Read anuak Bwøth Wøk 29 Bible Online

Bwøth Wøk 29 - anuak bible

Bwøth Wøk 29

¹«'Ba jöö mano tïïyï Aran ki wääte na jiy mo ena kur keerge ki gø, naa tïnyge ni gena dïlämme, beeye en. Wärï lwötï ki nyirøøa ma rwaath ki nyöök rööm ariiø mo bäŋ gïn mo jøøŋŋi dëëtge,

²ki muunni mo rege bäŋ thømmø, ni beege muunni mo rege bäŋ thømmø mo odeelø no opamø mo ojääbö ki maaw, ki muunni mo rege bäŋ thømmø mo odeelø no opamø ni reep mo bäätge okïthö ki maaw; ni muunni moøgø tïïc ka møø mo pøøth.

³Ni kïthï muunni moøgø yo opïr aciel, ni cïpï opïr manøgø na muuy ki nyirøøa na aciel mana näk rwaath ki nyöök rööm moa näk ariiø.

⁴Køøre Aran ki wääte diï käla dho oduŋkaany røømmø, ni lwøgï geni ki pïï.

⁵Ni lwørï abïïe, ni beege jalabiiya mana bäär ki jalabiiya mana ciek man wø røø tier abïïna cwøl ni ëëput, ki ëëput, ka abïï käw, ni røøï geni dëër Aran, ni twöï kaw mar abïï dëëre, ni beeye kaw man wø twöö ëëput piny ki gø na näk ocwääö ki riek waŋ;

⁶ni kïthï abïï man wø meen wïc wïïe, ni ö gïna no otïïö ni ŋwaŋŋi ki warkey na näk nyuudhi mar ŋat mo ena kur keere na mar Wuuö Jwøk ni twöï gø ra abïï man wø meen wïc manøgø.

⁷Køøre maaw mar rööny wär lwørï ni thiiï gø wï Aran ni røønyï eni.

⁸Ni cwølï wääte, ni ö jalabiiye moa näk okwøø ni bäyö ni røøï ge dëëtge,

⁹ni twöï kaae moa näk mo abïïe dëëtge, ni kïthï cöörri wïthge. Ni tïm tïï dïlämme ni ena ceŋge cooth, ni put tïïci manøgø bëëtö na ciik jïge. Ni manøgø beeye jöö mano cïbï tïïc mar Aran ki wääte ceŋge ki gø.

¹⁰«Køøre nyirøøa mana näk rwaath diï käla nyïm oduŋkaany røømmø, ni ö Aranni ki wääte ni cïpge ceŋge wï nyirøøa manøgø.

¹¹Ni ŋaalï nyirøøa manøgø nyïma, a na Wuuö Jwøk, dho oduŋkaany røømmø kaagø.

¹²Kanyøgønø wärï lwötï ki rem nyirøøa ki lweetï ni gweelï gïïa näk caala tuŋi ri gïn wø cïp olämme bääte; ni kønynyï remø bäre mana dööŋ dëër gïn wø cïp olämme bääte jï kun da piny en.

¹³Køøre oraapø mar dwäälö man wø en bäät ec, ko oraapø man wø en bäät cwïny, ki røgi karge riet ki dwäälö marge, wär lwørï ni waaŋï gø no olämi bäät gïn wø cïp olämme bääte.

¹⁴'Ba rïŋ nyirøøa manøgø, ki pïëne, ki weenynye moe, wär waaŋï ki maac ŋää twïër wøk; ni beeye olämi mar raay.

¹⁵«Køøre nywø røømmø aciel wär lwørï, ni ö Aranni ki wääte ni cïpge ceŋge wï nywø røømmø manøgø;

¹⁶ni ŋaalï nywø røømmø manøgø, ni lwørï remø mare ni jørï gø bäät gïn wø cïp olämme bääte deŋŋe manøgø bäre.

¹⁷Køøre nywø røømmø manøgø ŋøørï ŋøørø, ni penyï cïïn moe ki tiete, ni cïbï ge bäät gïn wø cïp olämme bääte ki wïïe bëët na aciel.

