Read anuak Bwøth Wøk 30 Bible Online

Bwøth Wøk 30 - anuak bible

Bwøth Wøk 30

¹«Køøre wärï tïïï ki gïn wø waaŋ gïn wø jïye ŋwääi ni met bääte ki ri jaadha cwøl ni cïta.

²Ni bär mar deŋŋe beeye rumi aciel, ni dööŋ yie beeye rumi aciel, ni deŋŋe karge ŋweeri röömi; ni ö bärri mare ki piny ni tïï na rumme ariiø, ni rumme moøgø røm ka cenø. Wïth deŋŋe maal karge ŋweeri wär tïïc ni da gïï mo caala tuŋi, no ogääbö na aciel ki dëër gø bäre.

³'Ba bääte maal, ki bute ki deŋŋe bäre, ki gïïa no otïïö ni caala tuŋi, wär lëënynyï ki warkey mana tøŋ. Ni ö deŋŋe bäre ni tïïi ni mïërö ki warkey ni caala aduda.

⁴Wärï thïïï ko oguudi ariiø mo warkey kiper nee kïth deŋŋe mana no otïïö ni mïërö jï piny; ni kïthï oguudi moøgø bute karge riet na näk dïët, nee tïmge na gïï mak jer tëër mo biel gïna näk caala tharabëëta ki ge.

⁵'Ba jer tëër moøgø wär tïïyï ki ri jaadha cwøl ni cïta, ni lëënynyï dëëtge ki warkey.

⁶«Køøre gïn wø waaŋ jer wø jïcge ŋwääi ni met bääte enø wär cïp ŋää abïï wøk man wø gëëŋ kanya en kur keere na pere leth ki gø, ni dïët ka acanduk man wø nyooth luumma tuut Jwøki ki jiy, na en kany wø røømma ki ïïni yie.

⁷Ni ö Aranni ni waaŋ gïn wø jïye ŋwääi ni met bäät gïnögø, ni waaŋe ka amöölla man nø cooth kany wø jiiŋ lambae.

⁸Ni cäŋ gïn wø jïye ŋwääi ni met waaŋŋø kany wø nyep lambae kany wø tïm cäŋŋi ni manynya pädhö. Kanyøgønø, gïn wø jïye ŋwääi ni met bëëdö ni di waaŋø cooth nyïma, a na Wuuö Jwøk, këël mano këët røk beenhnhe moo ööi bëët.

⁹Kär dee teeŋ gïn wø jïye ŋwääi ni met mør jaak mo waaŋï bäät gø, ni kär niï cïpö ko olämi man wø waaŋ wala muuy mar beel bääte. Kär dee jëëdhi mar køøŋ nyïïomøki mo kønynyï bääte.

¹⁰'Ba Aran wär tïïe ko okïdi mar wëën raay røk gïïa näk caala tuge yie aciel ki yi cwiir; okïdi mar wëën raay manøgø wär tïïc Aranni ki rem olämi man wø cïp no okïdi mar wëën raay, ni beeye yie aciel ki yi cwiir cooth këël mano këët røk beenhnhe mou moo ööi bëët. Gïnö ni caal tharabëëta enø beeye gïn mo ena kur keere mo pere leth jï Wuuö Jwøk.»

¹¹Kanyøgø Wuuö Jwøk acäŋ cäänö ki Modhe, ni kööe,

¹²ni «Kanyo kwaanï jø Icriel moa näk cwøw ni marï kwäny, ŋati man nø doo cïpö jïra, a na Wuuö Jwøk, ki jap cuut kwör kiper dëëre, kiper kanyo kwaanï ge nee bäŋe gïn mo leth mo pïï dëëtge.

¹³Gïno cïp ŋati man nø røk jiy moo kwaan beeye thääŋ gwelø mar rumi mana cwøl ni cekel, [15] ni røm na kare ki køør rumi mar kar lam na en kur keere. Ni tïm jammi moøgø ni cïpa jïra, a na Wuuö Jwøk.

¹⁴Jiy moo kwaan wär täk ki jiy moa näk cwiicge pïërariiø këël wïthge, ni ö ŋati man nø dëët jiy moa kwaan bëët ni cïp jammi moøgø na karge jïra, a na Wuuö Jwøk.

¹⁵'Ba kanyo cïpu jammi moøgø jïra, a na Wuuö Jwøk, ni caala okïdi mo wëën raay moo tïïyu kiper dëëtu, ŋata noo kwär ba doo cïpö ki gwel mo thööth ni kaala thääŋ rumi mana cwøl ni cekel; ni ö ŋata canni ni ba cïpe ki gwel mo nøk moo rëëm ki thääŋ rumi mana cwøl ni cekel.

¹⁶'Ba ï na Modhe en, japa näk caala okïdi mo wëën raay yøø wär lwørï baŋ jø Icriel, ni cïpï ge na jap tïïc mo oduŋkaany røømmø, nee tïmge na jap par wïc jïra, a na Wuuö Jwøk, kiper jø Icriel, ni caala okïdi moo tïïyu kiper dëëtu, ni wø wëën raay mou.»

¹⁷Køøre Wuuö Jwøk acäŋ cäänö ki Modhe, ni kööe,

¹⁸«Wärï tïïï ki gïr lwøk mo caala thecet ni tïïc ka nywïënyö ma jwïël, ni tïïyï gïre man wø cïbi bäät gø ki nywïënyö ma jwïël thuwø; ni cïbï gø yïthakic oduŋkaany røømmø ki gïn wø cïp olämme bääte, ni kïthï yie ki pïï.

