Read anuak Bwøth Wøk 38 Bible Online

Bwøth Wøk 38 - anuak bible

Bwøth Wøk 38

¹Køøre Bacaliil gïn wø cïp olämme bääte atïïe ka jaadha cwøl ni cïta; ni bär mare ki deŋŋe beeye rumme abïïc, ni dööŋ yie beeye rumme abïïc, ni deŋŋe karge ŋweeri röömi, ni bär mare ki piny beeye rumme adäk, ni rumme moøgø røm ka cenø.

²Ni tïïe ki gïï mo caala tuŋi mo ena maal wïth deŋŋe karge ŋweeri, ni tuŋi moøgø ee gääbö na aciel ki dëër gïn wø cïp olämme bääte, ni lëëny dëër gø bäre ki nywïënyö ma jwïël.

³Ni tïïc jap gïn wø cïp olämme bääte bëët ki nywïënyö ma jwïël, ni beege dääe moe mo wø jøøp bur yïthge, ka akaape, ki cäänne, ki gïï wø lääm rïŋ wøk ki ge, ka athääk jwëëlli mo wø käär mäc ki ge.

⁴Ni tïïe ki gïn mo keda oŋana kiper gïn wø cïp olämme bääte manøgø, ni tïïe ka nywïënyö ma jwïël no okatø ni caala ajääp, ni ena yi gïn wø cïp olämme bääte no onyiik piny mëëth dïëre ni ena tier gïna no opööth wøk ki deŋŋe.

⁵Ni thïïe ko oguudi aŋween ni kïth ge dëër gïn wø cïp olämme bääte, ni ena deŋ gïna näk keda oŋana karge ŋweeri na no otïïö ki nywïënyö ma jwïël enø, nee tïmge na gïï mak jer tëër.

⁶Ni jer tëër moøgø tïïe ka ri jaadha cwøl ni cïta, ni lëëny dëëtge ki nywïënyö ma jwïël.

⁷Ni tïïc jer tëër moøgø ni di rwaagø ki yïth oguudi moa en buut gïn wø cïp olämme bääte manøgø, kiper kany wø tïme ni di käärö nee bielli ki ge. 'Ba gïn wø cïp olämme bääte manøgø ee tïïö ko opämi, ni yi gø ee wiiø ni ŋaam.

⁸Køøre Bacaliil gïr lwøk mo caala thecet ki gïre man wø cïbi bäät gø atïïe ki nywïënyö ma jwïël mana näk cïläälcae mo wø neen dëël ki ge mo määr wø tïïö dho oduŋkaany røømmø mana dïkwøŋ.

⁹Køøre Bacaliil kal atïïe ka abïïe; ni tïïc abïï mar gëëŋ man wø lïër løø kal jï kuna en tier-piny ka abïï ma lïïna mo tar mo mïërö ma gööye ma dïpa.

¹⁰'Ba jer kal beege pïërariiø, ki gïï wø cwöth tietge yïthge ma pïërariiø thuwø, ni ge tïïc ka nywïënyö ma jwïël; ni nywïëny moa no ogøn mo jer kal ki gïï wø maai piny ki ge beege gïï mo tïïc ka gwel-bïrö.

¹¹Løø kal jï kuna en wï-piny thuwø otïïö ni da abïï mo olïërö mo bär mar deŋŋe beeye gööye ma dïpa, ki jer kal ma pïërariiø, ki gïï wø cwöth tietge yïthge ma pïërariiø, ni ge tïïc ka nywïënyö ma jwïël; ni nywïëny moa no ogøn mo jer kal ki gïï wø maai piny ki ge beege gïï mo tïïc ka gwel-bïrö.

¹²'Ba løø kal ki jï løø kur pänh-cäŋ otïïö ni da abïï mo olïërö mo bär mare beeye gööye ma pïërabïïc, ki jer kal ma apaar, ki gïï wø cwöth tietge yïthge ma apaar thuwø; ni nywïëny moa no ogøn mo jer kal ki gïï wø maai piny ki ge beege gïï mo tïïc ka gwel-bïrö.

¹³'Ba dööŋ yi kal ki jï løø kur tuul-cäŋ beeye rumme ma pïërabïïc, ni røm ka cenø.

¹⁴Buut dhi kal løøk aciel man otïïö ni da abïï mo olïërö mo bär mar deŋŋe beeye gööye apaar kurbïïc, ki jer kal moe ma adäk, ki gïï wø cwöth tietge yïthge ma adäk thuwø.

¹⁵Ni tïïc løøk maya ni da abïï mo olïërö ma gööye apaar kurbïïc, ki jer kal moe ma adäk, ki gïï wø cwöth tietge yïthge ma adäk thuwø.

¹⁶Abïïe bëët moa no olïërö na en deŋ kal bäre beege abïïe mo tïïc ka waac lïïna mo tar mo mïërö.

¹⁷'Ba gïï wø cwöth tiet jer kal yïthge beege gïï mo tïïc ka nywïënyö ma jwïël; ni nywïëny moa no ogøn mo jer kal ki gïï wø maai piny ki ge beege gïï mo tïïc ka gwel-bïrö; ni wïth jer kal moøgø olëënynyö ki gwel-bïrö, ni jer kal moøgø bëët otïïö ni da gïï wø mäk piny ki ge moe mo tïïc ka gwel-bïrö.

