Read anuak Bwøth Wøk 9 Bible Online

Bwøth Wøk 9 - anuak bible

Bwøth Wøk 9

¹Køøre Wuuö Jwøk aköö jï Modhe, ni «Ci baŋ Peerø ni caani gø jïre, ni gïna caan Wuuö Jwøki na näk Jwø jø Ibaru beeye en, ena köö, ni ‹Wec jiya nee aacge, kiper naa tïnyge.

²'Ba ni näk mo ïïno kweer ki man weyï geni nee aacge, ni ge poot iï maaø ni teek,

³ka adïëri møn, a na Wuuö Jwøk cera rwiea rwieø ki täw mo raac døc bäät lääc paac moï moa en pwöla bëët, kaamar okwëënyi, ka arëëni, ka athïrööle, ki pïïth dhäk, ki pïïth dïëk.

⁴'Ba a na Wuuö Jwøk, lääc paac mo jø Icriel ki lääc paac mo jø Ijep opääŋŋa, ni bäŋe gø mo thøw røk mo jø Icriel.› »

⁵Køøre Wuuö Jwøk acïpö ki kany mo ŋäc ni beeye kanyo täk gïnögø yie ni kööe, ni «Diøø a na Wuuö Jwøk gïnögø tïïa tïïö yi ŋöömmi.»

⁶Køøre Wuuö Jwøk gïnögø atïïe ka amöölla, ni thøw lääc paaci mo jø Ijep bëët; 'ba bäŋ aciel mo thøw røk lääc paac mo jø Icriel.

⁷Ni ö Peerø ni jääk kanya bëët jø Icrielli yie, ni wïny gø ni bäŋgø mo othøw wala aciel røk lääc paac mo jø Icriel. 'Ba Peerø cwïnye poot bëëdö ni teek, ni käre jø Icriel wiiø nee aacge.

⁸Køøre Wuuö Jwøk aköö jï Modhe ka Aran, ni «Lwötu ki bur yi këënnö mo päŋ yïth ceŋŋu, nee jør Modhe maal nyïm Peerø.

⁹Bur manøgø otïmö na tør bäät ŋööm Ijep bäre, ni tïme na børi mo pänynya wøk dëët jiy ki lääc paac bëët dï ŋööm Ijep bäre.»

¹⁰Køøre gena lwötö ki bur yi këënnö, ni cuŋge nyïm Peerø; ni ö Modhe ni jør gø maal, ni put tïmö na børi dëët jiy ki lääc paac bëët.

¹¹'Ba kär løny jï ajuuk ki man cuŋge nyïm Modhe kiper børi moa no opäny wøk dëëtge, kiper børi moa no opäny wøk dëët jø Ijep bëët dagø dëët ajuuk thuwø.

¹²'Ba Wuuö Jwøk cwïny Peerø adøøc mo teek, ni ö Peerø ni käre luumge wïnynyö, kaawat mana kwøŋi ya Wuuö Jwøki caan jï Modhe.

¹³Køøre Wuuö Jwøk aköö jï Modhe, ni «Ö maal ka amöölla cøøn, ni ciï ni cuŋŋï nyïm Peerø ni kööï jïre, ni gïna caan Wuuö Jwøki na näk Jwø jø Ibaru beeye en, ena köö, ni ‹Wec jiya nee aacge, kiper naa tïnyge.

¹⁴Kiper yie man ennø, gïï mo leth mo käla baŋa jääŋŋa jääŋŋö bäätï, ki jø kööre moï, ki jiyï bëët, kiper nee ŋäyï ni bäŋ jwøk mo caala aani bäät piny bäre.

¹⁵Kiper këël kawaane ennø, doo naa oløny jïra ki man rwiea cera ni gøøa ïïni ki jiyï bëët ki täw mo raac, ni putu tïmö nou tøør bäät pinyi en.

¹⁶'Ba gïna wiia ïïni kipere niï bëëdï, beeye kiper nee teek mara nyoodha jïrï, nee gïra køp bäät piny bäre.

¹⁷Ennø, dëërï poot iï thïïŋö bäät jiya, ni mänï geni ki man aacge.

