Read anuak Bwøth Wøk 15 Bible Online

Bwøth Wøk 15 - anuak bible

Bwøth Wøk 15

¹Køøre Modhe ki jø Icriel duut man awärge jï Wuuö Jwøk ni köge, ni «Aani a wär jï Wuuö Jwøk, kiper ena tïmö na ajieme cäätha maal. Okweeny ki ŋata en bäät gø aleeŋ yi Naama Kwaar.

²Wuuö Jwøk beeye teek mara ni bee eni na cäŋŋa ki duut; ena tïmö na dïkunyi mara. ena Jwøk mara, ni eni daa pwøø; ena Jwø kwara, ni eni daa jiemø.

³«Wuuö Jwøk beeye ŋat leny; ni Wuuö Jwøk beeye nyeŋŋe.

⁴Jïëthe mo Peerø mo wø tut okwëënyi ki lwaak mar leny mare aleeŋ yi Naama Kwaar; ni ö kwääc leny moe moa näk ojierø ni mutge yi Naama Kwaar.

⁵Gena mwøny athaŋ Naama Kwaar, ni negelïŋ piny yi kut kaamar kïdi.

⁶Wui Wuuö Jwøk, cer cwïïï teek døc; wui Wuuö Jwøk, cer cwïïï, nyïïmän wø raanynye raanynyø.

⁷Nyïïmän mo wø ö maal bäätï wø raanynyï raanynyø ki køør ajiem marï na dwøŋ; ni jääŋŋï wëëyï na teek bäätge, ni thöör geni kaamar lethø mo waaŋ.

⁸Ki køør mana jwïëyï jaak ki umï, pïï rege aputge cooŋ kanya aciel, ni ö pïïyi moa näk kwödö ni cuŋge kaamar gïï mo ocooŋ kanya aciel; na athaga ree ee maaø dï Naama Kwaar.

⁹«Ni kö nyimänni, ni ‹Aani a läpö nee ge maa, ni twiera geni ni pääŋŋa jammi moge; ni tïïa gïna manynya dëëtge; aani opëëllö mara owödha wøk, ni raanynya geni ki cera.›

¹⁰'Ba ïïni jamø marï awëëgï kwönnö, ni ö Naama Kwaarri ni mwøny nyïïmän bëët; ni negelïŋ piny kaamar ley yïth pïïa teek.

¹¹«Wui Wuuö Jwøk, ?aŋa ni pääri ki ïïni dï juu bëët? ?Aŋa ni pääri ki ïïni na dwøŋ, ni bëëtö mare ena kur keere? ?Aŋø, paa ï na Jwøk keerï na doo lwäärö kiper ajiem marï ki gïï wø rëëm ec ni wø tïïyï?

¹²Cer cwïïï arwieyï, ni ö ŋøømmi ni mwøny nyïïmän moï.

¹³«'Ba jiyï moa wïïlï wøk ki køør mëëyï ni wø ba jøøl obwøthï; ni kïthï geni kar bëëtö marï na en kur keere ki teek marï.

¹⁴Gïrï owïny juurre ni tïm dëëtge ni kwanynyi; ni ö jø Pilitinni ni tïmge ni böö.

¹⁵Køøre kwääri mo Ëdöm obëëdö ni cwïnyge opädhö; ni ö dïbwöthe mo Möap ni tïm dëëtge ni miel; ni ö jøøa bëëdö Keenan ni bwøkge.

¹⁶Lwär mo dwøŋ døc ki böök mo päl otägi dëëtge; wui Wuuö Jwøk, kanyo jootge teek marï na dwøŋ, geno bëëdö ni lïŋö jaak kaamar kïdi; këël mano pööth jiyï ki buutge, ni beege jiyï moa wïïlï wøk.

¹⁷Wui Wuuö Jwøk, geno bwøthï ni këëllï tietge piny bäät kïdi mana näk marï, kanya näk iï tïïö na näk kar bëëtö marï, ni beeye kanya en kur keere na näk marï na jiiŋŋï ki dëërï.

¹⁸Ka adïëri møn, Wuuö Jwøk obëëdö na wïth gïïa en bäät piny bëët na bäre bäre.»

¹⁹Kanya ö okwëënyi mo Peerø ki jïëthe mo wø tut okwëënyi moe ki jø okwëënyi moe na cige yi Naama Kwaar, Wuuö Jwøk pï Naama Kwaar adwøk bäätge; 'ba jø Icriel acäädhö ki kany mo otal dï Naama Kwaar.

²⁰Kar kanyøgøøni Mariyam na näk nyikuŋ Jwøk, na näk cöök Aranni mana näk dhaagø, anëëdö alwøre, ni ci määnni bëët wøk køøre ni ge pöödö ka anëët ni ge miel.

²¹Ni ö Mariyammi ni jøl duut ni kööe, ni «Wärru jï Wuuö Jwøk, kiper ena tïmö na ajieme cäätha maal; okweeny ki ŋata en bäät gø aleeŋ yi Naama Kwaar.»

²²Køøre Modhe jø Icriel abwødhe ni tïŋge ki bäät Naama Kwaar, ni aage wøk dï paap Cur; ni cääthge ki nïne adäk dï paap ni bäŋ pïï mo ege joodø.

²³'Ba kanya pïïcge kanya cwøl ni Maara, pï Maara atïmö ni ba løny ki man maathge gø, kiper beeye pïï mo keec; kiper manøgønø, nyeŋ kaace aput cwøl ni Maara.

²⁴Kanyøgø jø Icriel aŋurö ki nyeŋ Modhe, ni köge, na «?Agïnaŋø noo maathwa nø?»

²⁵Køøre Modhe ajwöŋö jï Wuuö Jwøk, ni ö Wuuö Jwøki ni nyooth jaath jïgø; ni ö Modhe ni leeŋ jaadhøgø yïth pïï, ni tïm pïïyi ni met. 'Ba kaace beeye kanya ö Wuuö Jwøki na kän wøk jïge yie ki ciik ki luup ŋøl. Ni beeye kanya ö Wuuö Jwøki na pääny geni yie.

²⁶Ni kö Wuuö Jwøki, ni «Ni näk mo dwøra leŋŋu leŋø, a na Wuuö Jwøk na näk Jwøu, ni tïïyu gïna beer nyïma, ni cegu ïthu ki gïïa cema, ni gwøgu ciik 'moa bëët, täwe moa kïtha bäät jø Ijep ba kïtha bäätu; kiper beeye aani na Wuuö Jwøk ni wø køny uuni.»

²⁷Køøre gena ö Ëlim kany mo yie da jøøre mo pïï ma apaar kurriiø ki twöe ma pïërabïriiø, ni putge tïïö ki twïër buut pïï kaace.