Read anuak Bwøth Wøk 4 Bible Online

Bwøth Wøk 4 - anuak bible

Bwøth Wøk 4

¹Køøre aløk Modhe ni kööe, «?A ni näk maa ba ŋääth jø Icrielli, wala dwøra ba leŋge? Kiper kanymør ge köö, ni ‹Wuuö Jwøk ree käre nyoodhø jïrï.› »

²Ni kö Wuuö Jwøki jïgø, na «?Agïnaŋø ni cerï enøgø?» Ni kö Modhe, ni «Beeye athøra.»

³Køøre Wuuö Jwøk aköö, ni «Leeŋ piny.» Ni leeŋ gø piny, ni tïme na thwöl; ni ö Modhe ni reeŋe ki gø.

⁴'Ba Wuuö Jwøk aköö jï Modhe, ni «Rwaak cerï ni magï gø ki jïbe.» Ni rwaak cere ni mak gø, ni cäŋ tïmö na athøra cere.

⁵Ni kö Wuuö Jwøki, ni «Gïnögø wär tïïyï nyïm jø Icriel kiper nee ŋääthge ni Wuuö Jwøk na näk Jwø kwäcge, na näk Jwø Eeberam ki Aydhak ki Jeekap, ree ee nyoodhø jïrï møn.»

⁶Ni cäŋ Wuuö Jwøki köö jïgø, ni «Kïth cerï tierjwöthï.» Ni ö Modhe ni kïth cere tierjwöthe, 'ba kanya käl cere wøk, onø jïtö ki täw mo raac, no nipwøth ni tar.

⁷Køøre Wuuö Jwøk aköö, ni «Dwøk cerï tierjwöthï.» Ni dwøk cere tierjwöthe; 'ba kanya käl gø wøk ki tierjwöthe, cere onø døø kare ni caala dëëre.

⁸Ni kö Wuuö Jwøki, «Ni näk miï ba ŋääthge wala dwørï ba leŋge kanyo nyoothï nyuudhi mana dïkwøŋ, kanymør riet nyuudhi ŋääthge ŋäädhö.

⁹'Ba ni näk nyuuthe moøgø na ariiø yøø ba ŋääthge wala dwørï ba leŋge, wärï lwötï ki pïï røk pïï moa en naam ni kønynyï gø piny kany moo tal. Pïïögø na lwørï naam yøø otïmö na remø piny kanya no otal.»

¹⁰'Ba Modhe aköö jï Wuuö Jwøk, ni «Wui Awuuö, a paa dhaanhø mo caan luup ŋääe, ki mana bëëda cøøn, këël man cäänï ki aani dïcäŋi en, a na näk laŋŋï; kiper aana dhaanhø mo cäänö teek jïra ni leeba ba rwäänhnhi.»

¹¹Ni kö Wuuö Jwøki jïgø, na «?Aŋa na cwääc dhi dhaanhø? ?Wala aŋa ni wø tïïc dhaanhø ni ba cäänö, wala na miiŋ, wala ni nyeŋŋe nëënö wala na cwør? ?Aŋø, paa aani, a na Wuuö Jwøk?

¹²'Ba ennø, ciï. Aani ki dëëra kiree, aano en buutï, ni jaba dhiï ki man cäänï, ni pwönynya ïïni ki luup bëët moo carï.»

¹³'Ba Modhe aköö, ni «Wui Kwäärö, ennø beerra man jäägï ki dhaanhø mør jaak mana manynyï.»

¹⁴Kanyøgø Wuuö Jwøk awëër ki Modhe døc ni kööe, na «Aŋø, coku ma Aran na näk nyikwaar Libay ba nut? Eni ŋääa ni beeye dhaanhø mo cäänö løny jïre. Eni thuwø ööa baŋï kiper nou røømmu ki gø; ni kanyo joot ïïni, yie puta mïnnö.

