Read anuak Bwøth Wøk 40 Bible Online

Bwøth Wøk 40 - anuak bible

Bwøth Wøk 40

¹Køøre Wuuö Jwøk acäänö ki Modhe, ni kööe,

²«Noo tïme na cäŋ mana dïkwøŋ mar dwääy mana dïkwøŋ, oduŋkaara na näk kar bëëtö mar Wuuö Jwøk, na näk oduŋkaany røømmø, wär gur piny.

³'Ba acanduk man wø nyooth luumma tuut Jwøki ki jiy wär kïth yie kaace, ni gëëŋï acanduk manøgø ka abïï man wø gëëŋ kanya en kur keere na pere leth ki gø.

⁴Ni kälï tharabëëta yo oduŋkaara, ni jiiŋŋï jammi moa en bääte na karge; ni kälï gïn wø cuŋ lambae bääte yie thuwø ni jiiŋŋï lambae moe nee lielge bääte maal.

⁵Køøre gïn wø waaŋ gïn wø jïye ŋwääi ni met bääte, na näk dëëre olëënynyö ki warkey, wär cïpï ni dïët ka acanduk mar luumma tuut Jwøki ki jiy, ni lïërï abïï maal mana näk mar gëëŋ dho oduŋkaara na näk kar bëëtö mar Wuuö Jwøk.

⁶«Køøre gïn wø cïp olämme bääte wär cïp nyïm wøk ni dïët ki dho oduŋkaara na näk kar bëëtö mar Wuuö Jwøk, na näk oduŋkaany røømmø.

⁷Ni cïbï gïr lwøk na näk caala thecet yïthakic oduŋkaany røømmø ki gïn wø cïp olämme bääte, ni kïthï yie ki pïï.

⁸'Ba kal mana näk otïïö ka abïïe wär wïrï ki deŋŋe bäre, ni lïërï abïï maal mana näk mar gëëŋ dhi kal.

⁹«Køøre maar rööny ni wø judö ki gø wär lwørï ni jørï oduŋkaara na näk kar bëëtö mar Wuuö Jwøk, ni gweelï jammi bëët moa en yie, niï tïïya gø ni ena kur keere ki jammi moe bëët, nee put tïmö no oduŋkaara mo ena kur keere.

¹⁰Køøre gïn wø cïp olämme bääte ki jammi moe bëët wär gweelï, niï tïïya gïn wø cïp olämme bääte manøgø ni ena kur keere, nee put tïmö na gïn wø cïp olämme bääte mo ena kur keere ni pere leth.

¹¹Gïr lwøk na näk caala thecet ki gïre man wø cïbi bäät gø wär gweelï thuwø, niï tïïya gø ni ena kur keere.

¹²«Køøre nø, Aran ki wääte wär käl dho oduŋkaany røømmø ni lwøgï geni ki pïï.

¹³'Ba abïïe moa en kur keerge wär røø dëër Aran, ni røønyï eni ki maar rööny, niï tïïya eni ni ena kur keere, naa tïnynye ni ena Kwääy Lam Mana Dwøŋ.

¹⁴Ni cwølï wääte ni røøï jalabiiye moa bäyö dëëtge;

¹⁵ni røønyï geni ki maar rööny ni caala mana røønyï wääge, naa tïnyge ni gena dïlämme; ni rööny marge manøgø puta geni tïïc ni gena dïlämme cooth këël yïth beenhnhe moge bëët moo ööi.»

¹⁶Ni ö Modhe ni put gïïögø bëët tïïc; ni tïïe na karge kaawat mana ö Wuuö Jwøki na kööm eni.

¹⁷'Ba kanya tïme na dwääy mana dïkwøŋ ri riet cwiiri, ni beeye cäŋ mana dïkwøŋ mar dwäänögø kiree, oduŋkaara na näk kar bëëtö mar Wuuö Jwøk aput gur piny.

¹⁸'Ba Modhe oduŋkaara agur piny na kare, ni kïth gïï wø cwöth tiel yïthge kwörge, ni kïth opämi yïthge, ni rwaak jenni moa no otïïö ni caala läämme kwörge, ni tïïc cööthe ni cuŋŋö.

¹⁹Ni ö Modhe ni rïëp abïïe bäät oduŋkaara na näk kar bëëtö mar Wuuö Jwøk, ni rïëp rëëpe møga bäät abïïe moøge maal; ni ee tïïö na kare kaawat mana ö Wuuö Jwøki na kööm eni.

²⁰Køøre opäp kïte moa näk ciik ogöör bäätge ni wø nyooth luumma tuut Jwøki ki jiy alwøre ni kïth ge ya acanduk, ni kïth jer tëër dëër acanduk manøgø, ni kïth rëëbi mana näk nyuudhi mar wëën raay bäät acanduk.

