Read anuak Bwøth Wøk 33 Bible Online

Bwøth Wøk 33 - anuak bible

Bwøth Wøk 33

¹Køøre Wuuö Jwøk acäänö ki Modhe, ni kööe, ni «Aayu kany, ni beeye ïïni ki jøøgø na kälï wøk ki yi ŋööm Ijep yøø; ni cou yi ŋöömma kööŋa kipere jï Eeberam, ki Aydhak, ki Jeekap, na kööa, ni ‹Ŋöömö manøgø cïba cïbö jï nyïïkwaayu.›

²'Ba nyïïatwiel maal ojääŋŋa nyïmï, ni riemma jø Keenan, ki jø Amör, ki jø Këth, ki jø Përec, ki jø Ëwi, ki jø Jeebuc.

³Cou yi ŋöömma näk caak ki maar kïc päl yie; 'ba kiper mana näk uuna jiy mo wïthu teek, a ba cäädhi na aciel ki uuni, nou ba thööra øtjöö.»

⁴'Ba kanya ö jiyi na wïnyge luup moøgø na reyø yøø, cwïnyge apädhö døc, ni bäŋe dhaanhø dïge mo jap mïërö moe ee kïth dëëre.

⁵Gïnögø atïïcge kiper Wuuö Jwøk onø cäänö ki Modhe ni kööe, ni «Caanï jï jø Icriel, ni kööï jïge, ni ‹Uuna jiy mo wïthu teek; ni näk mo aano cäädhö na aciel ki uuni këël kany mo thiinh jaak, u puta ka thöör. 'Ba ennø, kälu jap mïërö mou wøk dëëtu; køøre nø, gïno tïïa kiperu løny man ŋääa gø.› »

⁶Kanyøgønø, jø Icriel dëëtge aputge loony ni kärge jap mïërö moge dwøk dëëtge këët, ki mana täkge ki ri Kïn Körëp.[17]

⁷'Ba Modhe da oduŋkaara mo wø gure wøk ŋää twïër, ni kare bäär mëëth ki twïër, ni cwøl gø no oduŋkaany røømmø. Ni kany wø tïme ni da ŋat mo manynya Wuuö Jwøk, eni cøøa wøk kanya en oduŋkaany røømmø yie ŋää twïër.

⁸'Ba kany wø tïme ni Modhe manynya ci yo oduŋkaany røømmø, jiy bëët puta ö maal ni cuŋge, ni ŋati man nø ena dho oduŋkaara mare, ni nyeŋge ege tee ri Modhe këël mano døny yo oduŋkaany røømmø.

⁹Ni kany wø døny Modhe yo oduŋkaany røømmø, pöölö puta ö piny, ni cuŋŋe dho oduŋkaara; ni ö Wuuö Jwøki ni put cäänö ki Modhe.

¹⁰'Ba kany wø ö jiyi wø jootge pöölö ni cuŋŋö dho oduŋkaara, jiy bëët puta ö maal ni wøørge nyeŋ Wuuö Jwøk, ni ŋati man nø ena dho oduŋkaara mare.

¹¹Ni ö Wuuö Jwøki ni cääne ki Modhe ni løøŋge dhøkge ki gø, kaawat man wø cään dhaanhe ki nyawatge jaak. 'Ba kany wø duu Modhe twïër, ŋat tïïc mare ma nyen mo poot na wøp, na näk Jøcua o Nun, ree bäŋ wø daae yo oduŋkaara kaace.

¹²Køøre Modhe aköö jï Wuuö Jwøk, ni «Neenï, ïïna köö ki aani, ni ‹Bwøth jøøgø.› 'Ba ïïni ŋato jääŋŋï ki aani kärï caanø jïra. Ni cäŋï köö ki aani thuwø, ni ‹Ï yaa nø ŋäc døc, ni yia met ki ïïni.›

¹³'Ba ennø, ni näk mo yiï met ki aani møn, a kwaya ïïni ki man nyoothï acaara marï jïra, naa bëëda niï ŋääa, ni putï bëëtö ni yiï met ki aani. Ni caarï wïïï thuwø ki wï jur manøgø, ni ŋäyï gø ni beege jiy moï.»

¹⁴Ni kö Wuuö Jwøki jï Modhe, ni «Aano cäädhi ki ïïni ciel, ni mooa ïïni ki jwömö.»

¹⁵Køøre Modhe aköö jï Wuuö Jwøk, «Ni näk miï ba aay ki waani ciel, kär wa wëëk wääth kany.

¹⁶?Aŋø, ni näk miï ba aay ki waani, oŋääi nidïï ni yiï met ki aani ki jøøi na näk jiyï ii, ni waana jiy mo wa ena kur keerwa dï jiy moa en bäät piny bëët?»

¹⁷'Ba Wuuö Jwøk aköö jï Modhe, ni «Aani gïna cäänï kipere enøgø tïïa tïïö møn; kiper yia met ki ïïni, ni ï yaa nø ŋäc cøøn.»

¹⁸Køøre Modhe aköö, «Wui, Awuuö Jwøk, akwaya ïïni, nyooth ajiem marï jïra.»

¹⁹Ni kö Wuuö Jwøki jï Modhe, ni «Aani ki dëëra kiree mara na beer tïïa tïïö nee pöödhe ki nyïmï, ni køba gïr nyeŋŋa nyïmï, a na Wuuö Jwøk; kiper met ec mara wø nyoodha nyoodhø jï ŋato kööa ni yia met ki gø, ni nyoodha bäth ec mara jï ŋato kööa ni bäth ec mara nyoodha nyoodhø jïre.»

²⁰'Ba Wuuö Jwøk acäŋ köö, ni «Ïïni täärnyïma ba løny ki man neenï gø, kiper ŋat maa ee neenø jaak ba cäŋ bëëtö ni kwøw këët.»

²¹Køøre Wuuö Jwøk aköö, ni «Neenï, da kany mo ena buuta, ni løny jïrï ki man cuŋŋï bäät kïdi kaace;

²²ni kany wø tïme na ajiem mara pöönhnhö ki kaagø, ïïno kïtha yi kään kïdi ni uuma ïïni ki cera këël mano pöödha ki kaagø.

²³Køøre nø, cera oläwa käl wøk, ni tïme niï neena dïŋääa; 'ba täärnyïma ba doo neenø ennø.»