¹⁸Neenï, diøø kar kany nø, køth mo ree da pey mo døøŋŋø jääŋŋa jääŋŋö, mo teeŋe poot kär tägö Ijep ki mana geeri këël kar kany ennø.

¹⁹Kiper manøgø nø, jääk baŋ lääc paac moï, ki gïïa en yi pwöla moa näk moï bëët nee käl paayø, nee kwøwge. Kiper kanyo ö peyi bäät jiy ki lääc paac moo en pwöla na näk kär käl paac bëët, ge thøw.› »

²⁰Køøre ki røk jø kööre mo Peerø, moa lwäär ki dwør Wuuö Jwøk laaŋe moge ki lääc paac moge alaarge käl paac.

²¹'Ba moa näk dwør Wuuö Jwøk ege taaø, laaŋe moge ki lääc paac moge awiige pwöla jaak.

²²Køøre Wuuö Jwøk aköö jï Modhe, ni «Tïŋ cerï maal kiper nee køth mo ree da pey pädhe bäät ŋööm Ijep bäre, ni beeye bäät jiy ki lääc paac ki gïïa näk otuy yïth pwöth dï ŋööm Ijep bäre.»

²³Ni ö Modhe ni tïŋ athøra mare maal, ni ö Wuuö Jwøki ni jääŋ odäru ki pey, ni put køthi tïmö ni pöödö bäät piny. Ni ö Wuuö Jwøki ni tïïc køth mo ree da pey nee pädhe bäät ŋööm Ijep.

²⁴Ni put tïmö ni da pey na agaackøth mal dïëre, ni beeye pey mo teeŋe poot kär tägö yi ŋööm Ijep cøøn ki mana geeri na paac.

²⁵Ni ö peyi ni put gïïa en yi pwöla bëët dï ŋööm Ijep bäre gøøc, ni beege jiy ki lääc paac bëët; ni ö peyi ni gøøc gïïa näk otuy yïth pwöth bëët ni tøc jenni moa en pwöl paanøgø bëët.

²⁶'Ba kanya bëët jø Icrielli yie keere na näk Göcën kødha näk ree da pey kär pädhö yie.

²⁷Køøre Peerø ajääk baŋ Modhe ka Aran nee öge, ni kööe jïge, ni «Aani aana bääyö yie man; Wuuö Jwøk beeye na näk mare adïëri, 'ba aani ki jiya marwa raac.

²⁸Kwayu Wuuö Jwøk, kiper odäru ki pey moa jääŋŋe yøø, orømø nø; uuno wiia ni aayu, nou ba bëëdu kany këët.»

²⁹Ni kö Modhe jïgø, ni «Kanyo aa wøk yi pääny kiree, ceŋŋa othaaŋa jï Wuuö Jwøk; ni ö odäru ni cuŋŋe, ni tïme ni bäŋ pey këët, kiper nee putï ŋäc møn ni piny beeye mar Wuuö Jwøk.

³⁰'Ba ïïni ki jø kööre moï, ki man näk mou poot ba lwäär ki Jwøk na näk Wuuö Jwøk ŋääa.»

³¹'Ba kar kaaca, gïna cwøl ni telba, ni wø thøøthe cwääc na abïï, ki teeŋ bëëlö mo cwøl ni gäbci[9] bëët onø raany peyi, kiper mana näk gäbci onø ŋøø, ni telba poot ena yïth kuge.

³²'Ba beel moa cwøl ni cïndë ka aja, ge kär ränynyö, kiper kar ciek marge poodi.

³³Ni ö Modhe ni put aa wøk yi pääny nyïm Peerø, ni thaaŋ ceŋŋe jï Wuuö Jwøk; ni ö odäru ki pey ni cuŋge, ni cöök køthi bäät piny.

³⁴'Ba kanya ö Peerø na joot gø ni køth ki pey ko odäru ocuŋŋö, eni bääyö mare acäŋ kadhø, ni døøc cwïnye mo teek, ni bee eni ki jø kööre moe.

³⁵'Ba Peerø cwïnye poot bëëdö ni teek, ni käre jø Icriel wiiø nee aacge, kaawat mana kwøŋi ya Wuuö Jwøki caan ki dhi Modhe.