Read anuak Bwøth Wøk 37 Bible Online

Bwøth Wøk 37 - anuak bible

Bwøth Wøk 37

¹Kanyøgø Bacaliil acanduk atïïe ki jaadha cwøl ni cïta; ni bär mare ki deŋŋe beeye rumme ariiø ki thääŋö, ni dööŋ yie beeye rumi aciel ki thääŋö, ni bär mare ki piny beeye rumi aciel ki thääŋö, ni rumme moøgø røm ka cenø.

²Ni leeny warkey mana tøŋ yie ki ŋääe wøk, ni jiiŋ deŋŋe bäre ni mïërö ki warkey ni caala aduda.

³Ni thïïe ko oguudi aŋween mo warkey kiper acanduk, ni kïth ge tiete karge ŋweeri; no oguudi ariiø ena løøk aciel man, no oguudi ariiø møga ena løøk maya.

⁴Ni tïïe ki jer tëër ki ri jaadha cwøl ni cïta, ni lëëny dëëtge ki warkey.

⁵Ni rwaak jer tëër moøgø yïth oguudi moa en ra acanduk løøi ki løøi, na acanduk bielli ki ge.

⁶Ni tïïc rëëbi mar acanduk manøgø ki warkey mana tøŋ, ni beeye rëëbi mana näk nyuudhi mar wëën raay; ni bär mare beeye rumme ariiø ki thääŋö, ni dööŋ yie beeye rumi aciel ki thääŋö, ni rumme moøgø røm ka cenø.

⁷Ni thädhe ki gïï ma ariiø mo caala nyïïatwiet maal moa cwøl ni kirubëlli ni tïïc ka warkey, ni ena bäät rëëbi mar acanduk mana näk nyuudhi mar wëën raay, na aciel man nø ena ya aŋuun rëëbi manøgø.

⁸Ni tïïc ge no ogääbö na aciel ki rëëbi, ni kirubël aciel ena ya aŋuun rëëbi man, ni kirubël maya ena ya aŋuunne maya.

⁹Ni put kirubëlli bëëdö ni bwöpge ege tïŋ maalø ni ege peerø, ni rëëbi mana näk nyuudhi mar wëën raay ege uumö ki bwöpge ni ge neeta nyeŋge; ni ge bëëdö ni wïthge ege kuul bäät rëëbi.

¹⁰Køøre Bacaliil tharabëëta atïïe ki jaadha cwøl ni cïta, ni bär mare ki deŋŋe beeye rumme ariiø, ni dööŋ yie beeye rumi aciel, ni bär mare ki piny beeye rumi aciel ki thääŋö, ni rumme moøgø røm ka cenø.

¹¹Ni leeny warkey mana tøŋ dëër gø, ni jiiŋ deŋ gø bäre ni mïërö ki warkey ni caala aduda.

¹²Ni tïïc tharabëëta ni da kwör mo ee wëënnö deŋŋe, ni lweedi mo cenø moa näk aŋween røma yie; ni jiiŋ deŋŋe bäre kwöra näk ee wëënnö ni mïërö ki warkey ni caala aduda.

¹³Ni tïïe ko oguudi aŋween kiper tharabëëta, ni kïth oguudi moøgø deŋŋe kwöra en tiete yïthge na näk aŋween.

¹⁴Ni tïïc oguudi ni karge cään ki kwöra näk ee wëënnö deŋ tharabëëta, ni tïmge na gïï mak jer tëër mo wø biel tharabëëta ki ge.

¹⁵Ni tïïc jer tëër moøgø ki ri jaadha cwøl ni cïta, ni leeny warkey dëëtge, ni putge tïmö na gïï biel tharabëëta ki ge.

¹⁶Ni tïïc jammi bëët mo wø bëëdö bäät tharabëëta ki warkey mana tøŋ; ni beege cäänne ka apät ko ogubääye ki kuure na näk mo thïïö ki jëëthe.

¹⁷Køøre Bacaliil gïn wø cuŋ lambae bääte atïïe ki warkey mana tøŋ. Ni tïïc gø ni di thäädhö ni tägi ka tiere këël mana këët ri tuge; ni tïïc gïïa no ojiiŋŋø ni mïërö keda wïth jenni mo oŋøøk røk tuge no ogääbö na aciel ki gø bäre.

¹⁸'Ba tuk gïn wø cuŋ lambae bääte manøgø beege abïciel, ni tuŋi adäk ena løøi, ni tuŋi adäk møga ena løøe løøga.

¹⁹Ni ö gïïa no ojiiŋŋø ni mïërö ni keda wïth jenni mo oŋøøk ni tïïc ge na adäk ri tuuŋ aciel man nø røk tuŋi moa näk abïciel na en ri gïn wø cuŋ lambae bääte.

²⁰'Ba dëër gïn wø cuŋ lambae bääte da gïï mo ojiiŋŋø ni mïërö mo keda wïth jenni mo oŋøøk ma aŋween thuwø;

²¹ni teeŋ gïnögø aciel ee tïïö røk tuŋi piny moa dïkwøŋ na näk okuurö na aciel, ni tïïe ki teeŋ gïnögø mør røk riet tuŋi piny, ki teeŋ gïnögø mør thuwø røk dää tuŋi piny, ni tïïe kiper tuŋi moøgø na abïciel bëët yøø na en ri gïn wø cuŋ lambae bääte.

²²'Ba tuge ki gïïa no ojiiŋŋø ni mïërö yøø keda wïth jenni mo oŋøøk, atïïe ni ee gääbö na aciel ki dëër gø bäre. Ni thääth dëër gø bäre na gïrpiny aciel, ni tïïe ki warkey mana tøŋ.

²³Ni ö lambae abïriiø moe, ki gïï wø 'näk mäc moge ki ge, ki cäänne moge, ni tïïc ge ki warkey mana tøŋ.

²⁴'Ba gïn wø cuŋ lambae bääte ki jape bëët atïïe ki warkey mana tøŋ mo røm ka rumi mana cwøl ni kikar. [18]

²⁵Køøre Bacaliil gïn wø waaŋ gïn wø jïye ŋwääi ni met bääte atïïe ki jaadha cwøl ni cïta; ni bär mar deŋŋe beeye rumi aciel, ni dööŋ yie beeye rumi aciel, ni deŋŋe karge ŋweeri röömi; ni bär mare ki piny beeye rumme ariiø, ni rumme moøgø røm ka cenø. Ni tïïc wïth deŋŋe maal karge ŋweeri ni da gïï mo caala tuŋi, ni ee gääbö na aciel ki dëër gø bäre.

²⁶'Ba bääte maal, ki bute ki deŋŋe bäre, ki gïïa no otïïö ni caala tuŋi, alëënynye ki warkey mana tøŋ. Ni tïïc deŋ gø bäre ni mïërö ki warkey ni caala aduda.

²⁷Ni thïïe ko oguudi ariiø mo warkey, ni kïth ge deŋ gïna näk caala tharabëëta kwöra no otïïö ni mïërö jï piny, ni ena bute karge riet na näk dïët, na gïï mak jer tëër mo biel gïna näk caala tharabëëta ki ge.

²⁸Ni tïïc jer tëër moøgø ki jaadha cwøl ni cïta, ni lëëny dëëtge ki warkey.

²⁹Ni tïïc maar rööny man wø judö ki gø mo ena kur keere; ni tïïc gïn wø jïye ŋwääi ni met thuwø no otïïö na kare, ni tïïc ka teeŋ gïï wø ŋwääi ni met, ni tïïya dhaanhe mo waŋe riek ki tïïc manøgø.