¹⁸Ni cïpï nywø røømmø manøgø bäre no olämi man wø waaŋ bäät gïn wø cïp olämme bääte; ni beeye olämi man wø waaŋ bäre jïra, a na Wuuö Jwøk, ni beeye gïn mo ŋwäänynye met, ni näk olämi man wø waaŋ jïra, a na Wuuö Jwøk.

¹⁹«Køøre nywø røømmø maya wär lwørï thuwø, ni ö Aranni ki wääte ni cïpge ceŋge wï nywø røømmø manøgø.

²⁰Ni ŋaalï nywø røømmø manøgø, ni lwötï ki remø ni gweelï olap ïth Aran mar bäät cwïïe, ko olap ïth wääte mo bäät cwïcge, ki lweet ceŋge moa døøŋŋø mo bäät cwïcge, ki lweet tietge moa døøŋŋø mo bäät cwïcge, ni jørï remø mana dööŋ bäät gïn wø cïp olämme bääte deŋŋe manøgø bäre.

²¹Køøre wärï lwötï ki remø ri remø mana en bäät gïn wø cïp olämme bääte, ni lwötï ki maaw ri maaw mar rööny ni wø judö ki gø, ni jørï gø dëër Aran ki dëër abïïge, ki dëët wääte ki dëët abïïkge, ni jørï na aciel ki wääge bëët. Kanyøgø nø, Aran ka abïïge, këël wääte na en kanya ciel ki eni ka abïïkge, tïmö ni ge ena kur keerge.

²²«Køøre dwäälö mar nywø røømmø manøgø, na näk dwäälö mana en jïbe, ko oraapø mar dwäälö man wø en bäät ec, ko oraapø man wø en bäät cwïny, ki røgi karge riet ki dwäälö marge, ki ääm mar bäät cwïïc wär lwørï, kiper nywø røømmø manøgø beeye mar rööny.

²³Ni lwötï ki møø aciel, ki møø aciel mør mo thiinh mo ojääbö ki maaw, ki møø aciel mør mo reep, ni lwørï røk muunni moa näk rege bäŋ thømmø na en yo opïr mana näk ocïp piny nyïma, a na Wuuö Jwøk;

²⁴ni cïbï gïïögø bëët ceŋ Aran ki ceŋ wääte, ni tuuŋge gïïögø yi jamø na jëëdhi man wø tuuŋŋi nyïma, a na Wuuö Jwøk.

²⁵Ni lwørï gïïögø ceŋge, ni waaŋï ge ko olämi man wø waaŋ bäre bäät gïn wø cïp olämme bääte, na gïn mo ŋwäänynye met nyïma, a na Wuuö Jwøk; ni beeye olämi man wø waaŋ jïra, a na Wuuö Jwøk.

²⁶«Køøre gøŋŋø mar nywø røømmø mana ŋaal na mar rööny, na Aran tïme na Kwääy Lam Mana Dwøŋ, wär lwørï, ï na Modhe en, ni tuuŋŋï gø yi jamø na jëëdhi man wø tuuŋŋi nyïma, a na Wuuö Jwøk, nee tïme ni beeye kurï eni.

²⁷«'Ba kwöra käl wøk ri nywø røømmø mar rööny mar Aran ki wääte, ni beege gøŋŋø mana tuuŋŋi yi jamø ki ääm, wär tïïyï nee bëëtge na gïï mo ena kur keerge.

²⁸Yi nyïme thuwø, moøgø wär tïmge na kur Aran ki wääte cooth røk olämme mo wø cïp jø Icrielli. Ni manøgø beeye jëëdhi mana doo cïp jø Icrielli jïra, a na Wuuö Jwøk, røk olämme mo wø duunni ki mëër.

²⁹«'Ba abïïe mo Aran na en kur keerge wär dööŋge jï wääde mano dööŋ kare, këël mano këët ri nyïïkwaaye, ni røøny geni ni cïp tïï Kwääy Lam Mana Dwøŋ ceŋge na abïïe moøgø ege røø.

³⁰Wär Aran mano dööŋ kar wänni na Kwääy Lam Mana Dwøŋ, abïïe moøgø wär røøe ni käär ge ki nïne abïriiø kany wø døny yo oduŋkaany røømmø ni mare tïïc kanya en kur keere.

