Read anuak Bwøth Wøk 39 Bible Online

Bwøth Wøk 39 - anuak bible

Bwøth Wøk 39

¹Køøre gena cwääö ka abïïe kiper kanyo ö Aranni noo tïïc tïï Kwääy Lam Mana Dwøŋ kanya en kur keere, ni cwääcge abïïe moøgø ki riek waŋ ki waare mo kïtge caala kït abïcøle, ki ma dïmuur, ki mo kwaar, ni beege abïïe mo ena kur keerge, ni cwääcge na kare kaawat mana ö Wuuö Jwøki na kööm Modhe.

²'Ba abïïna cwøl ni ëëput acwääcge ki waare mo kïtge caala kït abïcøle, ki ma dïmuur, ki mo kwaar, ki waac lïïna mo tar mo mïërö, ki warkey.

³Ni warkey manøgø ege thäädhö ni reep døc, ni ŋørge gø ni caala waare, ni løny ki man cwääö ki gø no orwöbö ki waare moa näk kïtge caala kït abïcøle, ki ma dïmuur, ki mo kwaar, ki waac lïïna mo tar mo mïërö; ni tïïya dhaanhe mo waŋe riek ki tïïc manøgø.

⁴'Ba abïï mana cwøl ni ëëput, røk gööge karge riet atïïcge ni da gïï ma ariiø mo gääba gø ki kwöra näk da gööge.

⁵Ni ö kaw mar abïï man wø twöö abïïna cwøl ni ëëput piny ki gø ni puti cwääc ki riek waŋ ni caala ëëput; ni cwääc ka cwääc ka teeŋ gïïa cwääc ëëput ki ge, ni beege warkey, ki waare mo kïtge caala kït abïcøle, ki ma dïmuur, ki mo kwaar, ki waac lïïna mo tar mo mïërö, no ocwääö na kare kaawat mana ö Wuuö Jwøki na kööm Modhe.

⁶Køøre kïte moa cwøl ni cöyammi na näk kïte mo perge leth atïïcge, ni kïthge ge yïth gïï wø maai piny ki ge mo tïïc ka warkey; ni kïte moøgø ni perge leth yøø, nyeŋ wäät Icriel ogöör bäätge.

⁷Ni kïthge kïte moøgø ni perge leth yøø kwöra näk da göök abïïna cwøl ni ëëput, ni putge bëëdö na kïte mo wïc di parø ki køørge kiper nyeŋ wäät Icriel na en dëëtge, ni ege tïïö na kare kaawat mana ö Wuuö Jwøki na kööm Modhe.

⁸Køøre gena tïïö ka abïï käw, ni tïïya dhaanhe mo waŋe riek ki tïïc manøgø, ni caala tïïc mana tïïc abïïna cwøl ni ëëput ki gø; ni tïïc ka warkey, ki waare mo kïtge caala kït abïcøle, ki ma dïmuur, ki mo kwaar, ki waac lïïna mo tar mo mïërö.

⁹'Ba abïï käw manøgø otïïö ni deŋŋe röömi bëët, no obanø na dïrïbi, ni bär mar deŋŋe beeye rumi mar yïthakic lweedi, ni dööŋ yie beeye rumi mar yïthakic lweedi thuwø no nø ban na dïrïbi.

¹⁰Ni kïthge dëër gø ki teeŋ kïte mo perge leth mo mïërö ni ege caanø na kwöre aŋween. Ni mana dïkwøŋ beeye mar kïte moa perge leth, ni beege mo kwaar ni caala dha adhieŋ, ki mo piilli kaamar warkey, ki mo ŋwaŋŋi døc mo caala keenh-orwëëdhö;

¹¹ni rietge beeye mar kïte moa perge leth, ni beege mo ränni ni tøŋ, ki mo caala dïmuuy, ki mo piilli ni lïw;

¹²ni dääge beeye mar kïte moa perge leth, ni beege mo caala abïcøle, ki mo caala otïït, ki mo caala dïmuur;

¹³ni ŋweerge beeye mar kïte moa perge leth, ni beege mo caala okwëër, ki kïdi mo pere leth mo cwøl ni cöyam, ki mo ŋwaŋŋi døc ni tøŋ keda wïlli. Ni kïte moøgø ni perge leth bëët yøø ena yïth gïï wø maai piny ki ge mo tïïc ka warkey kanya kïthge ge dëër abïï käw.

