Read anuak Jööp 15 Bible Online

Jööp 15 - anuak bible

Jööp 15

¹Køøre aløk Elipathi nyï Tëman ni kööe,

²«?Aŋø, dhaanhø mo wïïe leer løny ki man løk luubö ki yi jöö mo bäŋ tiere, wala piema ree ki luup mo bäŋ tietge mo caala jamø?

³?Aŋø, løny jïre ki man piem ree ki luup mo oballe jaak, ki cäänö mo bäŋ gïn duue?

⁴Ka adïëri møn, ïïna cäänö ki luup mo raanynya bëët lwär ki Jwøk, mo gëëŋa jöör lam mana näk kare man lam Jwøk ki gø.

⁵Kiper raay moï ajoot ki køør luup moa carï, ni päärï gø ki man buŋï gø ki luup riek waŋ.

⁶Ïïna jääl luup moï keerï moa ö wøk ki dhiï, ni patha aani; ïïna jääl dhiï keerï.

⁷«?Aŋø, bee ï dhaanhø mana kwøŋ nywøl dïkwøŋ? ?Aŋø, bee ï na kwøŋ cwääc dïkwøŋ ni kïte poodi?

⁸?Aŋø, leec wï Jwøk na näk tiere okanø wïnynyï wïnynyö, ni ki baŋï ni leerra wïïï keerï?

⁹?Aŋø, agïnaŋø ni ŋäyï ni kucwa? ?Agïnaŋø na tiere kwanyï na dhäthö jïwa?

¹⁰Waani, waano kwänynyö baŋ jøøa näk wïthge da lwaar na näk ojal, ni beege jøøa døøŋŋø geni kiree ki wäru.

¹¹?Aŋø, luup cøm cwïny na car Jwøki jïrï mëëth, ni beeye luupa care ni cwïnye ee cïp piny, ba rømi kiperï?

¹²?Aperŋø ni ö acaare moï ni bwøth ïïni wøk en? ?Aperŋø ni ŋuuï nyeŋŋï wøk,

¹³ni tïmï niï wëër ka Jwøk, ni ö teeŋ luupögø bëët ni öge wøk ki dhiï?

¹⁴«?Aŋø, da dhaanhø mo bëëtö mare waany? ?Wala a dhaanhnhe mane dï jøøi no onywøl määnni ii mo bëëtö mare tiir?

¹⁵Ni näk Jwøk nyïïatwiet maal moe na en kur keerge käre ŋäädhö, ni këël jap maal kiree ba nëëni ni waany ki nyïme,

¹⁶a tugi ki dhaanhø man nø ni raac ni tem gïï mo reyø, ni raay maadhe kaamar pïï en, ba kadha rääö mare døc!

¹⁷«Ennø, cek ïthï jïra døc ki luummo caana jïrï en; aani, gïna jooda lama lamø jïrï,

¹⁸ni beeye gïna wïnynya baŋ jøøa wïthge leer na kwanyge baŋ wëëkge. Geni, bäŋ gïn mo ege mooŋø jïra.

¹⁹Geni, beege jøøa cïp ŋøøm jïge, ni bäŋ wëëllö mo ŋuti ki dïge.

²⁰Ŋat mo raac wø bëëdö ni rämö ki yïth nïr kwøw moe bëët. Eni, japa reyø na tïïe ki yïth cwiiri moe bëët wø dwøga wïïe.

²¹Eni wø bëëdö ni wïnynya dööt jap wø käl lwär, ni kany wø jïte ki jwöm mo thiinh, dïtwïëte wø laara öö ni laar eni twier.

²²Eni bäŋ ŋäädhe jïre ki man näk mo eni ööa wøk ki yi muudhö, kiper opëëllö bëëdö no onø jek kipere nee 'näk.

²³Eni wø bëëdö ni thääyö ni caya cam, ni köö, ni ‹?Cam en kaa?› Ni eni bëëdö ni ŋääe ki man näk nïr muudhö karge cään.

²⁴Ni eni bëëdö ni lwäär døc ki køør jwør gïï mo leth ki rääm na en bääte. Gïïögø teek marge anyoothge bäät gø kaawat man wø ö nyeya wø jiiŋ ree kiper leny,

²⁵kiper mana tïŋ cere maal bäät Jwøk, ni tööde bäät Jwøa en teeki jïre,

²⁶ni runy dëëre ki kwöt leny mo odhïŋ mo teek, ni tööde bäät Jwøk.

²⁷«'Ba këël na bëëde ni eno olør, ni täärnyïme lem ni ämme peek ki rïŋö,

²⁸eno bëëdö yïth päänye mo oränynyö, yïth uudi mo bäŋ jiy yïthge, ni beege uudi moo raanynyi.

²⁹Eni ba bëëdö këët no okwär; jap kwärö moe ba ruu, ni bäŋe jape këët mo di jääŋŋö dï ŋööm paac.

³⁰Eni ba bøth ki muudhö; eni ki bäädi moe, taal leep maaci taalø, ni ö eni ni puti ya jam jwïëy køøl mar dhi Jwøk.

³¹Beerra man ba cøøk dëëre keere ki man ŋääth gïn mo bäŋ tiere, kiper bäŋ gïn mo duue jïre.

³²Kanyo poot kare ni poodi, eno laar ränynyö, ni ö bäädi moe ni ba løthge këët.

³³Eni tïmö kaamar jaath omøk mo nyïïe opäth piny ni kar ciek marge poodi; ni tïme thuwø kaamar jaath mo obøøc mo kär thiiw.

³⁴Jiy mo wø dwäti ki jøøa kwier Jwøk, ge ba jïti ki gïn mo beer; kwör bëëte mo jø wø tïïc gïï mo reyø di raanynyø ki maac.

³⁵Geni, acaare mo reyø otïmö ni ena yïthge kaamar dhaanhø mo ena ec, ni puti nywøl na gïn mo raac. Geni, ge caara jap cwøk.»