Read anuak Bwøth Wøk 25 Bible Online

Bwøth Wøk 25 - anuak bible

Bwøth Wøk 25

¹Køøre Wuuö Jwøk acäänö ki Modhe ni kööe,

²ni «Caanï jï jø Icriel nee cïpge ki muuce jïra. Ŋato yie met ki man cïp muuy mare jïra ki cwïnye bäre, wär lwørï baŋe.

³Muuce moo lwørï baŋge beege warkey, ki gwel-bïrö, ki nywïënyö ma jwïël,

⁴ki waare mo kïtge caala kït abïcøle, ki ma dïmuur, ki mo kwaar, ki waac lïïna mo tar mo mïërö, ki jïëc dïëk ma atëëe,

⁵ki pëët nyöök rööm mo otïïö ki kït mo kwayø, ki pëët lääy mo onyøŋø, ki jaadha cwøl ni cïta, [11]

⁶ki maar lamba, ki gïï wø ŋwääi ni met kiper nee jääp ki maar rööny man wø judö ki gø, ki gïï wø waaŋ wø jïye ŋwääi ni met,

⁷ki nyeŋ kïte moa cwøl ni cöyammi na näk kïte mo perge leth, ki teeŋ nyeŋ kïte møøk thuwø mo perge leth, kiper nee kïth dëër abïïna cwøl ni ëëput ka abïï käw ni wø käär Kwääy Lam Mana Dwøŋ.

⁸«Beerra man ö jiyi ni tïïge jïra ki kar lam mo ena kur keere, naa bëëda dïge.

⁹Gïnögø wär tïïyu na kare ki køør nyuudhi mar oduŋkaara na näk kar bëëtö mara ki nyuudhi mar jammi bëët moo manynyi kiper yie moo nyoodha jïrï.»

¹⁰«'Ba jø Icriel wär tïïge ka acanduk ki ri jaadha cwøl ni cïta, ni bär mare ki deŋŋe beeye rumme ariiø ki thääŋö, ni dööŋ yie beeye rumi aciel ki thääŋö, ni bär mare ki piny beeye rumi aciel ki thääŋö, ni rumme moøgø røm ka cenø.

¹¹Ni leenyï warkey mana tøŋ yie ki ŋääe wøk, ni jiiŋŋï deŋŋe bäre ni mïërö ki warkey ni caala aduda.

¹²Oguudi aŋween mo warkey diï thiiø kiper acanduk, ni kïthï ge tiete karge ŋweeri, no oguudi ariiø ena løøk aciel man, no oguudi ariiø møga ena løøk maya.

¹³Ni tïïï ki jer tëër ki ri jaadha cwøl ni cïta, ni leenyï warkey dëëtge.

¹⁴Jer tëër moøgø wär rwaak yïth oguudi moa en ra acanduk løøi ki løøi, nee tïmge na gïï biel acanduk ki ge.

¹⁵Jer tëër moøgø wär putge bëëtö yïth oguudi moa en ra acanduk, ni ba käl ge wøk këët ki ree.

¹⁶Køøre opäp kïte moa näk ciik ogöör bäätge ni wø nyooth luumma tuut Jwøki ki jiy moo cïba jïrï wär kïth ya acanduk manøgø.

¹⁷«Køøre rëëbi mar acanduk manøgø, na näk beeye nyuudhi mar wëën raay, wär tïïyï ki warkey mana tøŋ, ni bär mare beeye rumme ariiø ki thääŋö, ni dööŋ yie beeye rumi aciel ki thääŋö, ni rumme moøgø røm ka cenø.

¹⁸Wärï thädhï ki gïï ma ariiø mo caala nyïïatwiet maal moa cwøl ni kirubëlli ni tïïc ka warkey, ni ena bäät rëëbi mar acanduk mana näk nyuudhi mar wëën raay, na aciel man nø ena ya aŋuun rëëbi manøgø.

¹⁹'Ba wär tïïyï no ogääbö na aciel ki rëëbi, ni kirubël aciel ena ya aŋuun rëëbi man, ni kirubël maya ena ya aŋuunne maya.

²⁰Ni ö kirubëlli ni bëëtge ni bwöpge ege tïŋ maalø ni ege peerø, ni rëëbi mana näk nyuudhi mar wëën raay ege uumö ki bwöpge ni ge neeta nyeŋge; ni ö kirubëlli ni bëëtge ni wïthge ege kuul bäät rëëbi.

²¹Køøre nø, opäp kïte moa näk ciik ogöör bäätge ni wø nyooth luumma tuut Jwøki ki jiy moo cïba jïrï, wär kïth ya acanduk, ni kïthï rëëbi mana näk nyuudhi mar wëën raay bäät acanduk.

