Read anuak Bwøth Wøk 12 Bible Online

Bwøth Wøk 12 - anuak bible

Bwøth Wøk 12

¹'Ba Wuuö Jwøk acäänö ki Modhe ka Aran yi ŋööm Ijep, ni kööe jïge,

²ni «Dwääy man otïmö na dwääy mano tägu ki gø røk dwäde; ni tïme na dwääy mana dïkwøŋŋa eni jïïu røk dwäde mo cwiir.

³Caannu jï lwaa Icriel bäre, ni kööu jïge, ni ‹Kanyo tïm nïr dwääyi man na apaar, ŋati man nø doo lwötö ki nyidiel kiper paare, ki køør mïëri moge, ni beeye nyidiel aciel kiper paac man nø.

⁴'Ba ni näk mo kwään jiy moa en paac man nø nøk, ni ba rømi ki nyidiel, wää paaci man nø ki wää paac mana en buute ge doo lwötö ki nyidiel aciel ki køør kwään jiy moa nut dïge; nyidiel manøgø dege pääŋŋö na kare ki køør mana doo cam ŋati man nø.

⁵Nyïïdïëk mou wär näk bäŋ gïn jøøŋŋi rege, ni beege nyïïdïëk ma nyööi mo cwiicge oceele; ni nyïïdïëk moøgø wär näk lwørru røk rööm wala røk atëëe.

⁶'Ba nyïïdïëk moøgø dou gwøø këël kanyo tïm nïr dwäänögø na apaar kurŋween, ni beeye kanyo ö lwaa Icriel bäre noo ŋarge nyïïdïëk moge kanyo tïme ni cäŋ manynya pädhö.

⁷Køøre thuwø ge doo lwötö ki remø ni rwøthge dhøk uudi moo cämge yïthge, ni beeye dhi øtø løøi ki løøi ki maal.

⁸Ni camge rïŋ gø dïwäänögø ni ege bulö, ni camge gø ki møø mo ree bäŋ thømmø ko omarø mo keec.

⁹Kär nou cama rïŋ gø ni numö wala no othaalø ki pïï, 'ba ki mano täge ri wïc ki tiel këël gïïa en ec ni wø cam, wär cammu ni you bulö ki maac.

¹⁰Ni kär dee gø mo weyu mo këët amöölla. 'Ba no dee gø moo dhäthö mo okëët amöölla, wär waaŋŋu ki maac.

¹¹Jöö mano cämu ki gø beeye en; wäru cämu na abïïk wääth you røø, ni war ena tietu, na athøre mou ena ceŋŋu; nou cämö nou läädö. Ni manøgø beeye cam mar Cäŋo Pööth Thøøe Yie mara, a na Wuuö Jwøk.

¹²« ‹Kiper a na Wuuö Jwøk aano cäädhi dï ŋööm Ijep dïwäänögø, ni nääa obwöc cwøw moa näk kaai moa en yi ŋööm Ijep bëët, ni beege kaai mo jiy ki kaai mo lääc paac bëët; ni ŋøla luumma bäät juuk Ijep bëët. Beeye aani na Wuuö Jwøk.

¹³'Ba remø otïmö na nyuudhi kiperu røk uudi moa bëëdu yïthge; ni kany ojooda remø, aano pöödhi ki buutu, ni tïme ni bäŋ gïn mo leth mo pïï bäätu mo raanynya uuni kanyo raanynya Ijep.

¹⁴« ‹Dïcäŋögø otïmö na cäŋ par wïc jïïu, ni wøørru gø na ajwöma jï Wuuö Jwøk; cäŋ manøgø wär wøørru cooth ki yïth beenhnhe mou bëët.

¹⁵U doo bëëdö ki nïne abïriiø nou cama møø mo ree bäŋ thømmø, 'ba dïcäŋ mana dïkwøŋ thuumme moa en yïth uudi mou dou käla wøk; kiper ki mano täge cäŋ mana dïkwøŋ këël bïriet nïne, ŋat moo cämö ki møø mo ree da thømmø jaak, wär tïme ni tøør ri jø Icriel.

¹⁶Kanyo tïme na dïcäŋ mana dïkwøŋ, u doo jïtö ka acooŋa mo ena kur keere, ni cäŋu jïtö ka acooŋa mør mo ena kur keere ri bïriet nïne; kär dee tïïe mo tïïyu yïth nïne moøgø na ariiø yøø. 'Ba tïïc mano tïïyu keere beeye tïï cam man wø cam ŋati man nø.

