Read anuak Bwøth Wøk 3 Bible Online

Bwøth Wøk 3 - anuak bible

Bwøth Wøk 3

¹'Ba kanya bëët Modhe ni kwaaya dïëk wää cïïe na näk Jëthrö[4] na näk kwääc lam mar jø Midien, eni dïëk akøøl dï paap kuya, ni pïïe ri Kïn Körëp,[5] kïnna näk Kïn Jwøk.

²Kanyøgø nyïïatwiel maal mar Wuuö Jwøk ree anyoodhe jï Modhe ki yi maac mo liel dï abuŋŋö; ni ö Modhe ni lwïthe, ni joot abuŋŋö ni liel, 'ba abuŋŋö kär waaŋ.

³Køøre Modhe aköö, na «A doo gak nø, nee gïn ni rëëm ec en nee neena, ki man bëëde na abuŋŋö ba waaŋ enøgø.»

⁴'Ba kanya ö Wuuö Jwøki na neen gø ni Modhe gää kuna nëënne, Jwøk acwötö ki dï abuŋŋö ni kööe, ni «Modhe! Modhe!» Ni kö Modhe, ni «Aani en.»

⁵Ni kö Jwøki, ni «Kärï nyänh kany; gööny war moï wøk tietï, kiper kanyo cuŋŋi yie enø beeye ŋöömö mo ena kur keere.»

⁶Ni cäŋ köö, ni «Aana Jwø kwäyï, Jwøa näk Jwø Eeberam ki Aydhak ki Jeekap.» Kanyøgø Modhe täärnyïme aume kiper mana lwäye ki man neen Jwøk.

⁷Køøre Wuuö Jwøk aköö, ni «Ka adïëri møn, can mar jiya na en Ijep ajooda, ni wïnynya jwøk marge mana jwöŋge ki gø kiper gïïa leth na tïïc jø wø käär tïïe moge dëëtge. Aani gïïa jwørge bëët ŋääa.

⁸Ennø, aana ö piny kuna käla ge wøk ceŋ jø Ijep, kiper nee ge käla wøk yi ŋöömmöce, ni kïtha geni yi ŋöömma beer na näk yie laac, ni beeye ŋöömma näk caak ki maar kïc päl yie, na näk po jø Keenan ki jø Këth ki jø Amör ki jø Përec ki jø Ëwi ki jø Jeebuc.

⁹Ennø, jwøk mana jwöŋ jø Icrielli ki gø awïnynya; këël caannø thuwø mana ö jø Ijepi na caange geni ki gø, ajooda.

¹⁰Kiper manøgø nø, ï na Modhe en, ööï nø, niï jääŋŋa baŋ Peerø, kiper nee jiya ma jø Icriel nee kälï wøk ki yi Ijep.»

¹¹'Ba Modhe aköö jï Jwøk, ni «?Aana ŋa, ni ci baŋ Peerø kuna käla jø Icriel wøk ki yi Ijep en?»

¹²Ni kö Jwøki, ni «Ka adïëri møn, aano en buutï; 'ba gïno ŋäyï gø ki gø ni beeye aani na jääŋ ïïni beeye en, kanyo nø kälï jiy wøk ki yi Ijep, aano wøørru ni aana Jwøk maru bäät kïdi man en.»

¹³Køøre Modhe aköö jï Jwøk, «Beer nø; ennø, a cøøa baŋ jø Icriel ni kööa jïge, ni ‹Jwøk na näk Jwø kwäyu aana jääŋŋe baŋu.› A kanymør a pëënyge pëënynyö ni köge, ni ‹?Nyeŋ Jwøøgø aŋa?› ?Køøre nø, agïnaŋø noo løøa jïge?»

¹⁴Ni kö Jwøki jï Modhe, ni «Beeye aani ni nut en.» Ni cäŋ köö, ni «Wär caanï jï jø Icriel, ni ‹Jwøa cwøl ni «Aani ni nut en» bee eni na jääŋ aani baŋu.› »

¹⁵Ni cäŋ Jwøki köö jï Modhe, ni «Wär caanï jï jø Icriel, ni ‹Wuuö Jwøk[6] na näk Jwø kwäyu, na näk Jwø Eeberam ki Aydhak ki Jeekap, bee eni na jääŋ aani baŋu.› Wuuö Jwøk, na näk tiere beeye ‹Aani ni nut en› beeye nyeŋŋa na bäre bäre, na nyeŋ man wø ö jiyi wø parge wïthge ki aani ki gø këël yïth beenhnhe bëët.

¹⁶«Ciï ni cooŋï jø døøŋŋø mo jø Icriel kanya ciel ni kööï jïge, ni Wuuö Jwøk na näk Jwø kwäyu, na näk Jwø Eeberam ki Aydhak ki Jeekap, ree anyoodhe jïra ni kööe, ni ‹Ka adïëri møn, a cädö kiperu këël kiper gïïa tïïc dëëtu Ijep,

¹⁷ni beeye ni kööa ennø nou käla wøk ki yi Ijep na näk kar can, ni kïtha uuni po jø Keenan ki jø Këth ki jø Amör ki jø Përec ki jø Ëwi ki jø Jeebuc, yi ŋöömma näk caak ki maar kïc päl yie.›

¹⁸«'Ba geni dwørï mano caanï oleŋge. Køøre ïïni ki jø døøk Icriel u cøøa baŋ nyeny Ijep ni caannu gø jïre ni kööu, ni ‹Wuuö Jwøk na näk Jwø jø Ibaru ree anyoodhe jïwa. 'Ba ennø, wa kwaya ïïni ki man aawa dï paap kany mo caath ki nïne adäk kuna cïpwa ko olämme jï Wuuö Jwøk na näk Jwøwa.›

¹⁹'Ba aani ŋääa ni nyeny Ijep wääth ba cïbe jïïu ki man aayu ni näk mo ba tïïc ka teek.

²⁰'Ba aani cera orwiea bäät jø Ijep, ni tïïa gïï mo leth dëëtge ki ri gïï mo rëëma ec moo tïïa yi Ijep. Køøre nø, wääth cïbe cïbö jïïu.

²¹Ni tïïa jø Ijep na jiy mo yïthge met ki uuni; køøre kanyo tïme na kar wääth maru, u ba aay jaak ki ceŋŋu.

²²Kiper dhaagø man nø ŋat atut mare, wala dhaaŋŋa bëëtge ki gø na aciel yi øtø mare, di pëënynyö kiper jap warkey, ki jap gwel-bïrö, ka abïïe, ni kïthu ge dëët wäätu ki nyïïu, ni putu jø Ijep twier.»