Read anuak Bwøth Wøk 19 Bible Online

Bwøth Wøk 19 - anuak bible

Bwøth Wøk 19

¹'Ba na tïme na dää dwäde ni jø Icriel onø ö wøk ki yi ŋööm Ijep, dïcäŋ manøgø kiree gena pïï dï paap Caynay.

²'Ba kar kaaca ge tïŋŋi ka Rapidim ni pïïcge dï paap Caynay, ni tïïcge twïër marge dï paabøgø buut Kïn Caynay.[10]

³Ni ö Modhe ni ci maal bäät kïdi nee røømge ki Jwøk, ni ö Wuuö Jwøki ni cääne ki Modhe ki bäät kïdi, ni kööe, ni «Caanï jï nyïïkwaac Jeekap na näk jø Icriel ni kööï jïge,

⁴ni ‹Uuni ki dëëtu kiree gïna tïïa dëët jø Ijep ajootu ki nyeŋŋu, na käla uuni wøk ki Ijep, ni gwøa uuni kaa man wø ö odhuuthi wø käär nyaare ki bwöpe, ni käla uuni baŋa.

⁵'Ba ennø, ni näk mo luumma wïnynyu wïnynyö na adïëri møn, ni gwøgu gïna tuuda ki uuni, u puta tïmö ni uuna 'moa dï wïth juurre bëët, kiper piny bäre beeye mara;

⁶ni tïmu ni uuna dïlämme mo tuuŋ kwär jïra, ni uuna wï jur mo ena kur keere.› Moøgø beege luup moo caanï jï jø Icriel.»

⁷Køøre Modhe aduu piny ni cwøl jø døøŋŋø mo jø Icriel, ni peeth luup moøgø bëët nyïmge, ni beege luup moa cem Wuuö Jwøki jïre.

⁸Kanyøgø aløk jø Icrielli bëët ki dwøl aciel ni köge, ni «Luup bëët moa caan Wuuö Jwøki tïïcwa tïïö.» Ni ö Modhe ni dwøk luubö mana caan jiyi baŋ Wuuö Jwøk.

⁹Ni kö Wuuö Jwøki jï Modhe, ni «Ka adïëri møn, a ööa baŋï naa ööi ka yi pöölö mo cøl, kiper nee luup moo cara ki ïïni nee wïny jiyi, niï ŋääthge na bäre bäre thuwø.» Køøre Modhe luubö mana caan jøøgø aput caan jï Wuuö Jwøk.

¹⁰Ni cäŋ Wuuö Jwøki köö jï Modhe, ni «Ci baŋ jø Icriel ni døøyï ge mo waany dïcäŋ man ki dïcäŋ mar diøø, ni penyge abïïe moge;

¹¹ni jiiŋge dëëtge kiper dää nïne, kiper noo tïme na dää nïne, a na Wuuö Jwøk a ööa piny bäät Kïn Caynay naa nëënö jï jø Icriel bëët.

¹²'Ba wärï tïïï ki keew lak kïdi manøgø bäre kiper jiy, ni kööï jïge, ni ‹Gwøgu rou ni ba cou maal bäät kïdi, ni kär nou guta keew manøgø; no dee dhaanhø mo guta kïdi manøgø jaak, ka adïëri møn, ŋatøca put ka 'näk.

¹³Kär dee dhaanhø mo gut ŋatøgø, 'ba eni wär këëri ki kïte wala ka athëëre; këël lääy wala dhaanhø, ba doo bëëdö ni kwøw këët.› 'Ba kanyo köök tuuŋŋi ni dwøre bäär, kar kaaca nø jø Icriel wär öge buut kïdi.»

¹⁴Køøre Modhe aduu piny ki bäät kïdi ni ö baŋ jiy ni døøc jiy mo waany, ni ö jiyi ni penyge abïïe moge.

¹⁵Ni kö Modhe jï jiy, ni «Jiiŋŋu dëëtu kiper dää nïne; kär dee ŋat mo ci baŋ dhaagø.»

¹⁶'Ba kanya tïme na dää nïne, ni piny amöölla, bäät kïdi aput jïtö ki køth mo pöödö, ka agaackøth mo mal, ki pöölö mo cøl; ni ö dwølli mo päl ma dwør tuuŋ ni wïnye. Køøre jiy moa en twïër bëët dëëtge aput tïmö ni kwanynyi.

¹⁷Ni ö Modhe ni käl jiy wøk ki yi twïër nee røømge ki Jwøk; ni putge cuŋŋö tier kïdi piny.

¹⁸Kar kanyøgø Kïn Caynay atïmö na jïrö bäre, kiper mana ö Wuuö Jwøki na ö bäät kïdi manøgø ki maac. Ni put jïrö tïmö ni nyäälö bäät kïdi kaamar jïc dwaar, ni ö kïdi manøgø bäre ni put tïmö ni jäŋŋi døc.

¹⁹'Ba kanya tïme ni dwør tuuŋ jwöŋi ni cäätha maal ni døøŋŋø døøŋŋø, Modhe aluupö ni dwøgi ya Wuuö Jwøki jïgø ki dwør odäru.

²⁰Ni put Wuuö Jwøki öö bäät Kïn Caynay, wï kïdi kiree; ni ö Wuuö Jwøki ni cwöl Modhe baŋe wï kïdi manøgø, ni put Modhe ci maal.

²¹Køøre Wuuö Jwøk acäänö ki Modhe, ni kööe, ni «Ci piny, ni köömmï jiy nee keew mara ba kaalge ki man neenge aani, a na Wuuö Jwøk, kiper jø okaal gø bëët puta thøø.

²²Ni caanï gø jï dïlämme thuwø mo wø nyänh buuta nee dëëtge døøcge mo waany, kiper nee ge ba nääa, a na Wuuö Jwøk.»

²³'Ba Modhe aköö jï Wuuö Jwøk, ni «Jiy ba løny ki man öge bäät Kïn Caynay, kiper waana cemï ni kööï, ni ‹Tïïu ki keew lak kïdi manøgø bäre, nee kïdi manøgø bëëde na kïdi mo ena kur keere.› »

²⁴Køøre Wuuö Jwøk aköö jï Modhe, ni «Ci piny ni cäŋï duu maal, ni löömmu ka Aran; 'ba dïlämme ki jiy møga kär wëëk kaal keew nee öge baŋa, a na Wuuö Jwøk, kiper nee ge ba nääa.»

²⁵Ni ö Modhe ni put ö piny baŋ jiy ni caan dwørøgø jïge.