Read anuak Bwøth Wøk 18 Bible Online

Bwøth Wøk 18 - anuak bible

Bwøth Wøk 18

¹'Ba kwääc lam mar jø Midien na näk Jëthrö wää cï Modhe, gïïa tïïc Jwøki bëët kiper jiye ma jø Icriel ki Modhe, ni beeye mana ö Wuuö Jwøki na käl jø Icriel wøk ki yi Ijep, awïnynye.

²'Ba Jëthrö nyaare ma Dhipöra na näk cï Modhe, na jääŋ Modhe baŋe, ee nø pänhnhö kar kaaca,

³ki wääte karge riet. 'Ba wääte moøgø, nyeŋ maya cwøl ni Gërcöm, kiper wänni ma Modhe aköö, ni «Aana bëëdö ni aana wëëllö po juurre møøk mo path.»

⁴Ni nyeŋ maya cwøl ni Eliëdher, kiper wänni ma Modhe aköö, ni «Jwøk na näk Jwø kwara bee eni na køny aani, ni käl aani wøk dho opëëllö mar Peerø.»

⁵Køøre Jëthrö wää cï Modhe aö baŋ Modhe dï paap yi twïër kanya en yie buut Kïn Jwøk, ni wäät Modhe ki cï Modhe cäädhi ka eni ciel.

⁶Ni ö Jëthrö ni jääge ki dwøl baŋ Modhe ni kööe, ni «Aana Jëthrö wää cïïï; aani ki cïïï ko obwöre moï karge riet waana ö baŋï.»

⁷Kanyøgø Modhe aput aa wøk kuna røømge ki wää cïïe, ni këël cøŋŋe piny ni nuum dhi gø ni määtha gø, ni putge dëëtge pëënynyö ki jööt dëël marge, ni dønyge yo oduŋkaara.

⁸Ni ö Modhe ni caan gïïa tägö bëët jï wää cïïe, ni beege gïïa tïïc Wuuö Jwøki dëër Peerø ki jø Ijep kiper jø Icriel, këël gïïa leth bëët na pïï bäät jø Icriel ri wääth, ki mana ö Wuuö Jwøki thuwø na køny geni.

⁹Ni ö Jëthrö ni mïn yie ki gïïa beyø na tïïc Wuuö Jwøki kiper jø Icriel, na køny geni ceŋ jø Ijep.

¹⁰Køøre Jëthrö aköö, ni «Pwøc en jï Wuuö Jwøk na køny uuni ceŋ jø Ijep ki cer Peerø. Bee eni na køny jø Icriel ceŋ jø Ijep.

¹¹Kawaane ajooda møn ni Wuuö Jwøk dwøŋŋa eni ki juu bëët, kiper køny manøgø atïïe kiper atöör mana tïïc jø Ijepi bäät jø Icriel.»

¹²Kanyøgø Jëthrö wää cï Modhe akännö ko olämi man wø waaŋ ko olämme møøk ni cïp ge jï Jwøk, ni ö Aranni ki jø døøŋŋø bëët mo jø Icriel ni öge kiper nee ge cämge na aciel ki Jëthrö wää cï Modhe nyïm Jwøk.

¹³'Ba na tïme na aruunnø man, Modhe apï piny kiper nee luup jiy ŋøle. Ni ö jiyi ni cuŋge nyïm Modhe ki mana täge ka amöölla këël abøøya.

¹⁴'Ba kanya ö wää cï Modhe na joot gïïa tïïc Modhe bëët kiper jiy, Modhe apëënynye ni kööe, na «?Agïnaŋø ni tïïyï en kiper jiy? ?Aperŋø ni tïme ni luup jøøi bëët ŋøla ïïni keerï en, ni jiy bëët cuŋŋö nyïmï ki mana täge ka amöölla këël abøøya?»

¹⁵Køøre adwøk Modhe jï wää cïïe ni kööe, ni «Beeye kiper jiy atïmö ni ööa baŋa kiper nee luup moo ŋøl Jwøki kiperge nee pëënyge ki aani.

¹⁶Ni kany wø tïme ni da luup yïthakicge, ge ööa baŋa, ni ŋøla luum ŋati man nø piny ki wati, ni pwönynya geni ki ciik Jwøk.»

¹⁷'Ba wää cï Modhe aköö jï Modhe, ni «Gïnögø ni tïïyï enø patha wøp.

¹⁸Ka adïëri møn, ïïni ki jøøgø bëët ni en buutï yøø, u ööl; kiper tïïc manøgø teek kiperï kiree, ni ba løny ki tïïc jïrï ï keerï.

¹⁹'Ba ennø, wïny luubö mara mano caana jïrï. 'Ba Jwøk oen buutï. Gïna diï tïïö beeye en; ï doo cuŋŋö nyïm Jwøk kiper jøøgø, ni caanï luup bëët mo wø tägi yïthakicge jï Jwøk.

²⁰Ni pwönynyï geni ki ciik ki gïïa cem Jwøki, ni nyoothï jöö jïge mana dege cäädhö ki gøøni ki gïïa dege tïïö.

²¹Køøre thuwø ï doo jëëtö røkge bëët ki jiy mo nyeŋge reegø mo lwäär ki Jwøk, na jiy mo di ŋäädhö, na jiy mo män ki møt; ni tïïyï geni na wïth jø Icriel, ni tïmge na kwääri mo lwaa jiy ma kume ki ma dïpe ki ma pïërobïïci ki mo opaarri.

²²Ni ö jøøgø ni tïmge ni luup mo jiy ŋøla geni cooth. 'Ba kany wø näk mo da luubö mo teek, dege bwödha nyïmï. 'Ba luubö mo jööt jaak, dege ŋølø keerge. Køøre nø, tïïc marï doo tïmö ni jööt, ni tïm tïïci ni nywaaga uuni ki jøøgø bëët.

²³Ni näk mo gïna caana jïrï enøgø tïïyï tïïö, ni ö Jwøki thuwø ni kööm ïïni na enøgø nø, doo løny jïrï ki man cuŋŋï niï teek. Køøre jøøgø bëët doo døøa kwörge ni yïthge met.»

²⁴Kanyøgø Modhe dwør wää cïïe aleŋe, ni tïïc gïïa caan wää cïïe jïre bëët.

²⁵Ni ö Modhe ni put jëëdö ki jiy mo nyeŋge reegø dëët jø Icriel bëët, ni tïïc geni na wïth jiy, na kwääri mo lwaa jiy ma kume ki ma dïpe ki ma pïërobïïci ki mo opaarri.

²⁶Ni ö jøøgø ni tïmge ni ge ŋøla luup jiy cooth. 'Ba luup moa teek wø bwøthge nyïm Modhe, ni ö luupi moa jööt jaak ni tïme ni ŋøla ge keerge.

²⁷Køøre Modhe wää cïïe ajiedhe, ni ö wää cïïe ni aae, ni døø poge.