Read anuak Bwøth Wøk 6 Bible Online

Bwøth Wøk 6 - anuak bible

Bwøth Wøk 6

¹Køøre Wuuö Jwøk aköö jï Modhe, ni «Ennø, gïno tïïa dëër Peerø jootï joodø. Peerø jø Icriel wëëge wääth ki køør gïno teek noo tïïa dëëre, ni put geni riem wøk paare ki køør teek manøgø.»

²Ni cäŋ Jwøki cäänö ki Modhe ni kööe jïgø, ni «Aana Wuuö Jwøk;

³aani dëëra anyoodha jï Eeberam ki Aydhak ki Jeekap ni aana Jwøa en teeki jïre. 'Ba ki man näk mo nyeŋŋa Wuuö Jwøk kära nyoodhø jïge ki man ŋäcge gø.

⁴Aani thuwø luubö mara mana tuuda ki geni atïïa nee bëëde, ni beeye ki man cïba ŋööm Keenan jïge, na näk ŋöömma bëëtge yie ni gena wëëlle mo path.

⁵Køøre thuwø cooyø mar jø Icriel awïnynya, kiper geno mak jø Ijepi ni teek nee bëëtge ki bëët laŋ. 'Ba aani wïïa acaara ki gïna tuuda ki geni.

⁶«Kiper manøgø nø, ï na Modhe en, caanï jï jø Icriel ni Wuuö Jwøk aköö, ni ‹Beeye aani na Wuuö Jwøk. Uuni uuno käla wøk ki yïth gïïa leth na kïth jø Ijepi bäätu, ni käla uuni wøk ki yi bëët laŋ, ni wïïla uuni wøk thuwø ki køør teek bada ki ŋøl mana dwøŋ noo tïïa.

⁷Ni lwøra uuni ni uuna jiya, ni tïma ni aana Jwøk maru, ni putu gø ŋäc møn ni aana Wuuö Jwøk na näk Jwøu na käl uuni wøk ki yïth gïïa leth na kïth jø Ijepi bäätu.

⁸Ni kïtha uuni yi ŋöömma kööŋa kipere nee cïba jï Eeberam ki Aydhak ki Jeekap, ni cïba gø jïïu ni tïme na maru. Beeye aani na Wuuö Jwøk.› »

⁹Køøre Modhe gïnögø acaane jï jø Icriel. 'Ba mar Modhe kärge leŋø kiper pänh cwïny marge ki bëët laŋ marge na leth na enge yie.

¹⁰'Ba Wuuö Jwøk acäänö ki Modhe ni kööe,

¹¹ni «Ciï ni caanï gø jï Peerø nyeny Ijep, kiper nee jø Icriel wiie nee aacge paare.»

¹²'Ba Modhe mare acaane nyïm Wuuö Jwøk ni kööe, ni «Ennø, këël jø Icriel ki dëëtge mara kärge leŋø. ?A tugi ki Peerø nø, mara oleŋ gø nidïï, aani ni cäänö kuua døøc en?»

¹³Køøre Wuuö Jwøk acäänö ki Modhe ka Aran ni kööm geni kiper gïïo caange jï jø Icriel ki Peerø nyeny Ijep, kiper nee jø Icriel kälge wøk ki yi ŋööm Ijep.

¹⁴'Ba moi ii beege nyeŋ jiy moa näk wïth tuŋi na käl dhi øt kwarge ma Icriel. Wäät Ruben na näk kany Icriel beege Anök ki Pallu ki Eedharan ki Karmi. Moøgø beege wïth tuŋi mo dhi øt Ruben.

¹⁵'Ba wäät Cimien beege Jemuël ki Jamin ko Okat ki Jaakin ki Dhöar ki Caul o dhaaŋŋa näk nyi jø Keenan. Moøgø beege wïth tuŋi mo dhi øt Cimien.

¹⁶'Ba nyeŋ wäät Libay ki køør tuuŋ marge beege Gërcön ki Kät ki Mërari. 'Ba cwiiri moa beet Libay ni kwøw beege cwiiri ma dïpa ki pïëradäk ka abïriiø.

¹⁷Ni wäät Gërcön ki køør tuuŋ marge beege Löbeni ki Cimiy.

¹⁸'Ba wäät Kät beege Amram ki Icaar ki Keeprön ki Udhiel. 'Ba cwiiri moa beet Käti ni kwøw beege cwiiri ma dïpa ki pïëradäk kurdäk.

¹⁹Ni wäät Mërari beege Maali ki Muci. Jøøgø bëët beege wïth tuŋi moa käl dhi øt Libay ki køør tuuŋ marge.

²⁰'Ba Amram waai cöök wänni mo nyeŋŋe cwøl ni Jökabit anywøme, ni nyöötge ki gø ni nywølge Aran ki Modhe. 'Ba cwiiri moa beet Amrammi ni kwøw beege cwiiri ma dïpa ki pïëradäk ka abïriiø.

²¹Wäät Icaar beege Köra ki Napëk ki Dhikri.

²²Wäät Udhiel beege Micaël ki Eldapan ki Citri.

²³'Ba Aran Elicëba nya Aminadap anywøme. Ëlicëba beeye cöök Nacøn. Jiy moa nywøl Aranni ki Ëlicëba beege Nadap ka Abiyu ki Eliedhar ki Itamer.

²⁴Wäät Köra beege Acër ki Elkana ka Abiyacap. Moøgø beege tuuŋ Köra.

²⁵Ni ö Eliedharri wär Aran ni nyöömme røk nyïï Putiëël, ni nyöötge ki gø ni nywølge Piniac. Moøgø beege wïth tuŋi moa käl dhi øt Libay ki køør tuuŋ marge.

²⁶'Ba Aran ki Modhe beege jøøa cään Wuuö Jwøki ki geni nee jø Icriel kälge wøk ki yi Ijep ki køør lwaae moge,

²⁷ni beege Modhe ka Aran na cäänö ki Peerø nyeny Ijep kiper nee jø Icriel kälge wøk ki yi Ijep.

²⁸'Ba dïcäŋa ö Wuuö Jwøki na cääne ki Modhe yi ŋööm Ijep,

²⁹ena cäänö ki Modhe ni kööe, ni «Aana Wuuö Jwøk. Gïïa caana jïrï bëët ciï ni caanï ge jï Peerø nyeny Ijep.»

³⁰'Ba Modhe mare acaane nyïm Wuuö Jwøk ni kööe, ni «Ennø, aana dhaanhø mo cäänö kuua døøc. ?Mara owïnynyi ya Peerø nidïï?»