³¹«'Ba rïŋ nywø røømmø mana ŋaal na mar rööny enø wär lwørï ni thaalï gø kany mo ena kur keere.

³²Ni ö Aranni ki wääte ni camge rïŋö manøgø, ki muunni moa näk ena yo opïr; ni camge dho oduŋkaany røømmø kaagø.

³³Gïïögø na cïp no okïdi mo wëënna raay yøø dege camø, ni cïba tïïc marge ceŋge ni tïmge na jiy mo ena kur keerge; 'ba dhaanhø mør jaak ba doo cämö rege, kiper gena gïï mo ena kur keerge.

³⁴'Ba ni näk mo rïŋö manøgø na näk mar rööny enø, wala muunni odhäthö ni këët amöölla, wär waaŋï ki maac; ni ba cami këët, kiper beege gïï mo oløny ni ena kur keerge.

³⁵«'Ba gïïögø diï tïïö na karge jï Aran ki wääte ki køør mana caana jïrï bäre; ni røønyï ge yïth nïrøgø na abïriiø yøø.

³⁶Dïcäŋ aciel man nø ï doo cïpö ki nyirøøa ma rwaath no olämi mar raay kiper nee tïme no okïdi mo wëënna raay, ni døøyï gïn wø cïp olämme bääte mo waany kanyo cïpï okïdi manøgø bääte; ni gweelï gø ki maaw nee tïme na gïn mo ena kur keere.

³⁷Okïdi man wø wëën raay wär tïïyï ki nïne abïriiø kiper gïn wø cïp olämme bääte nee tïme na gïn mo ena kur keere; køøre nø, gïn wø cïp olämme bääte tïmö na gïn mo ena kur keere mo pere leth, ni gïn mo gïnögø ee gudö jaak puta tïmö na gïn mo ena kur keere.

³⁸«'Ba olämme mo ocïpï cooth bäät gïn wø cïp olämme bääte beege nyïïdïëk ariiø mo cwiicge oceele kiper dïcäŋ aciel man nø.

³⁹Ni cïpï nyidiel aciel no olämi ka amöölla, ni cïpï maya no olämi kany wø tïme na abøøya;

⁴⁰ni cïp ka muuy mar møø mo pøøth ma rumi aciel ki ri caapiia mo yie da rumme apaar, mo ojääbö ki maaw ma cuŋguthi ariiø, ni cïpï ki køøŋ nyïïomøki ma cuŋguthi ariiø na jëëdhi thuwø kiper nyidiel aciel.

⁴¹'Ba nyidiel maya mano cïp no olämi kanyo tïm cäŋŋi ni manynya pädhö wär cïpï na aciel ki muuy mar møk beel, ki jëëdhi mar køøŋ nyïïomøki, ni caala mana cïp ka amöölla, kiper nee tïme na gïn mo ŋwäänynye met, ni beeye olämi man wø waaŋ ki maac jïra, a na Wuuö Jwøk.

⁴²«Manøgø wär tïme ni beeye olämi man wø waaŋ bäre cooth këël mano këët røk beenhnhe mou, ni cïpa dho oduŋkaany røømmø nyïma, a na Wuuö Jwøk, ni beeye kany wø røømma ki uuni yie, ni cääna ki uuni kaace.

⁴³Aano wäro røømmi ki jø Icriel kaace, ni tïm kaace na kany mo ena kur keere ki køør ajiem mara.

⁴⁴«'Ba aani oduŋkaany røømmø ki gïn wø cïp olämme bääte tïïa tïïö ni bëëtge na gïï mo ena kur keerge; ni tïïa Aran ki wääte na jiy mo ena kur keerge thuwø, naa tïnyge ni gena dïlämme.

⁴⁵Kanyøgø nø, aano bëëdö dï jø Icriel, ni puta bëëtö ni aana Jwøk marge.

⁴⁶Ni puti ya jø Icrielli ŋäc møn ni beeye aani na Wuuö Jwøk na näk Jwøk marge na käl geni wøk ki yi ŋööm Ijep, ki man bëëda dïge. Beeye aani na Wuuö Jwøk na näk Jwøk marge.