²¹Ni ö Modhe ni käl acanduk manøgø yo oduŋkaara na näk kar bëëtö mar Wuuö Jwøk, ni lïër abïï maal man wø gëëŋ kanya en kur keere na pere leth ki gø, ni gëëŋ acanduk man wø nyooth luumma tuut Jwøki ki jiy ka abïï manøgø; ni ee tïïö na kare kaawat mana ö Wuuö Jwøki na kööm eni.

²²Køøre tharabëëta akïth yo oduŋkaany røømmø na näk kar bëëtö mar Wuuö Jwøk, ni ena jï løø kuna näk da wï-piny yo oduŋkaara, ni ee cïp wøk ŋää abïï mana näk gëëŋi.

²³Ni ö Modhe ni cïp muunni moa näk nyuuthe bäät tharabëëta manøgø nyïm Wuuö Jwøk ni ee jiiŋŋø na kare, kaawat mana ö Wuuö Jwøki na kööm eni.

²⁴Køøre gïn wø cuŋ lambae bääte akïth yo oduŋkaany røømmø, ni dïët ki tharabëëta, ni ena jï løø kuna näk da tier-piny yo oduŋkaara na näk kar bëëtö mar Wuuö Jwøk.

²⁵Ni ö Modhe ni jiiŋ lambae nee lielge bäät gïn wø cuŋ lambae bääte nyïm Wuuö Jwøk kaagø, ni ee tïïö na karge kaawat mana ö Wuuö Jwøki na kööm eni.

²⁶Køøre Modhe gïna näk caala tharabëëta ni wø waaŋ gïn wø jïye ŋwääi ni met bääte, na näk dëëre olëënynyö ki warkey, akïth yo oduŋkaany røømmø ni ee cïp wøk ŋää abïï man wø gëëŋ kanya en kur keere na pere leth ki gø;

²⁷ni waaŋ gïn wø jïye ŋwääi ni met bäät gø; ni ee tïïö na kare kaawat mana ö Wuuö Jwøki na kööm eni.

²⁸Køøre Modhe abïï mana näk gëëŋi mar dho oduŋkaara na näk kar bëëtö mar Wuuö Jwøk alïër maal dhi gø.

²⁹Ni kïth gïn wø cïp olämme bääte nyïm wøk ni dïët ki dho oduŋkaara na näk kar bëëtö mar Wuuö Jwøk, na näk oduŋkaany røømmø, ni cïp olämi man wø waaŋ bäre bäät gø, ni cïbe na aciel ki muuy mar møk beel; ni ee tïïö na kare kaawat mana ö Wuuö Jwøki na kööm eni.

³⁰Ni ö Modhe ni cïp gïr lwøk na näk caala thecet yïthakic dho oduŋkaany røømmø ki gïn wø cïp olämme bääte, ni kïth yi gø ki pïï na mo lwøk.

³¹Ni ö Modhe ka Aran ki wäät Aran ni lwøkge ceŋge ki tietge røk pïï moøgø.

³²'Ba kanya dønyge yo oduŋkaany røømmø, ki kanya nyiikge buut gïn wø cïp olämme bääte, gena put löö, kaawat mana ö Wuuö Jwøki na kööm Modhe.

³³Ni ö Modhe ni tïïc kal mana no otïïö ka abïïe ni ee wïrö bäre ki deŋ oduŋkaara na näk kar bëëtö mar Wuuö Jwøk ki gïn wø cïp olämme bääte, ni lïër abïï maal mana näk gëëŋi dhi kal. Ni ö Modhe ni put tïïe bëët thöör.

³⁴Køøre pöölö aput öö ni uum oduŋkaany røømmø, ni ö ajiem Wuuö Jwøki ni put tïmö ni päl yo oduŋkaara na näk kar bëëtö mar Wuuö Jwøk.

³⁵'Ba atïmö ni kär løny jï Modhe ki man døny yo oduŋkaany røømmø, kiper mana tïme ni pöölö ena bääte, na ajiem Wuuö Jwøk päl yo oduŋkaara na näk kar bëëtö mar Wuuö Jwøk.

³⁶'Ba këël mana tïme na ri wääth marge bäre, kany wø ö pöölö wø tïŋi maal bäät oduŋkaara na näk kar bëëtö mar Wuuö Jwøk, jø Icriel wø tïŋŋö;

³⁷'ba kany wø ö pööle wø poode ni kär tïŋ maal, jø Icriel ba tïŋŋi këël mano tïme na dïcäŋ mano tïŋ pöölö maal yie.

³⁸Ni ö gïnögø ni put bëëdö ni nut ki yi wääth marge bäre, ni pöölö mar Wuuö Jwøk ena bäät oduŋkaara na näk kar bëëtö mar Wuuö Jwøk ki dïcäŋ, ni tïm pöölö manøgø na maac ki wäär, ni nëënö jï jø Icriel bëët.