Read anuak Bwøth Wøk 32 Bible Online

Bwøth Wøk 32 - anuak bible

Bwøth Wøk 32

¹'Ba kanya ö jø Icrielli na jootge gø ni Modhe oruu ni kär laar duu piny ki bäät kïdi, geni dëëtge acooŋge buut Aran, ni köge jïgø, ni «Ööï, ni tïïï jïwa ki juu mo cäädhi nyïmwa; kiper nyenøgø na Modhe enø, na käl waani wøk ki yi ŋööm Ijep, gïna no otägö dëëre kucwa.»

²Ni kö Aranni jïge, ni «Tøyu gwet ïdhi mo warkey na en ïth määru ki wäätu ki nyïïu, ni kälu geni baŋa.»

³Køøre jiy bëët gwet ïdhi mo warkey moa en ïthge aputge tøyø ni kälge ge baŋ Aran.

⁴Ni ö Aranni ni lwør gïïögø ceŋge, ni leeny ge na gïn mo caala nyirøøa, ni tieŋ gø ki gïn wø tëëŋö ki gø; ni köge, ni «Wui, jø Icriel, moi beege juu mou na käl uuni wøk ki yi ŋööm Ijep.»

⁵'Ba kanya ö Aranni na neen gïnögø, ena tïïö ki gïn wø cïp olämme bääte nyïm nyirøøa; ni ö Aranni ni gøø awaaci piny, ni kööe, ni «Diøø tïmö ni da ajwöma jï Wuuö Jwøk.»

⁶'Ba na tïme na amöölla cøøn gena put päny maal ni cïpge ko olämme mo wø waaŋ, ni känge ko olämme mo wø duunni ki mëër; ni ö jiyi ni pïge piny ni cämge ni mäthge, ni öge maal ni mielge.

⁷Køøre Wuuö Jwøk acäänö ki Modhe, ni kööe, ni «Laar ci piny, kiper jiyï, na kälï wøk ki yi ŋööm Ijep, dëëtge araanyge keerge.

⁸Gena laar gaa wøk ki øtjöö mana köömma geni ki gø, ni tïïge ki gïn mo oleenyø mo caala nyirøøa kiper dëëtge, ni wøørge gø, ni cïpge ko olämme jïgø, ni köge, ni ‹Wui, jø Icriel, moi beege juu mou na käl uuni wøk ki yi ŋööm Ijep.› »

⁹Ni cäŋ Wuuö Jwøki köö jï Modhe, ni «Aani jøøgø aneena døøc; ka adïëri møn, gena jiy mo wïthge teek.

¹⁰'Ba ennø, wec aani, nee wëër mara jääŋŋa bäätge, nee ge raanynya; 'ba ïïni, ïïno tïïa na wï jur mo päl.»

¹¹Kanyøgø Modhe Wuuö Jwøk na näk Jwøe akwaae, ni kööe, ni «Wui, Kwäärö Wuuö Jwøk, ?aperŋø na kööï ni wëër marï jääŋŋï jääŋŋö bäät jiyï na kälï wøk ki yi ŋööm Ijep ki køør teek badï na dwøŋ?

¹²?Aŋø, a jø Ijep noo köge, ni ‹Jwøk jiye akäl wøk ki rääc ec nee nää yïthakic kïte, ni raany geni bäät piny›? Awuuö Jwøk, akwaya ïïni ki man cïbï cwïnyï piny ni wiilï acaara marï, ni ba tïïï ki gïn mo raac dëët jiyï.

¹³Caar wïïï ki Eeberam ki Aydhak ki Icriel, na näk jiyï, na kööŋï jïge ki dëërï kiree, ni kööï, ni ‹Aani nyïïkwaayu otïïa nee nyaacge ni caala ceer mo maal, ni cïba ŋöömö man bäre ni cääna kipere en jï nyïïkwaayu, ni put tïmö na marge na bäre bäre.› »

¹⁴Kanyøgø Wuuö Jwøk cwïnye aware ki gïna dee tïïö na raac dëët jiye na caane.

¹⁵Køøre Modhe aduu piny ki bäät kïdi no opäp kïte moa näk ariiø na näk ciik ogöör bäätge kääre käärö ki cere, ni beege opäp kïte moa näk ogöörö ki kwöre bëët, ni beege ki løøi ki løøk maya.

¹⁶'Ba opäp kïte moøgø tïïya Jwøki; ni gööre moa näk ogöör bäätge, gööra Jwøki.

¹⁷'Ba kanya ö Jøcua na wïny dööt jiy ni ge lweelli døc, ena köö jï Modhe, ni «Da dwøl mo keda dwør leny mo ena twïër.»

