uum.

⁹Køøre dhaanhø aciel ki røk jic nyeya moa näk odïnö mo nyeŋŋe Arböna aköö, ni «Raŋï, Amaan da jaath man wø lïër dhaanhø bääte mo ocwöth piny paare, mo bär mare jïtö ki gööye ma pïërabïïc, mo ee tïïö kiper Mördekay nee lïër bäät gø, ŋata caan gïna beer na gwøk jwïëc nyeya.» Ni kö nyeya, «Lïëru bääte.»

¹⁰Ni putge Amaan lïër bäät jaadha jiiŋŋe kiper Mördekay. Køøre nyeya wëër mare adøø piny.