¹⁵'Ba ïïno cäänö ki eni ni cïbï luup bëët dhee; 'ba aani ki dëëra kiree, aano en buutï ni jaba dhiï, ni ena buute thuwø ni jaba dhee, ni pwönynya uuni ki gïïo tïïyu.

¹⁶Eni thuwø, eno tïmö ni cäänö eni jï jiy na karï; ni tïme na dhøk marï, ni tïmï niï caala Jwøk ki baŋe.

¹⁷Athøra man thuwø käärï ki cerï, nee tïme ni beeye gïno tïïyï nyuuthe ki gøøni.»

¹⁸Køøre Modhe aay ni døø baŋ Jëthrö na näk wää cïïe, ni kööe jïgø, na «A kwaya ïïni ki man aa, naa døøa baŋ tuuŋwa na en Ijep, nee ge neena ki man näk ge poot kwøw.» Ni kö Jëthrö jï Modhe, ni «Wøp, cäädhï ki jööt dëël.»

¹⁹Ni ö Wuuö Jwøki ni cääne ki Modhe Midien, ni kööe, ni «Døø Ijep nø, kiper jøøa many ïïni niï 'näkge gena thøw bëët.»

²⁰Køøre Modhe cïïe ki wääte alwøre ni kïth geni bäät arëën, ni aae ni døøa ŋööm Ijep. Ni ö Modhe thuwø ni lwør athøra mar Jwøk ni käär gø ki cere.

²¹Ni cäŋ Wuuö Jwøki köö jï Modhe, ni «Kanyo døøï Ijep, nyuuthe bëët moa cïba teek marge jïrï nee tïïyï, wär tïïyï nyïm Peerø; 'ba aani cwïny Peerø odøøya mo teek nee jø Icriel mäne ki man aacge.

²²Køøre ïïno köö jï Peerø, ni gïna caan Wuuö Jwøki beeye en, ena köö, ni ‹Jø Icriel bëët neeta kaamar wäädö man wø näk kaa, ni beeye kanynya.

²³Acaana jïrï, ni «Wec kanynya nee aae, kiper naa tïnynye»; 'ba ïïna kweer ki man aae. Ennø, wäätu moa näk kaai bëët nääa nääø.› »

²⁴'Ba kanya ö Modhe na pïïe kar niine øtjöö, Wuuö Jwøk ree anyoodhe jïgø, ni tïme ni manynya man 'näk gø.[7]

²⁵Køøre cïïe ma Dhipöra alwötö ki kïdi mo deŋŋe beth, ni daŋ wääde ki gø, ni leeŋ buyö mana daaŋe tiet cwøre, ni kööe, ni «Ïïno put bëëtö ni ïïna cwøra ki køør rem wääda.»

²⁶Ni ö Wuuö Jwøki ni wec Modhe ni käre nääö. Kar kanyøgø Dhipöra acäŋ köö, ni «Ïïno put bëëtö ni ïïna cwøra ki køør rem wääda.» Gïnögø acaane kiper luum daŋ.

²⁷Kanyøgø Wuuö Jwøk aköö jï Aran, ni «Ciï nou røømmu ki Modhe dï paap.» Ni aae ni røømge ki Modhe buut kïnna näk Kïn Jwøk, ni nuum dhi gø ni määtha gø.

²⁸Køøre Modhe luup bëët moa jääŋŋi ya Wuuö Jwøki kiperge acaane jï Aran, këël nyuuthe bëët moa caan Wuuö Jwøki jïre noo tïïe.

²⁹Køøre Modhe ka Aran gena aay ni cooŋge jø døøŋŋø mo jø Icriel bëët kanya ciel.

³⁰Kanyøgø Aran luup bëët moa caan Wuuö Jwøki jï Modhe acaane, ni tïïc nyuuthe moøgø nyïm jø Icriel.

³¹Ni ö jø Icrielli ni ŋääthge; 'ba kanya wïnyge gø ni Wuuö Jwøk alïïmmö baŋge ni joot caannø marge, wïthge akuulge piny ni wøørge gø.