¹⁸'Ba Modhe aköö, ni «Manøgø ba wïnyi na dööt jiy mo orëëmmo wala dööt jiy mo oböötö; 'ba dwøl manøgø ni wïnynya enø beeye dwør meeŋ.»

¹⁹'Ba kanya tïme ni Modhe kare cään ki twïër, gïna näk caala nyirøøa ajoode, ni jiy miel; ni ö Modhe ni put wëër døc, ni leeŋ opäp kïte piny na en cere, ni putge tøyø tier kïdi kaagø.

²⁰Ni lwør gïna näk caala nyirøøa na näk ege tïïö, ni waaŋ gø ki maac, ni guur gø këël mana tïme ni caala tør, ni køny gø bäät pïï, ni tïïc gø nee maath jø Icrielli.

²¹Køøre Modhe aköö jï Aran, na «?Agïnaŋø na tïïc jøøi dëërï, ni kïthï bääyö man ni dwøŋ bäätge en?»

²²Ni kö Aranni, ni «Kwäärö, kärï wëër ki aani døc; ïïni ki dëërï kiree, ŋäyï ni jøøi ii cwïnyge ena køør gïï mo reyø.

²³Kiper beeye geni na köö ki aani, ni ‹Ööï ni tïïï jïwa ki juu mo cäädhi nyïmwa; kiper nyenøgø na Modhe enø, na käl waani wøk ki yi ŋööm Ijep, gïna no otägö dëëre kucwa.›

²⁴Ni kööa jïge, ni ‹Ŋat mo jïre da warkey jaak, wär tuur wøk.› Ni putge gø tïïc ni kälge gø baŋa, ni leeŋa gø yi maac, ni put tïmö na gïna näk caala nyirøøa enø.»

²⁵'Ba kanya ö Modhe na joot jiy ni bëëdö ka wïthge keerge, kiper mana weyi Aranni nee bëëtge ki wïthge keerge, ni tïmge na jiy mo ojøøŋŋø ki baŋ nyïïmänge;

²⁶kanyøgø eni na Modhe enø, ena ci dhi kiir mar twïër, ni kööe, ni «Ŋat mo ena løø Wuuö Jwøk jaak, beerra man ö baŋa.» Ni ö nyïïkwaac Libay moa näk cwøw bëët ni putge rege cooŋ buute.

²⁷Ni kö Modhe jïge, ni «Gïna caan Wuuö Jwøki na näk Jwø Icriel beeye en, ena köö, ni ‹Ŋati man nø dëëtu opëëllö mare dee lwørø, ni cøøe ni cäädhe dï kiir bäre, ni 'näk ŋata joode ni bëëdö ka wïïe, këël coki, këël watge, këël ŋat atut mare.› »

²⁸Ni ö nyïïkwaac Libay ni putge gø tïïc kaawat mana caani ya Modhe, ni thøw jiyi mo jïtö ki kume adäk dïcäŋeca.

²⁹Køøre Modhe aköö, ni «Kiper na cïbu dëëtu kur keeru jï Wuuö Jwøk dïcäŋ man en, ni männu ki wäätu ki nyïïmëëgu, Wuuö Jwøk thuwø uuna gwïëdhe dïcäŋ man en.»

³⁰'Ba na tïme na aruunnø man, Modhe aköö jï jø Icriel, ni «Uuni, uuna bääyö ki bääyö mo dwøŋ døc kiree; 'ba ennø, a cøøa maal bäät kïdi baŋ Wuuö Jwøk; kanymør løny jïra ki man dee gïn mo tïïa tïïö mo wëënna bääyö maru.»

³¹Køøre Modhe adøø baŋ Wuuö Jwøk, ni kööe, ni «Wui Awuuö Jwøk, jøøgø abääyö ki bääyö mo dwøŋ døc kiree, ni tïïge ki juu ma warkey kiper dëëtge.

³²'Ba ennø, ni näk løny, beerra man wëënnï bääyö marge; 'ba ni näk mo ba løny, akwaya ïïni nee nyeŋŋa raanynyï yi wëëlö mana näk nyeŋ jiyï iï göör yie.»

³³Ni kö Wuuö Jwøki jï Modhe, ni «Ŋata näk obääyö dëëra beeye noo nyeŋŋe raanynya yi wëëlö mara.

³⁴'Ba ennø, ciï ni bwødhï jø Icriel kanya näk yaa caanø jïrï. Ka adïëri møn, nyïïatwiel maal mara ojääŋŋa nyïmï; 'ba kanyo tïme na kar ŋøl luup, kar kaaca nø bääyö marge oŋøla bäätge.»

³⁵Køøre Wuuö Jwøk gïï mo leth ajääŋŋe bäät jø Icriel kiper gïna tïïcge na wøørge gïna näk caala nyirøøa mana tieŋ Aranni.