Read anuak Bwøth Wøk 35 Bible Online

Bwøth Wøk 35 - anuak bible

Bwøth Wøk 35

¹Køøre Modhe lwaa Icriel bäre acooŋ kanya ciel ni kööe jïge, ni «Gïï ii beege gïïa ö Wuuö Jwøki na kööm uuni ki ge nee tïïyu.

²Tïïe doo tïïö ki nïne abïciel, 'ba noo tïme na bïriet nïne beeye cäŋ mo ena kur keere jïïu, ni beeye cäŋ jwömö man jwömmu rou yie, na cäŋ jwömö jï Wuuö Jwøk; ni ŋat mo tïïö jaak ki cäŋ jwömö, ka adïëri møn, wär thøøe.

³Kär dee mäc mo liel kwör bëëte mou ki cäŋ jwömö.»

⁴Køøre Modhe acäänö ki lwaa Icriel bäre, ni kööe, ni «Gïn en beeye gïna cem Wuuö Jwøki, ena köö,

⁵ni ‹Cïpu ki muuce jï Wuuö Jwøk; ŋato yie met ki man cïpe ki muuy ki cwïnye bäre, beerra man käl gø na muuy jï Wuuö Jwøk; ni muuce moøgø beege warkey, ki gwel-bïrö, ki nywïënyö ma jwïël;

⁶ki waare mo kïtge caala kït abïcøle, ki ma dïmuur, ki mo kwaar, ki waac lïïna mo tar mo mïërö, ki jïëc dïëk ma atëëe;

⁷ki pëët nyöök rööm mo otïïö ki kït mo kwayø, ki pëët lääy mo onyøŋø, ki jaadha cwøl ni cïta;

⁸ki maar lamba, ki gïï wø ŋwääi ni met kiper nee jääp ki maar rööny man wø judö ki gø, ki gïï wø waaŋ wø jïye ŋwääi ni met;

⁹ki nyeŋ kïte moa cwøl ni cöyammi na näk kïte mo perge leth, ki teeŋ nyeŋ kïte møøk thuwø mo perge leth, kiper nee kïth dëër abïïna cwøl ni ëëput ka abïï käw ni wø käär Kwääy Lam Mana Dwøŋ.

¹⁰« ‹Beerra man ö jiyi bëët moa nyeŋge reegø ki tïïc dïïu ni öge, ni tïïcge jammi bëët moa cem Wuuö Jwøki ni tïïc;

¹¹ni beeye oduŋkaara na näk kar bëëtö mar Wuuö Jwøk, ki rëëpe moe, ki nywïëny moe mo dhøkge ogønø, ko opämi moe, ki jenni moe mo caala läämme, ki cööthe moe, ki gïï wø cwöth tiel yïthge moe;

¹²ka acanduk ki jer tëër moe, ki rëëbi mar acanduk manøgø, na näk beeye nyuudhi mar wëën raay, ka abïï man wø gëëŋ kanya en kur keere na pere leth ki gø;

¹³ki tharabëëta ki jer tëër moe, ki jap tïïc moe bëët, ki muunni moa näk nyuuthe;

¹⁴ki gïn wø cuŋ lambae bääte thuwø kiper tar man wø liel, ki jap tïïc moe, ki lambae, ki maar lamba;

¹⁵ki gïn wø waaŋ gïn wø jïye ŋwääi ni met bääte ki jer tëër moe, ki maar rööny man wø judö ki gø, ki gïn wø waaŋ ni wø jïye ŋwääi ni met, ka abïï mana näk mar gëëŋ kiper dho oduŋkaara na näk kar bëëtö mar Wuuö Jwøk;

¹⁶ki gïn wø cïp olämme mo wø waaŋ bääte, ki gïna näk otïïö ki nywïënyö ma jwïël ni keda oŋana, ki jer tëër moe, ki jap tïïc moe bëët, ki gïr lwøk na näk caala thecet ki gïn wø cïbi bäät gø;

¹⁷ka abïïe mo wø lïër na kal, ki jer kal ki gïï wø cwöth tietge yïthge, ka abïï mo mar gëëŋ kiper dhi kal;

¹⁸ki dïnööy mo oduŋkaara na näk kar bëëtö mar Wuuö Jwøk, ki dïnööy mo kal, ki thøøli moge;

¹⁹ka abïïe moa näk ocwääö ki riek waŋ kiper tïï dïlämme kanya en kur keere, ni beege abïïe moa en kur keerge kiper Aran na näk Kwääy Lam Mana Dwøŋ, ka abïïe mo wääte, kiper tïïc marge mar dïlämme.› »

²⁰Køøre lwaa Icriel bäre aput aay buut Modhe.