¹⁴Kïte moøgø ni perge leth yøø beege kïte apaar kurriiø, na aciel man nø nyeŋ dhaanhø aciel røk wäät Icriel ogöör bääte ni nyootha wïth tuŋi apaar kurriiø mo jø Icriel.

¹⁵Køøre dëër abïï käw akïthge ki tiimme mo caala thøøl mo owenyø, ni tïïc ka warkey mana tøŋ.

¹⁶Ni tïïge ki gïï wø mäk piny ki ge ma ariiø ki warkey, ni tïïge ko oguudi ariiø mo thiiw ka warkey thuwø, ni gänge oguudi moøgø karge riet ra abïï käw røk deŋŋe moa en maal karge riet.

¹⁷Køøre tiimme moa näk ariiø yøø na näk caala thøøl mo owenyø aroopge ki yïth oguudi moa näk ariiø na en røk deŋ abïï käw.

¹⁸Ni ö dhøk tiimme møga ni roopge ge ki yïth gïïa näk ariiø ni wø mäk piny ki ge, na en røk göök abïïna cwøl ni ëëput, ni ena jï kun da nyïm en.

¹⁹Ni cäŋge tïïö ko oguudi ariiø ni thiiw ka warkey, ni gänge ge ra abïï käw røk deŋŋe moa en piny, ni ena kuna en da ec mar abïïna cwøl ni ëëput.

²⁰Køøre gena cäŋ tïïö ko oguudi ariiø møøk ni thiiw ka warkey, ni gänge ge røk ceŋ abïïna cwøl ni ëëput na en røk gööge karge riet jï piny mëëth, ni ena jï kun da nyïm en, ni kare cään ki kanya kuubi ki yie, ni ena jï maal mëëth ki kaw mar abïï man wø twöö ëëput piny ki gø na näk ocwääö ki riek waŋ.

²¹'Ba abïï käw atwöcge ki røk oguudi moa en deŋŋe, ni twöge gø røk oguudi moa en dëër ëëput, ni twöcge ka waare mo owenyø mo kïte caala kït abïcøle, ni løny ki man bëëde ni teek ri kaw mar abïï man wø twöö ëëput piny ki gø na näk ocwääö ki riek waŋ, kiper na abïï käw ba bëëde ni lwäägö kanyo en ri ëëput, ni ege tïïö na kare kaawat mana ö Wuuö Jwøki na kööm Modhe.

²²Køøre jalabiiya mana ciek man wø røø tier abïïna cwøl ni ëëput acwääcge bäre ni kïte caala kït abïcøle;

²³ni wëënge dïëre maal ki kany mo ŋaam na kar wïc, ni cwääcge deŋŋe kanya no owiiø ni ŋaam enø ki waare ni teek kiper nee ba jeee.

²⁴Ni kïthge deŋ jalabiiya piny ki gïï mo caala nyïïadikwäle mo otïïö ki waare mo kïtge caala kït abïcøle, ki ma dïmuur, ki mo kwaar.

²⁵Køøre gena tïïö ki nyeŋ gare thuwø ni tïïcge ka warkey mana tøŋ, ni kïthge nyeŋ gare moøgø yïthakic waare moa no otïïö ni caala nyïïadikwäle na en deŋ jalabiiya piny bäre,

²⁶ni ege kelø ni kany nø da waŋ gara mo tïïc ka warkey, køøre ki waare moa no otïïö ni caala nyaadikwala, këël mana wïrge deŋ jalabiiya manøgø ki piny bäre, kiper nee tïme na abïï man wø käär Kwääy Lam Mana Dwøŋ kany wø tïny Wuuö Jwøk; ni tïïcge gø na kare kaawat mana ö Wuuö Jwøki na kööm Modhe.

²⁷Køøre jalabiiye moa bäyö atïïcge ni ege cwääö ki waac lïïna mo tar mo mïërö kiper Aran ki wääte,

²⁸ni tïïcge abïï man wø meen wïc ki lïïna mo tar mo mïërö, ni tïïcge abïïe no okwøø na cöörri mo mïërö ki lïïna mo tar mo mïërö, ni tïïcge libaae ki lïïna mo tar mo mïërö;

²⁹ni cwääge ki kaw mar abïï ni cwääc ka waac lïïna mo tar mo mïërö ki waare mo kïtge caala kït abïcøle, ki ma dïmuur, ki mo kwaar; ni cwääya dhaanhe mo waŋe riek ki tïïc manøgø, ni tïïcge gø na kare kaawat mana ö Wuuö Jwøki na kööm Modhe.

