Read anuak Acther 9 Bible Online

Acther 9 - anuak bible

Acther 9

¹'Ba kanya tïme na dwää apaar kurriiø, dwääy mana cwøl na Adar, ni nïre apaar kurdäk, na näk beeye cäŋ mana ö awaaci mana caan nyeya na dee thur kare yie, ni beeye cäŋ mana ŋääth nyïïmän jø Juuthi nee jø Juuth dïïmge yie, cäŋ manøgø ree aput wiil ni tïme na cäŋ mana ö jø Juuthi ki dëëtge ni dïïmge jøøa män ki geni yie.

²Kanyøgø jø Juuth dëëtge adwalge yïth päänye moge moa en tiet mïëri bëët moa bëën nyeya ma Ayacewëëröc kiper nee jiy moa many tïïc gïn mo raac dëëtge nee päth ceŋge, ni bäŋe dhaanhø mo ocuŋŋö nyïmge, kiper jiy bëët alwäyö ki geni.

³Këël jiy moa näk jïge da kööre bäät mïëri, ki kwääri, ki bwöthe, ki jø wø tïïc tïïe mo nyeya, jø Juuth aputge køny, kiper gena lwäyö ki Mördekay.

⁴Kiper Mördekay kare atïmö ni dwøŋ po nyeya, ni put dööŋ kar mare wïnyö yïth mïëri bëët, ni ö teeki mare ni cääth nyïme.

⁵Kanyøgø jø Juuth nyïïmän moge bëët aputge 'näk ko opëëlle, ni dïïrge wïth jøøgøøni, ni tïïcge mana manyge dëëtge.

⁶'Ba yi pääny Cuca paan dwøŋ, jø Juuth gena nääö ki cwøw mo jïtö ki dïpe abïïc;

⁷ni 'näkge wäät Amaan moa näk apaar, ni beeye Amaan wär Amëdatha, ŋata män ki jø Juuth, ni wääte moøgø beege Parcandata, ki Dalpön, ki Acpata, ki Pörata, ka Adalia, ka Aridatha, ki Parmacta, ki Aricay, ka Ariday, ki Bayjata. 'Ba bäŋ twëër mo ege tïïö.

¹¹'Ba dïcäŋögø kiree, kwään jiy moa 'näk yi pääny Cuca paan dwøŋ aput caan jï nyeya.

¹²Ni kö nyeya jï gwanynyø ma Acther, ni «Jø Juuth gena nääö ki cwøw ma dïpe abïïc yi pääny Cuca paan dwøŋ, ki wäät Amaan apaar. ?A ki yïth mïëri moa näk 'moa møga nø, bëëde nidïï? ?Ennø, gïn manynyï agïnaŋøøni? Di cïbö jïrï. ?Ni pïëc marï mør agïnaŋø? Di tïïö.»

¹³Køøre Acther aköö, «Wui nyeya, ni näk beeye gïn mo beer ki jïrï, teeŋ gïna tïïc jø Juuthi yi pääny Cuca dïcäŋi ki køør awaaci marï, doo tïïö thuwø diøø, ni lïër rïŋ dëët wäät Amaan moa näk apaar bäät jenni.»

¹⁴Ni put nyeya cïpö ki dwøl nee tïïc kaawat manøgø. Ni put awaaci gøø piny yi Cuca, ni lïër rïŋ dëët wäät Amaan moa näk apaar.

¹⁵'Ba kanya tïm dwääy mana cwøl na Adar ni nïre apaar kurŋween, jø Juuth moa en pääny Cuca dëëtge adwalge ni nääge ki cwøw ma dïpe adäk yi Cuca. 'Ba bäŋ twëër mo ege tïïö.

¹⁶'Ba jø Juuth møga moa en yïth mïëri moa bëën nyeya dëëtge adwalge kiper nee jwïëcge gwøkge, nee jïtge ki jwöm kiper gïïa doo tïïc nyïïmän moge dëëtge, ni nääge ki jiy ma kume ma pïërabïriiø kurbïïc. 'Ba bäŋ twëër mo ege tïïö.

¹⁷Gïïögø atïïc ni dwääy man wø cwøl na Adar nïre apaar kurdäk. 'Ba na tïm nïr dwäänögø na apaar kurŋween dëëtge ajwömge, ni tïïcge cäŋ manøgø na cäŋ ajwöma, ni beeye cäŋ met ec.

¹⁸'Ba jø Juuth moa en Cuca dëëtge adwalge ni nääge ki jiy ri nïr dwääy apaar kurdäk ka apaar kurŋween, ni jwömge dëëtge ni nïr dwääy apaar kurbïïc, ni tïïcge cäŋ manøgø na cäŋ ajwöma, ni beeye cäŋ met ec.