¹⁸'Ba abïï mar gëëŋ mana näk mar dhi kal ocwääö ki waare mo kïtge caala kït abïcøle, ki ma dïmuur, ki mo kwaar, ki waac lïïna mo tar mo mïërö; ni cwääya dhaanhe mo waŋe riek ki tïïc manøgø. Ni bär mar deŋ abïï mar gëëŋ manøgø beeye gööye ma pïërariiø, ni bär mare ki piny beeye gööye abïïc, no opäärö ka abïïe moa no olïërö ri kal manøgø.

¹⁹Jer kal moe beege aŋween, ki gïï wø cwöth tietge yïthge ma aŋween thuwø mo tïïc ka nywïënyö ma jwïël; ni nywïëny mo jer kal moa no ogøn beege gïï mo tïïc ka gwel-bïrö, ni wïth jer kal moøgø olëënynyö ki gwel-bïrö, ni gïï wø mäk piny ki ge moe beege gïï mo tïïc ka gwel-bïrö thuwø.

²⁰Dïnööy bëët moa näk mo oduŋkaara na näk kar bëëtö mar Wuuö Jwøk, ki moa näk mo kal na en deŋŋe bäre, beege gïï mo tïïc ka nywïënyö ma jwïël.

²¹'Ba moi beege kwään jammi moa tïïc oduŋkaara ki ge, na näk kar bëëtö mar Wuuö Jwøk, na näk oduŋkaara mar luumma tuut Jwøki ki jiy, na kwaan ki køør mana caan Modhe, ni kwaana jø tuuŋ Libay ni ge bwøtha Itamer wär Aran na näk Kwääy Lam Mana Dwøŋ.

²²'Ba Bacaliil wär Uri na näk nyikwaar Ur, na en ri tuuŋ Juuda, jammi bëët moa ö Wuuö Jwøki na kööm Modhe ki ge atïïe.

²³'Ba ŋata tïïge ki gø beeye Oliyap wär Aycamak, na en ri tuuŋ Daan, na näk rëëmmö, na ŋat wø nyøth tïïe, na ŋat wø cwääö ki waare mo kïtge caala kït abïcøle, ki ma dïmuur, ki mo kwaar, ki waac lïïna mo tar mo mïërö.

²⁴'Ba warkey bäre mana cïp na muuy jï Wuuö Jwøk, na tïïö ki gø, ni tïïca oduŋkaara na en kur keere, beeye rumme ma pïërariiø ka abïŋween mar rumi mana cwøl ni kikar[19] ki rumme ma dïpe abïriiø ki pïëradäk mar rumi mana cwøl ni cekel, ni røm na kare ki køør rumi mar kar lam na en kur keere.[20]

²⁵Gwel-bïrö mana cïp jiyi moa näk cwøw moa kwany beeye rumme ma dïpa mar rumi mana cwøl ni kikar, ki rumme ma kuma aciel ki dïpe abïriiø ki pïërabïriiø kurbïïc mar rumi mana cwøl ni cekel, ni røm na kare ki køør rumi mar kar lam na en kur keere.

²⁶'Ba gïna cïp ŋati man nø dëët jiy moa kwaan, beeye thääŋ gwelø mar rumi mana cwøl ni cekel, ni cïp no orømø na kare ki køør rumi mar kar lam na en kur keere. Ni jiy moa näk cwøw na kwaan ni cwiicge tägi ka pïërariiø këël wïthge, beege jiy ma kume ma dïpe abïciel ka adäk ki dïpe abïïc ki pïërabïïc.

²⁷'Ba gwel-bïrö ma rumme ma dïpa mar rumi mana cwøl ni kikar beeye na thiew na gïï wø cwöth tiet opämi yïthge mo oduŋkaara na näk kanya en kur keere, ki cööthe mo abïï man wø gëëŋ kanya en kur keere na pere leth ki gø; ni gïï wø cwöth tiel yïthge moge na dïpa yøø, tïïc ka gwel-bïrö ma rumme ma dïpa mar rumi mana cwøl ni kikar; ni rumi aciel man nø, orømø kiper gïn wø cwöth tielø yie aciel man nø.

²⁸Ni rumme mo gwet-bïrö moa näk kuma aciel ki dïpe abïriiø ki pïërabïriiø kurbïïc mar rumi mana cwøl ni cekel beeye na tïïc nywïëny moa no ogøn ki gø kiper jer kal, ni leeny wïth jer kal ki gø, ni tïïe ki gïï wø mäk piny ki ge kiper jer kal ki gwel-bïrö manøgø.

²⁹'Ba nywïënyö mana näk jwïël na cïp na muuy jï Wuuö Jwøk beeye rumme ma pïërabïriiø mar rumi mana cwøl ni kikar, ki rumme ma kume ariiø ki dïpe aŋween mar rumi mana cwøl ni cekel.

³⁰Nywïënyö manøgø na jwïël enø beeye na tïïc Bacaliilli na gïï wø cwöth tiet cööthe yïthge mo dho oduŋkaany røømmø, ki gïn wø cïp olämme bääte ki gïre mana näk keda oŋana, ki jap tïïc bëët mo gïn wø cïp olämme bääte manøgø,

³¹ki gïï wø cwöth tiel yïthge mo jer kal na näk kal owïrö ki ge, ki gïï wø cwöth tiel yïthge mo jer dhi kal, ki dïnööy bëët mo oduŋkaara na näk kar bëëtö mar Wuuö Jwøk, ki dïnööy bëët mo kal na en deŋŋe bäre.