Read anuak Jööp 18 Bible Online

Jööp 18 - anuak bible

Jööp 18

¹Køøre aløk Bildati nyï Cuua ni kööe,

²na «?Aŋø ni bëëdï ni cäänö ba weyï en? Beerra man jïtï ka acaara, nee wa läwa cäännö.

³?Aperŋø ni bëëtwa kaamar lääy ki baŋï en, ni wa iï raŋø kere bäŋ gïn mo ŋäcwa?

⁴Wui, ï ni wø cööt iï ki gootø marï en, ?aŋø, iï caarø ni piny tïmö ni ba beet këët kiperï, wala kïte rege daakge daa kwörge kiper nyeŋŋï?

⁵«'Ba ka adïëri møn, lamba mar ŋat raay wø di bïbö, ni ö maaci mar lamba mare ni ba liele.

⁶Lamba man wø en deŋŋe thøw bääte; ni ö kar bëëtö mare ni dööŋe na muudhö.

⁷Teek mar dëëre wø cäätha piny, ni pädhe ki køør acaare moe moa näk ee cïp piny.

⁸Kiper eni dëëre wø leeŋe ya ajääp ni tïïya eni ki tiete keere, ni magi ya ajääpi.

⁹Eni wø mak thøølli maa ki tiete, ni twöyi ya thøølli.

¹⁰Akupa bëëdö no obuŋ piny kipere; na abïëp bëëdö no ocieø waŋjööre.

¹¹Deŋŋe bäre bëëdö no owïr gïï wø käl lwär; eni bëëdö ni køør tiere di løpø.

¹²Teek mare aränynyö; ni bëët gïï mo lethi ni køya pädhö mare.

¹³Buny dëëre bäre araany täwi; ni ö tiete ki ceŋŋe ni raanynyi ya täwi mo leth.

¹⁴Ena tuut wøk ki kar bëëtö mare mana näk ree gwøø yie, ni maai ni kïthi kar thøø.

¹⁵Jammi bëët moa en kar bëëtö mare awaaŋ maaci; ni ö gïn mo liel mo caala tør ni keethe kar bëëtö mare.

¹⁶Lweedi moe atal piny yïth ŋøøm, ni ö bäädi moe na en maal ni ŋødi piny.

¹⁷Eni bäŋ ŋat mo par wïïe ki gø bäät piny; ni ö nyeŋŋe ni put bëëtö ni kuc wï ŋöömö.

¹⁸Ena tuut wøk ki yi tar ni leeŋi yi muudhö, ni riem eni wøk ki yïthakic jiy.

¹⁹Eni bäŋ obwöre jïre wala nyïïkwaaye yïthakic jø tuuŋge mo odööŋ wï paare.

²⁰Jiy moa en jï løø kur pänh-cäŋ yïthge athäŋŋö ki gïna tägö dëëre; ni ö jiyi moa en jï løø kur tuul-cäŋ ni bwøkge ki gø døc.

²¹Ka adïëri møn, manøgø beeye teeŋ bëëtö man wø tägi dëër ŋat raay; ni beeye bëët ŋat mo Jwøk kuue.»