¹⁹Kiper manøgønø, jø Juuth mo wø bëëdö yïth atude moa en wøk, dwääy man wø cwøl na Adar kany wø tïm nïre na apaar kurŋween wøørge wøørø cooth na cäŋ mar met ec, ni beeye cäŋ ajwöma, man cïpge ki muuce mo caammi jï nyïïawäätge.

²⁰Køøre Mördekay luup moøgø amaa piny, ni gööte ki weeli baŋ jø Juuth bëët moa karge cään ki moa karge bäyö yïth mïëri moa bëën nyeya ma Ayacewëëröc.

²¹Ni caana gø jïge ni kany wø näk yi cwiir cooth, kanyo tïm dwääy man wø cwøl na Adar, ki mano täge ni nïre apaar kurŋween këël apaar kurbïïc, cääŋŋe moøgø doo wøørø;

²²kiper beege cääŋŋe moa ö jø Juuthi ni jïtge ki jwöm yie, kiper gïïa doo tïïc nyïïmän moge dëëtge akääŋö, ni beeye dwääna løk pänh cwïny marge yie na met ec, ni ö kïmmö ni løø ree baŋ kanynyø; nee cääŋŋe moøgø tïïcge na mo met ec man tïïge yïthge ka ajwöm-cam ki cïp muuce mo caammi jï nyïïawäätge, ki cïp muuce jï jøøa can.

²³Kanyøgø jø Juuth luubö mana näk ege nø täk aputge kïth bäät tïïc ki køør mana göör Mördekay jïge.

²⁴Kiper Amaan wär Amëdatha na käl ri tuuŋ Agaak, ŋata män ki jø Juuth bëët, ena tïïö ki riek waŋ bäät jø Juuth ki man dïïr wïthge, ni leeŋ gïn mo cwøl ni pur mo caala thöör war kiper nee wïth jø Juuth kiere ni dïïr wïthge.

²⁵'Ba kanya ö luumma raac na tuut Amaanni ki riek waŋ kiper jø Juuth na pïïe baŋ nyeya, weeli aput göör ki køør dwør nyeya nee gïna tïïc Amaanni nee døø bääte, nee eni ki wääte lïër.

²⁶Kiper manøgønø, cääŋŋe moøgø aputge cwøl ni Purim ni käla ri nyeŋ gïna cwøl ni pur. 'Ba ki køør luubö mana göör Mördekay yi wëëlö, ki gïïa jootge, ki gïïa tägö dëëtge,

²⁷jø Juuth aput tïïö ki ciik kiper dëëtge, ki jø oööi køørge, ki jiy mo wø many dwätö ki geni, kiper cääŋŋe moøgø na ariiø yøø nee wø wøørge kanya no ocaanø ki yi cwiir cooth ki køør luubö mana näk ogöör piny;

²⁸ni bëët cääŋŋe moøgø ni wïc ba wïl ki man wøør ge, ki yïth beenhnhe bëët, ki paac man nø, ki yïth mïëri bëët, ki yïth päänye bëët; ni bëët cääŋŋe mo Purim moøgø na gïï mo ge paaya wïthge cooth ki ge, nee tier gïna täk ajwöma manøgø kipere nee bëëde ni ŋäc ni ba ränynyi këët ki baŋ jø Juuth, këël jø oööi køørge.

²⁹Køøre gwanynyø ma Acther nya Abikael, ki Mördekay ŋat Juuth, gena göödö ki wëëlö mør ki teek kwär mo dwøŋ døc, ni ge meeta luubö mana kwøŋ göör kiper Purim, nee bëëde kare.

³⁰Ni jääŋ weeli ni caana dwør bëët-mëër ki bëët ŋäädhe jï jø Juuth bëët moa en yïth mïëri moa näk dïpa ki pïërariiø ka abïriiø mo nyeya ma Ayacewëëröc,

³¹kiper nee cääŋŋe mo Purim cïp piny ni teek kanya no ocaanø, kaawat mana ö Mördekay ŋat Juuth ki gwanynyø ma Acther na cïpge gø piny kiperge; ni beeye mana nø cïpge piny kiper dëëtge thuwø, ki jø oööi køørge, ni da pwöc kiper cääŋŋe mo jø ba cämö yïthge ni jø jwöŋö.

³²'Ba ki køør luubö mana caan Actherri, luup mo Purim acïp piny ni teek; ni puti göör piny yi wëëlö.