¹⁷« ‹Uuni ajwöma mar møga näk ree bäŋ thømmø dou gwøø thuwø, kiper dïcäŋ manøgø tïmö na dïcäŋo käla lwaae mou wøk yie ki yi Ijep; kiper manøgø nø cäŋ manøgø dou gwøø cooth ki yïth beenhnhe mou bëët.

¹⁸Kanyo tïm dwääyi mana dïkwøŋ ni nïre apaar kurŋween, ni pinynya wïthïënhö, u doo cämö ki møø mo ree bäŋ thømmø, këël mano tïm nïr dwäänögø ni pïërariiø kurciel ni pinynya wïthïënhö.

¹⁹Nïne moøgø na abïriiø yøø wär näk mo bäŋ thuumme yïth uudi mou; kiper ŋat mo ocämö ki møø mo ree da thømmø jaak, nee wëëllö mo path wala o thwønh paac, ŋatøgø wär tïme ni tøør ri lwaa Icriel.

²⁰Kär dee gïn mo cammu camø ni ree da thømmø; 'ba ki kwör bëëte mou bëët, u doo cama møø mo ree bäŋ thømmø keere.› »

²¹Køøre Modhe jø døøŋŋø mo jø Icriel bëët acwøle, ni kööe jïge, ni «Cou ni lwötu ki nyïïdïëk jïïu ki køør kwään jiy moa en mïëri mou, ni ö wää paaci man nø ni ŋaal nyidiel kiper nee thøø pöödhe ki bäätu.

²²Ni lwötu ki bøøge ri jaadha cwøl ni icöp ni cøtu gø yi remø mana näk you löö ya awal, ni rwødhu remø mana en ya awal dhøk uudi mou maal, ki løøi ki løøi; 'ba kär dee dhaanhø mo døny wøk ki dhi øtø mare këël mano tïm pinynyi na amöölla.

²³Kiper Wuuö Jwøk ocäädhi dï paac nee jø Ijep nääe; 'ba kany ojoot remø dhi øtø maal, ki løøi ki løøi, eni na Wuuö Jwøk opöödhi ki dhi øtø, ni män dïnääy ki man duny yïth uudi mou nou nääe.

²⁴«'Ba uuni ki nyïïkwaayu gïnögø dou gwøø nee bëëde na gïn mo nut cooth.

²⁵'Ba kanyo pïïyu yi ŋöömmo cïp Wuuö Jwøki jïïu keda mana caane, ajwöma manøgø dou gwøø.

²⁶Kany wäro kö obwöre mou ki uuni, na ‹?Aŋø, gïn tiere agïnaŋø?›

²⁷u doo köö jïge, ni ‹Beeye olämi mar cäŋ Cäŋa Pööth Thøøe Yie jï Wuuö Jwøk, kiper kanya 'näk jø Ijep, ena pöödhö ki buut uut jø Icriel, ni wec mïëri moø.› » Ni ö jiyi bëët ni këëlge cøŋge piny ni wøørge Wuuö Jwøk.

²⁸Køøre jø Icriel aay ni tïïcge gø na kare; ni putge jammi bëët tïïc kaawat mana ö Wuuö Jwøki na kööm Modhe ka Aran.

²⁹'Ba kanya tïme na dhöör dï wäär, Wuuö Jwøk obwöc cwøw moa näk kaai bëët na en yi ŋööm Ijep anääe, ni tägi ki kany Peerø na en paaci cere këël mana këët røk kaai mo jøøa en øt twöc, këël kaai mo lääc paac bëët thuwø.

³⁰Ni päny Peerø maal ki dï wäär, ni bee eni, ki jø kööre moe, ki jø Ijep bëët; ni tïm oduuru ni päl døc dï Ijep, kiper mana tïme ni bäŋ paac mo obøth ni bäŋ dhaanhø mo othøw yie.

³¹Køøre Peerø Modhe ka Aran aput cwøl ki dï wäär ni kööe jïge, ni «Ööu maal! Aau wøk dï jiya, uuni ki jø Icriel karubëët. Ni aayu ni tïnynyu Wuuö Jwøk kaawat mana caannu gø.

