Read anuak Jööp 1 Bible Online

Jööp 1 - anuak bible

Jööp 1

¹'Ba da dhaanhø mo obëëdö yi ŋööm Uc mo nyeŋŋe cwøl ni Jööp. 'Ba dhaanhø manøgø, ena dhaanhø mo bäŋ gïn mo ogwäyö ri bëëtö mare, mo bëëtö mare tiir, ni eni lwäär ki Jwøk, ni ree ee mänö ki gïï mo reyø.

²Eni jïre da wääte abïriiø ki nyïïe adäk ma nyïïakuue,

³ni jïre da dïëk ma rööm ma kume abïriiø, ka athïrööle ma kume adäk, ki dhää puur ma kuma aciel, ka arëëni ma dïpe abïïc, ki jø tïïc mo thööth døc. 'Ba ena dhaanhø mo kare dwøŋ døc yïthakic jiy bëët moa en jï løø kur tuul-cäŋ.

⁴'Ba wäät Jööp moa näk cwøw, ge wø tïïö ka ajwöm, ni tïïcge ni leeŋge leeŋŋø yïth mïëri moge, ni nyïïmiige moa näk nyïïakuue wø cwølge cwølø kar ajwöma nee cämge nee mäthge ki geni ciel.

⁵'Ba kanyo pööth nïr ajwöma, Jööp wø jääga baŋge nee dëëtge døøcge mo waany, ni ö Jööpi ni päny maal ka amöölla ni cïpe ko olämme mo wø waaŋ bäre ki nyeŋ nyïïe bëët, kiper ena cädö ni kööe, «Kanymør obwöre 'moa geno tïïö ki raay ni janyge Jwøk ki yïth cwïnyge.» 'Ba manøgø beeye bëëtö mar Jööp cooth.

⁶'Ba dïcäŋ aciel nyïïatwiet maal gena ö kuna cuŋge nyïm Wuuö Jwøk, ni ö Ceethan thuwø ni ööe ki geni ciel.

⁷Ni kö Wuuö Jwøki jï Ceethan, ni «?Ï kälï kaa ŋø cøøn?» Køøre aløk Ceethan jï Wuuö Jwøk, ni kööe, na «A käla kuna wïra bäät piny bäre ni jøøya gøøni.»

⁸Køøre Wuuö Jwøk aköö jï Ceethan, ni «?Dhaanhnha ma Jööp ajootï? Eni, ena dhaanhø mo bäŋ ŋat mo caala gø bäät piny; ena dhaanhø mo bäŋ gïn mo ogwäyö ri bëëtö mare, mo bëëtö mare tiir, ni eni lwäär ki Jwøk, ni ree ee mänö ki gïï mo reyø.»

⁹'Ba aløk Ceethanni ni kööe, «?Aŋø, Jööp Jwøk lwääre ka gïn mo bäŋ tiere jaak?

¹⁰?Aŋø, paa kiper na bëëde ni eni, ki jø paare, ki jap paare bëët iï koorø jïre? Japa tïïe ki cere bëët iï gwïëdhö jïre, ni put pïïth lääc paaci moe nyaay yi ŋööm paac bäre.

¹¹'Ba ennø, tïŋ cerï maal bäät jape mø, ni raanynyï ge bëët, niï ba put janynyø täärnyïmï kiree.»

¹²Køøre Wuuö Jwøk aköö jï Ceethan, «Wøp nø, jammi moe bëët ena cerï, 'ba kär dee gïn gutï ri dëëre.» Ni ö Ceethan ni aae nyïm Wuuö Jwøk.

¹³'Ba dïcäŋ aciel, ni wäät Jööp ki nyïïe moa näk nyïïakuue ge ena bäät cam ni ge mädhö ki køøŋ nyïïomøki po cöökge mana dwøŋ,

¹⁴ŋat tïïc aciel aöö ni kööe jï Jööp, ni «Kanya bëëde ni dhäk purö yi pwödhö, na arëëni ge ena kar kwaath,

¹⁵jø Caaba gena öö ni twierge geni, ni putge jø tïïc 'näk ko opëëllö; 'ba bee aani keera na bøth kiper nee caana jïrï.»

¹⁶'Ba ni nyenøgø poot cäänö, ŋat tïïc mør acäŋ öö, ni kööe, ni «Maac mar Jwøk apänhnhö ki maal ni waaŋ dïëk moa näk rööm, ki jø tïïc, ni thöör geni; 'ba bee aani keera na bøth kiper nee caana jïrï.»

¹⁷'Ba ni nyenøgø poot cäänö, ŋat tïïc mør acäŋ öö, ni kööe, ni «Jø Kaldia gena öö ni pääŋge dëëtge na dhøgi adäk, ni twierge athïrööle, ni putge jø tïïc 'näk ko opëëllö; 'ba bee aani keera na bøth kiper nee caana jïrï.»

¹⁸'Ba ni nyenøgø poot cäänö, ŋat tïïc mør acäŋ öö, ni kööe, ni «Wäätï ki nyïïï ni ge ena po cöökge mana dwøŋ ni ge cämö ni ge mädhö,

¹⁹jamø mo teek døc akwönnö ki dïpaap ni cwöba røk, ni gøøc tuk øtø karge ŋweeni, ni put päth bäätge ni thøwge; 'ba bee aani keera na bøth kiper nee caana jïrï.»

²⁰Kanyøgø Jööp aput ö maal ni jeeya abïïne, ni gwäär jïëye wøk. Køøre Jööp dëëre aleeŋ piny yïth ŋøøm, ni wøør Jwøk,

²¹ni kööe, «Aana ö wøk ki yi mera ni bäŋ gïrpiny jïra; aano døøk ni bäŋ gïrpiny jïra. Gena cïp Wuuö Jwøki jïra ni cäŋ ge lwørrø; kiper manøgønø, pwøc en ri nyeŋ Wuuö Jwøk.»

²²'Ba ki yïth gïïögø bëët na leth na tägö, Jööp kär bääyö ri Jwøk, ni käre gø jäälö.