Read anuak Bwøth Wøk 2 Bible Online

Bwøth Wøk 2 - anuak bible

Bwøth Wøk 2

¹'Ba na tïme na kar kanyøgø, dhaanhø ma ŋat tuuŋ Libay acøø ni nyöömme ki dhaagø ma nyi jø tuuŋ Libay.

²Ni ö nyijøøgø ni jït yie ki dhaanhø ni lwaare ki gø na dïcwøø. 'Ba kanya joot gø na nyilaal mo mïërö, nyilaal akane ki dwäde adäk.

³'Ba kanya tïme ni nyilaal ba løny ki kan jïre këët, ena lwötö ki gïn mo caala luul mo ocwääö ko otöök, ni rwøth gø ko odhöönh mo nwaaŋ ki dwøø. Køøre nyilaal apïël yi gø, ni cøøe ni kïth gø yo otöök mana näk otuy deŋ naam.

⁴'Ba cöök nyilaalli mana näk nyakøø acuŋŋö kany mo bäär mëëth ni neeta coki ki gïno tägi dëër gø.

⁵Køøre nyi Peerø aö naam kuna lwöŋŋe, ni ö nyïïakuue moa näk jø tïïc moe ni cääthge bäät ageela. Ni ö nyi Peerø ni joot gïna näk caala luul yo otöök, ni jääŋ ŋat tïïc mare baŋ gø, ni ö nyaanøgø ni cøøe ni käl gø.

⁶'Ba kanya jap gø, eni nyilaal ajoode, ni nyilaal jwöŋö. Ni päth cwïnye ki gïr gø ni kööe, ni «Man beeye nyilaal mar jø Ibaru.»

⁷Køøre cöök nyilaarøgø aköö jï nyi Peerø, ni «?Ba beerra man cøøa naa cwöta ki nyi jø Ibaru mo kööre da caak, nee nyilaal dhwødhe jïrï?»

⁸Ni kö nyi Peerø jï cöök nyilaarøgø, ni «Ciï nø.» Ni ö nyilaarøgø ni cøøe ni cwøl mii nyilaal.

⁹Køøre nyi Peerø aköö jï nyijøøgø, ni «Lwør nyilaal man ni aayï ki gø ni dhwøthï gø jïra. 'Ba aani, ïïno mooa ki jammi na kar tïïc marï.» Ni ö nyijøøgø ni lwør nyilaal ni aae ki gø, ni bëëde ni dhwøtha gø.

¹⁰Ni ö nyilaalli ni rïënne, ni ö nyijøøgø ni kïth nyilaal baŋ nyi Peerø, ni tïme na wääde. Ni cak nyeŋ gø ni Modhe, ni kööe, ni «Tiere beeye kiper mana lääma gø wøk ki yïth pïï.»

¹¹'Ba dïcäŋ aciel, kanya tïme ni Modhe oløny ni dwøŋ, ena laŋ wøk baŋ tuuŋge, ni joot tïïc marge ni teek døc; ni joot ŋat Ibaru aciel na näk tuuŋge ni pwöt ŋat Ijepi pwödö.

¹²Køøre ena lwïthö kun ki kun; 'ba kanya joot gø ni bäŋ dhaanhø, eni ŋat Ijep anääe ni kan gø ya akwöö.

¹³'Ba na tïme na riet nïne ena cäŋ laŋ wøk, ni joot jø Ibaru ariiø ni ge këëdö keerge; ni kööe jï ŋata no obääyö, na «?Aŋø ni gøøyï wadu en?»

¹⁴'Ba ŋatøgø aköö, na «?Aŋa na tïïc ïïni na wïthwa na dïŋut luup bäätwa? ?Aŋø, ï manynya gø naa 'nägï, kaamar nyï Ijep mana 'nägï?» Køøre Modhe alwäyö, ni kööe, ni «Ka adïëri møn, gïnögø aløny ni ŋäc.»

¹⁵'Ba kanya ö Peerø na wïny gïnögø, ena tïmö ni manynya Modhe nee nääe. 'Ba Modhe apäär wøk po Peerø ni aae ni bëëde yi ŋööm jø Midien.

¹⁶'Ba Raguël na näk kwääc lam mar jø Midien jïre da obwöre abïriiø ma nyïïakuue. Dïcäŋ aciel ni Modhe opï piny bäät iith, nyïgögø aö kun töömge ki pïï, ni pääŋge yïth gïï wø mäth dïëki yïthge ki pïï, kiper nee dïëk wääge maathge.

¹⁷Køøre jø kwaath aöö ni riicge nyïgögø, 'ba Modhe aö maal ni køny geni, ni maath dïëkge.

¹⁸'Ba kanya duuge paac baŋ wääge ma Raguël, wääge aköö, na «?Aŋø, kee uuna laar duu paac dïcäŋi?»

¹⁹Ni köge, ni «Nyen mør ma nyï Ijep waana kønye ceŋ jø kwaath; ni tööme ki pïï thuwø ni maath dïëk.»

²⁰Ni kö Raguëlli jï nyïïe, na «?Age nyeneca? ?Aperŋø na weyu gø en? Cwøllu eni nee jïte ki gïn came.»

²¹'Ba Modhe yie met ki man bëëde buut Raguël. Køøre Raguël nyaare ma Dhipöra acïbe jï Modhe na dhaagø.

²²Køøre Dhipöra alwaar ki dhaanhø ma dïcwøø, ni ö Modhe ni cak nyeŋ dhaanhø ni Gërcöm, kiper mana kööe, ni «Aana bëëdö na wëëllö yïth ŋøøm mo path.»

²³'Ba na tïme na køør cwiiri mo thööth, nyeya mar Ijep athøw. Ni ö nyïïkwaac Icrielli ni coocge kiper bëët laŋ mana en bäätge, ni gööge ko oduuru; ni ö oduuru mana gøøcge kiper køny kiper bëët laŋ marge ni pïïe maal baŋ Jwøk.

²⁴Køøre Jwøk cooyø marge awïnynye; ni ö Jwøki ni par wïïe ki luumme na tuude ki Eeberam, ki Aydhak, ki Jeekap.

²⁵Ni ö Jwøki ni joot bëëtö mana teek na beet nyïïkwaac Icriel; ni ö Jwøki ni cäde kiperge.