²²'Ba aano wäro røømmi ki ïïni kaace, ni cääna ki ïïni ni dwøra wïnyö ki bäät rëëbi mana näk nyuudhi mar wëën raay, yïthakic kirubëlli riet na en bäät acanduk maal, ni beeye acanduk man wø nyooth luumma tuut Jwøki ki jiy; ni caana ciik 'moa jïrï bëët na näk ciik kiper jø Icriel.»

²³«Køøre wärï tïïï ki tharabëëta ki ri jaadha cwøl ni cïta, ni bär mare ki deŋŋe beeye rumme ariiø, ni dööŋ yie beeye rumi aciel, ni bär mare ki piny beeye rumi aciel ki thääŋö, ni rumme moøgø røm ka cenø.

²⁴Ni leenyï warkey mana tøŋ dëëre, ni jiiŋŋï deŋŋe bäre ni mïërö ki warkey ni caala aduda.

²⁵Ni tïïï ki kwör mo owëënnö deŋŋe, mo lweedi mo cenø moa na aŋween røma yie; ni jiiŋŋï deŋŋe bäre kwöra näk owëënnö yøø ni mïërö ki warkey ni caala aduda.

²⁶Ni tïïï ko oguudi aŋween mo warkey kiper tharabëëta, ni kïthï oguudi moøgø deŋŋe kwöra en tiete na näk aŋween yïthge.

²⁷Oguudi wär tïïc ni karge cään ki kwöra näk owëënnö deŋŋe, nee tïmge na gïï mak jer tëër mo wø biel tharabëëta ki ge.

²⁸'Ba jer tëër wär tïïyï ki ri jaadha cwøl ni cïta, ni leenyï warkey dëëtge, ni ö jer tëër moøgø ni tïmge na gïï biel tharabëëta ki ge.

²⁹Wärï tïïï ki cäänne ka apät ko ogubääye ki kuure na mo thïïö ki jëëthe, ni gïïögø bëët tïïyï ka warkey mana tøŋ.

³⁰Køøre nø, muunni moa näk nyuuthe wär wø bëëde nyïma cooth bäät tharabëëta kaace nø.»

³¹«Køøre wärï tïïï ki gïn wø cuŋ lambae bääte ni tïïc ka warkey mana tøŋ. Gïn wø cuŋ lambae bääte doo thäädhö ni tägi ka tiere këël mano këët ri tuge; ni tïïc gïïa no ojiiŋŋø ni mïërö keda wïth jenni mo oŋøøk røk tuge, no ogääbö na aciel ki gø bäre.

³²'Ba tuge wär tïïc na abïciel; ni tuŋi adäk ena løøi, ni tuŋi adäk møga ena løøe løøga.

³³Gïïa no ojiiŋŋø ni mïërö kede wïth jenni mo oŋøøk wär tïïc na adäk ri tuuŋ aciel man nø røk tuŋi moa näk abïciel na en ri gïn wø cuŋ lambae bääte.

³⁴Ni ö dëër gïn wø cuŋ lambae bääte ni tïnynyi ki gïï mo ojiiŋŋø ni mïërö mo keda wïth jenni mo oŋøøk ma aŋween.

³⁵Teeŋ gïnögø aciel wär tïïc røk tuŋi piny moa näk okuurö na aciel moa dïkwøŋ, ni tïïö ki teeŋ gïnögø mør røk riet tuŋi piny, ki teeŋ gïnögø mør thuwø røk dää tuŋi piny, ni tïïc kiper tuŋi moøgø na abïciel bëët yøø mo otïïc ri gïn wø cuŋ lambae bääte.

³⁶'Ba gïn wø cuŋ lambae bääte manøgø, tuge ki gïïo no ojiiŋŋø ni mïërö yøø keda wïth jenni mo oŋøøk wär tïïc no ogääbö na aciel ki dëëre bäre, no othäädhö na warkey mana tøŋ.

³⁷«Køøre nø, wärï tïïï ki lambae abïriiø; ni kïthï lambae moøgø maal nee cïpge ki tar ni meenyge nyïm gïn wø cuŋ lambae bääte.

³⁸Gïï wø 'näk mäc lambae ki ge, ki cäänne moge wär näk mo tïïc ka warkey mana tøŋ.

³⁹Gïn wø cuŋ lambae bääte ki jape bëët wär tïïc ki warkey mana tøŋ mo røm ka rumi mana cwøl ni kikar. [12]

⁴⁰'Ba ï na Modhe en, gïïögø bëët wär ŋäyï ki man tïïyï ge na karge ki køør nyuudhi mana nyoodha jïrï bäät kïdi.»