¹⁹Ni ö Aranni ki wääte ni lwøkge ceŋge ki tietge røk pïï moa en yie;

²⁰ni kany wø dønyge yo oduŋkaany røømmø, ge doo löö røk pïï moøgø, nee ge ba thøwge. Ni kany wø nyänhge buut gïn wø cïp olämme bääte ni marge tïïc, ni ge cïpö ko olämme mo wø waaŋ ki maac bäät gø jïra, a na Wuuö Jwøk,

²¹geni ceŋge ki tietge dege lwøø, nee ge ba thøwge. Ni ö gïnögø ni put tïmö na ciik kiper Aran ki wääte ki nyïïkwaaye këël mano këët røk beenhnhe moge moo ööi.»

²²'Ba Wuuö Jwøk acäŋ cäänö ki Modhe ni kööe,

²³ni «Lwötï ki gïï mo ŋwääö ni met; ni beege dwøø mo poot jööm mar jaadha cwøl ni kerbëë ma rumme ma dïpe abïïc mar rumi mana cwøl ni cekel, ka apøk jaath man wø ŋwääi ni met ma rumme ma dïpe ariiø ki pïërabïïc mar rumi mana cwøl ni cekel, ki teeŋ thieŋ mo wø ŋwääi ni met ma rumme ma dïpe ariiø ki pïërabïïc mar rumi mana cwøl ni cekel,

²⁴ki teeŋ jaath mør mo ŋwääö ni met ma rumme ma dïpe abïïc mar rumi mana cwøl ni cekel, ki køør rumi mar kar lam na en kur keere, ki maar nyïïjer wø nyïïge wel na maaw ma rumi aciel mar rumi mana cwøl ni in.

²⁵Ni tïïï ki maar rööny man wø judö ki gø mo ena kur keere ki gïïögø, na riia mo ŋwääi ni met, ni tïïya dhaanhe mo waŋe riek ki tïïc manøgø, nee bëëde na maar rööny man wø judö ki gø mo ena kur keere.

²⁶Køøre oduŋkaany røømmø, ka acanduk man wø nyooth luumma tuut Jwøki ki jiy,

²⁷ki tharabëëta ki jap tïïc moe bëët, ki lambae ki gïna cuŋge bäät gø ki jap tïïc moe bëët, ki gïn wø waaŋ gïn wø jïye ŋwääi ni met bääte,

²⁸ki gïn wø cïp olämme mo wø waaŋ bääte, ki jap tïïc moe bëët, ki gïr lwøk na näk caala thecet ki gïre man wø cïbi bäät gø, wär gweelï ki maaw manøgø.

²⁹Manøgø beeye jöö mano cïbï gïïögø kur keerge ki gø, ni putge tïmö na gïï mo ena kur keerge ni perge leth; ni gïn moo gut ge jaak puta tïmö na gïn mo ena kur keere.

³⁰«Ni jørï Aran ki wääte niï røønya geni, ni cïbï geni kur keerge, naa tïnyge ni gena dïlämme.

³¹'Ba wär caanï jï jø Icriel, ni kööï jïge, ni ‹Man en beeye maaw mo ena kur keere na mar rööny man wø judö ki gø, ni wø tïny aani ki gø këël mano këët røk beenhnhe mou bëët moo ööi.

³²Maaw manøgø kär wïïr dëër dhaanhø jaak, ni kär dee teeŋe mo tïïyu tïïö ni caala gø; kiper beeye maaw mo ena kur keere, ni put bëëtö ni ena kur keere jïïu.

³³'Ba ŋat moo tïïö jaak ki teeŋe, wala ŋat moo wïïr dëër dhaanhø mør ki gø jaak, ŋatøgø wär tïme ni tøør yïthakic tuuŋge.› »

³⁴Køøre Wuuö Jwøk acäŋ köö jï Modhe, ni «Lwötï ki gïï wø waaŋ ni wø ŋwääi ni met, ni beege teeŋ dwøk moa cwøl ni natap, ki cekëëleth, ki kelbena, ki teeŋ dwøø maya mana tar døc mana cwøl ni leböna;[16] ni lwør ni röömi ki røkge bëët.

³⁵Ni tïïï ki gïn wø jïye ŋwääi ni met ki gïïögø, ni tïïya dhaanhe mo waŋe riek ki tïïc manøgø, no ojääbö ka acäbö, no otïïö na kare, na gïn mo ena kur keere.

³⁶Ni lwötï ree ni wälï gø no oŋeth, ni cïbï gø nyïm acanduk man wø nyooth luumma tuut Jwøki ki jiy na en yo oduŋkaany røømmø, ni beeye kany wø røømma ki ïïni yie; ni put tïmö na gïn mo ena kur keere mo pere leth jïïu.

³⁷'Ba gïn wø jïye ŋwääi ni met manøgø noo tïïyï enø, kär teeŋe tïïyu kiper dëëtu; 'ba wär tïme ni ena kur keere jïïu kipera, a na Wuuö Jwøk.

³⁸Ni ŋat wäro tïïö ki teeŋe jaak, nee tïïe na gïn wø ŋwääi ni met jïre, wär tïme ni tøør yïthakic tuuŋge.»