³⁰Køøre gïn mo ŋwaŋŋi na näk nyuudhi mar ŋat mo ena kur keere na mar Wuuö Jwøk atïïcge ki warkey mana tøŋ, ni göönge dëër gø ki gööre mo køp, ni «Eni ena kur keere na mar Wuuö Jwøk.»

³¹Ni twöge gø ra abïï man wø meen wïc jï maal mëëth, ni twöcge ka waare moa no owenyø na näk kïte caala kït abïcøle; ni tïïcge gø na kare kaawat mana ö Wuuö Jwøki na kööm Modhe.

³²Kanyøgø tïïe bëët mo oduŋkaara na näk kar bëëtö mar Wuuö Jwøk, na näk oduŋkaany røømmø, athum; no otïïc jø Icrielli na karge ki køør jammi bëët moa ö Wuuö Jwøki na kööm Modhe ki ge.

³³Køøre oduŋkaara na näk kar bëëtö mar Wuuö Jwøk akälge baŋ Modhe, ni beege abïïe mo oduŋkaara ki jammi bëët moa no omanynyø kipere, na näk nywïëny moe moa näk dhøkge ogønø, ko opämi moe, ki jenni moe moa näk caala läämme, ki cööthe moe, ki gïï wø cwöth tiel yïthge moe;

³⁴ki rëëbi mana näk tïïc ka pëët nyöök rööm moa no otïïö ki kït mo kwayø, ki rëëbi maya thuwø mana näk tïïc ka pëët lääy mo onyøŋø, ka abïï man wø gëëŋ kanya en kur keere na pere leth ki gø;

³⁵ka acanduk man wø nyooth luumma tuut Jwøki ki jiy ki jer tëër moe, ki rëëbi mar acanduk manøgø na näk beeye nyuudhi mar wëën raay;

³⁶ki tharabëëta, ki jap tïïc moe bëët, ki muunni moa näk nyuuthe;

³⁷ki gïn wø cuŋ lambae bääte na no otïïö ki warkey mana tøŋ, ki lambae moe moa no ocïbö na karge, ki jap tïïc moe bëët, ki maar lamba;

³⁸ki gïna näk caala tharabëëta ni wø waaŋ gïn wø jïye ŋwääi ni met bääte na näk dëëre olëënynyö ki warkey, ki maar rööny man wø judö ki gø, ki gïn wø waaŋ ni wø jïye ŋwääi ni met, ka abïï mana näk mar gëëŋ kiper dho oduŋkaara;

³⁹ki gïn wø cïp olämme bääte na no otïïö ni dëëre olëënynyö ki nywïënyö ma jwïël, ki gïre mana no otïïö ki nywïënyö ma jwïël ni keda oŋana, ki jer tëër moe, ki jap tïïc moe bëët; ki gïr lwøk na näk caala thecet ki gïn wø cïbi bäät gø;

⁴⁰ka abïïe mo wø lïër na kal, ki jer kal ki gïï wø cwöth tietge yïthge, ka abïï mo mar gëëŋ kiper dhi kal, ki thøøli moe, ki dïnööy moe, ki jammi bëët moa manynyi na mo tïïc kiper yo oduŋkaara na näk kar bëëtö mar Wuuö Jwøk, na näk oduŋkaany røømmø;

⁴¹ka abïïe moa näk ocwääö ki riek waŋ kiper tïï dïlämme kanya en kur keere, ni beege abïïe moa en kur keerge kiper Aran na näk Kwääy Lam Mana Dwøŋ, ka abïïe mo wääte, kiper tïïc marge mar dïlämme.

⁴²'Ba jø Icriel jammi bëët ege tïïö na karge ki køør jammi bëët moa ö Wuuö Jwøki na kööm Modhe ki ge.

⁴³Ni ö Modhe ni neet jammi bëët moa näk ege tïïö, ni joot ge na karge kaawat mana ö Wuuö Jwøki na kööm geni ni tïïcge. Ni ö Modhe ni put ge gwïëth.