Read anuak Bwøth Wøk 22 Bible Online

Bwøth Wøk 22 - anuak bible

Bwøth Wøk 22

¹«Ni näk dhaanhø dhieŋ wala diel ee kwalø, ni ŋaal gø wala ŋeewa gø, kuu manøgø doo cudö ki dhäk abïïc na kar dhieŋ mana kwale, wala dïëk aŋween na kar diel mana kwale.

²«Ni näk mo kuu omaaø ni turö ki øtø, ni gøøi ni thøøe, doo bäŋ kwöre.

³'Ba ni näk mo cäŋ onø tuulö bääte ni nääi, da kwöre. Ka adïëri møn, kuu manøgø doo na mare cuut cøøn. 'Ba ni näk mo bäŋ gïï cude ki ge kiper gïna kwale, eni doo ŋeeø na kar gïna kwale.

⁴'Ba ni näk mo lääy mana kwale ojoodø cere møn ni kwøw, nee dhieŋ wala arëën wala diel, dee coolø kwöre ariiø.

⁵«Ni näk mo dhaanhø lään paac mare ee køøl yi pwödhö wala ya ajïniina mo gïïa en yie onø kac, ni wec gø ni pööth yi pwöth ŋat mør mo poot kär kaaø, eni doo cudö røk liil moa en yi pwöthe wala ya ajïniina mare.

⁶«Ni näk mo dhaanhø juu moa en yi pwöthe nyebe nyebø, ni ö maaci manøgø ni nyaae ni gam luum ni pööth yi pwöth ŋat mør, ni waaŋ beel moa näk onø cooŋ wala beel moa näk poot kär kaaø, wala waaŋŋa pwödhö bäre, ka adïëri møn, ŋata nyep maac enø doo cudö.

⁷«Ni näk mo dhaanhø okän baŋ wati ki gwel wala gïï møøk, ni kwali bäät ŋatøgø, ni näk mo kuu manøgø omaaø, eni doo cudö kwöre ariiø.

⁸'Ba ni näk mo kuu manøgø kär maaø, wää øtø doo käla nyïm jø ŋøl luup, nee ŋäc møn ki man näk cere käre rwaak ri jap wati.

⁹Luup pïëm bëët moo tägi, nee kiper dhieŋ, wala kiper arëën, wala kiper diel, wala kiper abïï, wala kiper gïrpiny mo orwäänyö jaak, ni kö dhaanhe mørri, ni ‹Gïn beeye mara›, jøøgø na pïëmö yøø luubö marge dege käla nyïm jø ŋøl luup; ni ö ŋata jääl jø ŋøl luupi ni mare raac ni cude jï wati kwöre ariiø.

¹⁰«Ni näk mo dhaanhø bäät wati ee kännö ka arëën, wala dhieŋ, wala diel, wala lään paac mør jaak, ni thøøe wala da gïn mo otägö ree, wala maka ri leny ni bäŋ dhaanhø mo ojoot gø,

¹¹jøøgø na ariiø yøø doo kööŋ nyïm Wuuö Jwøk, nee ŋäc møn ni ŋata kän bääte enøgø cere käre rwaak ri jap wati. Ni ö wää lääyi manøgø ni jïëc gø, ni ö ŋata rwääny gïnögø bääte ni ba cude këët.

¹²'Ba ni näk mo kwalla bääte møn, eni doo cudö jï wää lääyi manøgø.

¹³Ni näk mo ocam lään paapi, dëëre mana dööŋ enøgø dee käla paac na nyuudhi. Eni ba doo cudö kiper mana cami ya lään paapi.

¹⁴«Ni näk mo dhaanhø pëëö ki lään paac baŋ wati, ni jït dëër läänögø ki gïn mo leth wala ni thøøe ni wää gø tøør ree, ka adïëri møn, ŋata pëëö enøgø doo cudö.

¹⁵'Ba ni näk wää gø nutö ree, ŋatøgø ba doo cudö. Ni näk mo käl kiper nee wää gø cunni, wär cääp ki gät cuut.

¹⁶«Ni näk mo dhaanhø maaŋŋa wï nyakøø mo dëër dïcwøø poot kuue mo poot kär miiø, ni ci baŋ gø na dhaagø, eni na tïïc gïnögø enø doo köödö ki gwel køør nyaanøgø ni tïme na cïïe.

¹⁷'Ba ni näk mo wää nyaanøgø okweer na bäre bäre ki man cïp nyaare jï ŋatøgø, ŋatøgø doo cudö ki gwel mo caala mo wø køøl køør nyakøø mo dëër dïcwøø poot kuue.

¹⁸«Dhaagø mo tïïya tïï thïëth jaak kär weyu ni kwøw.

¹⁹«Ŋat mo oci baŋ lääy jaak ni mare niine ki gø, ka adïëri møn, ŋatøgø doo nääö.

²⁰«Ŋat mo ocïpö ko olämi jï jwøk mør jaak, ni paa jïra, a na Wuuö Jwøk keera, wïïe doo dïdö na bäre bäre.

²¹«Käru bääyö dëër dhaanhø mo bëëdö na wëëllö mo path, ni ba tïïu ree ki gïn mo raac, kiper uuna bëëdö yi ŋööm Ijep ni uuna wëëlle mo path.

²²«Kär dee dhaagø ma cï thøø wala dhaanhø ma kïïc mo caannu.

²³'Ba ni näk mo ge you caannø, ni jwöŋge baŋa, a na Wuuö Jwøk, ka adïëri møn, kwac marge leŋa leŋø;

²⁴ni ö wëërri mara ni jääŋŋa gø bäätu, ni tïïa uuni nou thøwu ri leny; ni ö määnni mou ni tïmge na määr thuunhnhi, ni ö obwöre mou ni tïmge na kïïe mo bäŋ wëëkge.

²⁵«Ni näk mo dhaanhø aciel røk jiya moø bëëdö dïïu ni can yøø omäyö ki gwel baŋï ni cïpï gø jïre, ï ba doo tïmö na ŋat miï meeta gø bääte; gwetøgø ba diï lwørø baŋe nee duuge ni bääte da mëëdi.

²⁶Ni näk ma abïï rïëp mar wadu iï kälö na dïgïti, wär dwøgï jïre kanyo poode ni cäŋ poot kär pädhö;

²⁷kiper beeye mar rïëpa eni keere jïre, ni beeye abïï rïëp man wø rïëp dëëre ki gø. ?Aŋø, dagø mo odööŋ jïre këët mo rëëbe ki gø? Kanyo täk teeŋ gïnögønø, ni ö ŋata abïïne lwør ni jwöŋe ni pëënynya aani, eni dwøre leŋa leŋø, kiper aani a bëëdö ni yia met ki jiy.

²⁸«Kär Jwøk janynyï, ni ba cienï kwääc pou.

²⁹«Kärï ruu ki man laarï cïpö jïra ki muuy røk beel mo wø kayï, ki røk køøŋ nyïïomøki mo wø biiyï. Wäätu moa näk kaai bëët dou cïbö jïra.

³⁰Kaai mo dhäk mou ki kaai mo dïëk mou dou cïbö jïra thuwø. Kaa man nø røk kaai moøgø kanyo nywøli doo bëëdö ki menni ki nïne abïriiø; 'ba no tïme na bäc nïne, dou cïbö jïra.

³¹«U doo bëëdö ni uuna jiy mo ena kur keerge jïra. Kiper manøgønø, u ba doo cämö ki rïŋö mo kwany no ocam lääy mørri paap; teeŋ rïŋö manøgø dou leeŋa baŋ guu.