³²Lwørru pïïth dïëk ki pïïth dhäk mou kaawat mana caannu gø, ni aayu. 'Ba a wär gwïëthu thuwø.»

³³Ni ö jø Ijepi ni lacge jø Icriel nee laarge aa wøk poge, kiper mana köge, ni «Waani wa thøw bëët jaak.»

³⁴Ni ö jø Icrielli ni lwørge muunni moge moa näk ege cöödö ni poot kärge kïthö ki thuumme, ki dääk thaal moge, ni bäcge ge ka abïïe ni käärge ge ki göökge.

³⁵'Ba kar kaaca jø Icriel jammi bëët atïïcge ki køør luup moa car Modhe. Kiper geno nø pëëö baŋ jø Ijep ka abïïe, ki jammi moa näk tïïc ka warkey, ki moa näk tïïc ka gwet-bïrö;

³⁶ni Wuuö Jwøk yïth jø Ijep ee nø tïïc ni met ki jø Icriel, ni ö gïïa pëëny jø Icrielli bëët ni cïpi ya jø Ijepi jïge, ni putge jø Ijep twier.

³⁷Køøre jø Icriel atïŋŋö ki Ramcë ni pïïcge Cuköt, ni jiy moa aay bëët beege jiy ma kume ma dïpe abïciel ni ge cäädhi ka tietge, ni mään ko obwöre kär kwaan rege.

³⁸Ni ö jiyi møøk mo thööth thuwø ni aacge ki geni ciel, ki pïïth dïëk ki pïïth dhäk, ni beege lääc paac mo thööth døc.

³⁹Ni ö jø Icrielli ni thaalge muunni moa käärge na kälge wøk ki Ijep na näk rege kär kïthö ki thuumme. Kiper poot kärge kïthö ki thuumme, kiper gena riem wøk ki Ijep ni ge kär ruu, ni tïme ni bäŋ cam mo ege jiiŋŋø kiper dëëtge.

⁴⁰'Ba cwiiri moa beet jø Icrielli Ijep beege cwiiri ma dïpe aŋween ki pïëradäk.

⁴¹'Ba na tïme na aŋuun cwiiyøgø na dïpe aŋween ki pïëradäk yøø, dïcäŋögø kiree, lwaae bëët mo Wuuö Jwøk na näk jø Icriel aput aa wøk yi ŋööm Ijep.

⁴²'Ba wäär mana ö Wuuö Jwøki na käl jø Icriel wøk ki yi ŋööm Ijep beeye wäär mo doo gwøø jï Wuuö Jwøk; wäänögø doo gwøk jø Icrielli bëët jï Wuuö Jwøk këël yïth beenhnhe moge bëët.

⁴³Ni kö Wuuö Jwøki jï Modhe ka Aran, ni «Man beeye ciik mar cam Cäŋa Pööth Thøøe Yie: «Kär dee jur mør mo cämö ree.

⁴⁴'Ba laŋŋø mar ŋati man nø mo ŋeew ka gwel, kanyo näk mo eno nø daŋ, løny jïre ki man cäme ri gø.

⁴⁵Wëëllö mo path wala dhaanhø mo tïïö ka gwel kär cämö ri gø.

⁴⁶«Camøgø doo cam jøøi moi nø yi øtø aciel; ni bäŋe rïŋö mo kälu wøk ki yi øtø, ni kär dee cöö mo toorru ri camøgø.

⁴⁷Lwaa Icriel bäre gïnögø dege tïïö.

⁴⁸«'Ba ni näk da wëëllö mo path mo bëëdö dïïu, ni manynya man tïïc cam Cäŋa Pööth Thøøe Yie jï Wuuö Jwøk, beerra man daŋ cwøw bëët moa en paare, køøre eni doo öö ni tïïc gø; ni tïme kaamar o thwønh paac. 'Ba dhaanhø mo kär daŋø ba doo cämö ri gø.

⁴⁹Ni beeye ciik aciel bäre kiper o thwønh paac ki wëëllö mo path mo bëëdö dïïu.»

⁵⁰Køøre jø Icriel bëët gïïögø atïïcge na kare; ni putge jammi bëët tïïc kaawat mana ö Wuuö Jwøki na kööm Modhe ka Aran.

⁵¹'Ba dïcäŋeca kiree, Wuuö Jwøk jø Icriel akäl wøk yi ŋööm Ijep ki køør lwaae moge.