Read anuak Jööp 12 Bible Online

Jööp 12 - anuak bible

Jööp 12

¹Køøre aløk Jööpi ni kööe,

²«Ka adïëri møn, beeye u keeru na jiy, 'ba nou thøwu, leec wïc thøw ki uuni na aciel!

³'Ba aani, jïra da ŋeth kaamar maru; aani kara ba en piny ki uuni. ?Aŋø, aŋa ni kuc gïïögø bëët?

⁴«Aana tïmö na gïr ŋeethø jï nyïïawääta, ni beeye aani ni wø pëëny Jwøk ni duunne jïra, ŋata bëëtö mare tiir na näk ba bääö atïmö na gïr ŋeethø.

⁵Jiy moa näk ge ena yi bëëtö mo beer ge ŋeethø bäät dhaanhø mo ena yi bëëtö mo leth, mo cäätha bäät pädhö.

⁶Kwör bëëte mo dïräänynye wø bëëdö ni beyø, ni ö jø wø raany cwïny Jwøk ni bëëtge ni geno gwøø, ni beege jø wø käär jwøk marge ki ceŋge.

⁷«'Ba ennø, pëëny 'lääy niï pwönyge, ni pëënynyï wec maal nee caange jïrï,

⁸wala cään ŋøøm niï pwönyge, wala rec mo naama dwøŋ nee parge jïrï.

⁹?Amane ni kuc gø dï gïïögø, ki man näk mo gïn tïïya Wuuö Jwøki?

¹⁰Jwïëc gïïa kwøw bëët ena cere, ni bee eni na tïïc jiy bëët nee jwïëcge.

¹¹?Aŋø, patha ïth ni wø jier luup ki gø, kaawat man wø ö leepi wø bel cam ki gø?

¹²Leec wïc wø ena baŋ jøøa døøŋŋø, ni cwiic kwøw mo thööth, dhaanhø wø wëëge kwany tiet luup.

¹³«'Ba leec wïc ki teek beege mo Jwøk; ni luup pwöc ki kwany tiet luup käla baŋe.

¹⁴Ka adïëri møn, eni gïn mo ee toor piny, ba løny ki man cäŋi geerrø; ni dhaanhø mo ee twöö, bäŋ ŋat mo päta gø.

¹⁵Ka adïëri møn, eni, kany wø wëëk køth cuŋŋö, piny tal; ni kany wø wëëk køth pädhö, piny nithar.

¹⁶Eni, teek ki leec wïc beege moe, ni ö ŋat wø cøøgi, ki ŋat wø cwöö, ni näkge moe bëët.

¹⁷Eni, jøøa kwörge døøŋŋø wø wëëge wääth ki tietge jaak ni bäŋ war, ni tïïc dïŋut luup kaamar bøøre.

¹⁸Oguudi moa ö nyeye na twöcge jiy ki ge wø päde pädö, ni wëëk teek mar nyeye ränynyö.

¹⁹Eni, kwääc laam wø wëëge wääth ki tietge jaak ni bäŋ war, ni raany teek mar jøøa näk nyeŋge ŋäc ki kany mo yie bäär.

²⁰Eni jiy moa näk oŋäädhö wø wëëge lïŋŋö, ni ö leec wïci mar jø døøŋŋø ni raany gø.

²¹Eni ataa mo dwøŋ wø wëëge ööny bäät dïbwöthe, ni raany teek mar jøøa teek.

²²Eni, gïïa näk tietge okan piny yi muudhö wø wëëge nëënne, ni wëëk tar ööny bäät muudhö mo cøl døc.

²³Eni, wïth juurre wø tïŋe maal ni cäŋ ge raanynyø, ni wëëk wïth juurre nyaay ni cäŋ ge keethø.

²⁴Eni, leec wïc mar dïbwöthe mo jø bäät piny wø di raanynyø, ni tïïc ge nee thääcge dï ŋöömö mo oränynyö mo bäŋ jöö yie.

²⁵Ge wø wëëge thäämmö yi muudhö mo bäŋ tar yie, ni tïïc ge ni ge bøømmø kaamar jiy mo omeer.»