²¹Ni ö jiyi bëët moa näk cwïnyge ojïëy ni yïthge met ki man cïpge muuce ki cwïnyge bäre, ni öge ni putge cïpö ki muuce jï Wuuö Jwøk kiper tïïc mar oduŋkaany røømmø ki jap tïïe mo yie bëët, ki jap tïïe mo abïïe moa en kur keerge.

²²Køøre jiy bëët moa yïthge met ki man cïpge ki muuce ki cwïnyge bäre, ni beege cwøw ki mään bëët, gena put cïpö ki jammi moa näk tïïc ka warkey, ni beege warkey mo cwägi, ki gwet ïdhi, ki gwet lweedi, ko oguudi mo ceŋ; ni ö jøøgø bëët ni cïpge muuce mo warkey moøgø jï Wuuö Jwøk.

²³Ni ö ŋati man nø dëët jiy bëët moa näk jïge da waare mo kïtge caala kït abïcøle, ki ma dïmuur, ki mo kwaar, ki waac lïïna mo tar mo mïërö, ki jïëc dïëk ma atëëe, ki pëët nyöök rööm mo otïïö ki kït mo kwayø, ki pëët lääy mo onyøŋø, ni kälge ge.

²⁴Ni ö ŋati man nø dëët jiy moa näk yïthge met ki man cïpge ki muuce ma gwel-bïrö ki nywïënyö ma jwïël, ni putge ge cïp jï Wuuö Jwøk; ni ö ŋata näk jïre da jaadha cwøl ni cïta ni cïp gø kiper tïïe moa no omanynyø.

²⁵Ni ö määnni bëët moa nyeŋge reegø ki tïï weny waare, ni wïnyge ki waare, ni cïpge waare moa näk ege wenyø yøø na näk kïtge caala kït abïcøle, ki ma dïmuur, ki mo kwaar, ki waac lïïna mo tar mo mïërö.

²⁶Ni ö määnni bëët moa näk cwïnyge ojïëy ni nyeŋge reegø ki tïï weny waare, ni wenyge jïëc dïëk moa näk atëëe.

²⁷Ni ö jiyi moa näk dïbwöthe ni känge ki nyeŋ kïte moa cwøl ni cöyammi na näk kïte mo perge leth, ki nyeŋ kïte møøk thuwø mo perge leth, kiper nee kïth dëër abïïna cwøl ni ëëput, ka abïï käw.

²⁸Ni känge ki gïï wø ŋwääi ni met, ki maaw kiper maar rööny man wø judö ki gø, ki gïï wø waaŋ wø jïye ŋwääi ni met, ki maar lamba.

²⁹Kanyøgø jø Icriel moa näk cwøw ki moa näk mään bëët, na näk yïthge met ki man cïpge ki muuce mo jap tïïc bëët ki cwïnyge bäre, kaawat mana ö Wuuö Jwøki na kööm Modhe nee tïïe, muuce moge aputge cïp ki met ec jï Wuuö Jwøk.

³⁰Køøre Modhe aköö jï jø Icriel, ni «Neennu, Wuuö Jwøk, Bacaliil wär Uri na näk nyikwaar Ur, na en ri tuuŋ Juuda, ajiere.

³¹Ni mooc gø ki Jwïëc Jwøk, nee jïte ki leec wïc, ki riek waŋ man ŋäc acaara, ki riek waŋ man kwany jammi ki man ŋäc teeŋ tïïe bëët;

³²ni løny jïre ki man cäde ni nyøth tïï warkey, ki gwel-bïrö, ki nywïënyö ma jwïël,

³³ki tïï tieŋ nyeŋ kïte moa perge leth mo wø kïth yïth gïï wø maai piny ki ge, ki tïï tieŋ jenni, nee lønye jïre ki man cäde ni tïïc teeŋ tïïe bëët ki riek waŋ.

³⁴Wuuö Jwøk thuwø Bacaliil, ko Oliyap wär Aycamak, na käl ri tuuŋ Daan, ee mooø ka acaara ki man nyøthge jïëth tïïe jï jiy møøk.

³⁵Ni tïïc geni na jiy mo nyeŋge reegø ki tïïc, ki man ŋäcge teeŋ tïïe bëët, kaamar tïï rëëmmö, ki tïï ŋat wø nyøth tïïe, ki tïï ŋat wø cwääö ki waare mo kïtge caala kït abïcøle, ki ma dïmuur, ki mo kwaar, ki waac lïïna mo tar mo mïërö, ki tïï ŋat wø cwääö ka abïïe; ni gena jiy mo tïïe bëët ka acaare mo wø nyøth tïïe ki ge ŋäcge.